باتىس قازاقستان وبلىسىندا اۋداندىق اۋرۋحانالاردىڭ ءبىرىنىڭ دارىگەرى پاسيەنتتەردىڭ جەكە مالىمەتتەرىن الەۋمەتتىك جەلىگە جاريالاپ، مەديسينالىق قۇپيانى بۇزعان، دەپ حابارلايدى Dalanews.kz.
@halyqstanBOT پاراقشاسىنا دارينسك اۋىلىنىڭ تۇرعىنى جولداعان بەينەجازبادا جەرگىلىكتى دارىگەر تولعاناي ءساتبايدىڭ ريلستارى كورسەتىلگەن.
تۇرعىننىڭ ايتۋىنشا، دارىگەر ناۋقاستاردىڭ جەكە دەرەگىن اشىق كورسەتۋ ارقىلى دارىگەرلىك ادەپتى ساقتاماعان.
بەينەجازبالاردىڭ بىرىندە تولعاناي ءساتباي كومپيۋتەر ەكرانىنداعى قۇجاتتاردى كورسەتەدى. وندا ناۋقاستاردىڭ ءاتى-جونى مەن دياگنوزى جازىلعان. ۆيدەو سيپاتتاماسىندا بۇل ادامدار دارىگەردىڭ قابىلداۋىندا بولعان دارينسكىلىكتەر ەكەنى كورسەتىلگەن.
سونىمەن قاتار تۇرعىن دارىگەردىڭ تاعى ءبىر ريلسىنا نازار اۋدارعان. "دارىگەرلەر قالاي بيلەيدى؟" دەپ اتالاتىن بەينەدە ناركولوگ-دارىگەر ەسىرتكىگە تاۋەلدى ادامداردىڭ قيىن جاعدايى جايلى ايتىلاتىن جەڭىل مازمۇنداعى ءان اۋەنىنە بيلەپ تۇر.
اۋىل تۇرعىنىنىڭ پىكىرىنشە، مۇنداي ۆيدەو ناشاقورلىقتى ناسيحاتتاۋعا ۇقسايدى.
وقيعاعا بايلانىستى وبلىستىق دەنساۋلىق ساقتاۋ باسقارماسى تۇسىنىكتەمە بەردى.
"الەۋمەتتىك جەلىدە جۇمىس ورنىندا تۇسىرىلگەن فوتو نەمەسە ۆيدەولاردى، اسىرەسە قۇجاتتار مەن ناۋقاستاردىڭ قاتىسۋىمەن جاريالاۋعا قاتاڭ تىيىم سالىنادى! مۇنداي ارەكەتتەر مەديسينالىق ۇيىمداردىڭ بەدەلىنە كەرى اسەر ەتۋى مۇمكىن. ءقازىر بۇل جاعداي بويىنشا قىزمەتتىك تەكسەرىس ءجۇرىپ جاتىر، پروفيلاكتيكالىق اڭگىمەلەر جۇرگىزىلۋدە. ماسەلە ءبىزدىڭ باقىلاۋىمىزدا"، – دەدى وبلىستىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى الماس جۇنىسبەكوۆ.
