بوقايەۆتىڭ ءوزى كولونيا باسشىلىعىنان بۇل اقپاراتتى رەسمي حات نەگىزىندە راستاۋدى تالاپ ەتىپ وتىر دەپ حابارلايدى Dalanews.kz.
"بوستاندىققا شىعاتىن مەرزىمىمدى ايتتى. 4 اقپانعا بەلگىلەگەن ەكەن. ءازىر بۇل ءسوز جۇزىندەگى اڭگىمە. رەسمي تۇردە راستاۋدى تالاپ ەتتىم. 19 قاڭتاردا سوت وتەدى، سول كەزدە ەركىندىك العاننان كەيىنگى مەنى باقىلاۋدىڭ تالاپ-شارتى بەكىتىلۋى قاجەت. ەكى جىل بۇرىن قىلمىستىق كودەكسكە لاڭكەستىك بابى بويىنشا سوتتالعانداردى باقىلاۋ تۋرالى وزگەرىس ەنگەن. تۋرا جولعا ءتۇستى مە، جوق پا سوعان كوڭىل بولەدى. ولارعا ءوزىمنىڭ "تۇزەلمەسىمدى" اۋەلدەن ەسكەرتكەنمىن"، – دەيدى ماكس بوقايەۆ.
ايتۋىنشا جەلتوقسان ايىندا كولونيا باسشىلىعى وعان قىسىم كورسەتپەك بولعان.
"15 جەلتوقساندا جۋرناليستپەن جۇزدەسپەك ەدىم. الايدا سوڭعى ساتتە بۇل كەزدەسۋگە تىيىم سالدى. 16 جەلتوقساندا تۋىس-تۋعانمەن تەلەفون ارقىلى تىلدەسپەك ەدىم. ماعان تيەسىلى 15 مينۋتتى كەسىپ تاستادى. ەل-جۇرتتى الاڭعا شىعۋعا ۇگىتتەيدى دەپ ۇرەيلەنسە كەرەك"، – دەيدى بوقايەۆ.
ايتا كەتەيىك، ماكس بوقايەۆ پەن تالعات ايان 2016 جىلى شەتەلدىكتەرگە جەر ساتۋعا قارسى شىققان اتىراۋداعى ميتينگىدەن كەيىن قاماۋعا الىنىپ، 5 جىلعا سوتتالعان. ميتينگىگە ارنايى كەلگەن ايماق باسشىسى نۇرلان نوعايەۆ نارازىلىققا جەتەكشىلىك ەتكەندەر جاۋاپقا تارتىلمايتىنىن ايتقان-تىن. سوعان قاراماي ماكس بوقايەۆ پەن تالعات ايان قاماۋعا الىنعان. حالىقارالىق ادام قۇقىعىن قورعاۋ ۇيىمدارى بۇل ءىستى ساياسي قۋدالاۋ دەپ سانايدى.
بيلىك بوقايەۆتى كىناسىن مويىنداعان جاعدايدا مەرزىمىنەن بۇرىن بوساتۋعا ءازىر ەكەنىن بىرنەشە رەت مالىمدەگەن. ازاماتتىق بەلسەندى ءوزىن كىنالى سانامايتىنىن جانە ەشقاشان مۇنداي قادامعا بارماسىن ايتقان.
