بقو تۇرعىنى ەمحانادا جانجال شىعارعانى ءۇشىن ايىپپۇل تولەيدى، دەپ حابارلايدى Dalanews.kz.

باتىس قازاقستان وبلىسىندا ەمحانادا جانجال شىعارعان تۇرعىنعا ايىپپۇل سالىندى. بۇل تۋرالى جەرگىلىكتى “موي گورود” باسىلىمى جازدى. اكىمشىلىك قۇقىق بۇزۋشىلىق تۋرالى ءىس بايتەرەك اۋدانىنىڭ №2 اۋداندىق سوتىندا قارالدى. تۇرعىنعا ق ر اقبتك 80-1-بابىنىڭ 2-بولىگى بويىنشا ايىپ تاعىلدى.

وقيعا 24 قىركۇيەك كۇنى اسان كەنتىندەگى ەمحانا عيماراتىندا ورىن العان. بقو سوتىنىڭ مالىمەتىنشە، ايەل دارىگەرگە قاتىستى ادەپسىز مىنەز كورسەتىپ، ۇستەلدى ۇرىپ، ايقايلاعان. مەديسينالىق قىزمەتكەردىڭ كاسىبي جۇمىسىنا كەدەرگى كەلتىرگەن تۇرعىن دارىگەرگە قۇرمەتسىزدىك تانىتقان.

سوتتا ايەلدىڭ ءوزى كىناسىن مويىنداعان جوق جانە اكىمشىلىك قۇقىق بۇزۋشىلىق تۋرالى حاتتامامەن كەلىسپەيتىنىن ايتتى.

“وسى ۋاقىتتا دارىگەر دالىزگە شىعىپ، قاسىندا وتىرعان قارتتارعا جارىقتىڭ سونگەنىن ەسكەرتىپ، انىقتاما الۋ ءۇشىن كەلگەندەردىڭ كۇتپەۋىن وتىنگەن. ايىپتالۋشى ايەل دارىگەردەن قىزىن تەكسەرۋدى سۇراعان، ال دارىگەر سول ساتتە وعان نازار اۋدارماعان. سول جەردە تۇرعان ءبىر اجەي كەزەكسىز كىرىپ كەتكەن. ال دارىگەر ماسكا تاعىپ، بۇرىلىپ، ايىپتالۋشىعا قاراماي كەتكەن. وسى كەزدە ول داۋىسىن كوتەرىپ، دارىگەرگە ايقايلادى، دارىگەردىڭ ۇستەلىن ۇردى، ءبىراق بالاعات سوزدەر ايتپادى”، - دەلىنگەن سوت حابارلاماسىندا.

سوت شەشىمىمەن ايەل كىنالى دەپ تانىلدى. وعان 110 760 تەڭگە ايىپپۇل سالىندى.

قاۋلى زاڭدى كۇشىنە ەنگەن جوق.