Boqaevtyń bostandyqqa shyǵatyn kúni belgili boldy
Boqaevtyń ózi koloniia basshylyǵynan bul aqparatty resmi hat negizinde rastaýdy talap etip otyr dep habarlaidy Dalanews.kz.
"Bostandyqqa shyǵatyn merzimimdi aitty. 4 aqpanǵa belgilegen eken. Ázir bul sóz júzindegi áńgime. Resmi túrde rastaýdy talap ettim. 19 qańtarda sot ótedi, sol kezde erkindik alǵannan keiingi meni baqylaýdyń talap-sharty bekitilýi qajet. Eki jyl buryn Qylmystyq kodekske lańkestik baby boiynsha sottalǵandardy baqylaý týraly ózgeris engen. Týra jolǵa tústi me, joq pa soǵan kóńil bóledi. Olarǵa ózimniń "túzelmesimdi" áýelden eskertkenmin", – deidi Maks Boqaev.
Aitýynsha jeltoqsan aiynda koloniia basshylyǵy oǵan qysym kórsetpek bolǵan.
"15 jeltoqsanda jýrnalistpen júzdespek edim. Alaida sońǵy sátte bul kezdesýge tyiym saldy. 16 jeltoqsanda týys-týǵanmen telefon arqyly tildespek edim. Maǵan tiesili 15 minýtty kesip tastady. El-jurtty alańǵa shyǵýǵa úgitteidi dep úreilense kerek", – deidi Boqaev.
Aita keteiik, Maks Boqaev pen Talǵat Aian 2016 jyly sheteldikterge jer satýǵa qarsy shyqqan Atyraýdaǵy mitingiden keiin qamaýǵa alynyp, 5 jylǵa sottalǵan. Mitingige arnaiy kelgen aimaq basshysy Nurlan Noǵaev narazylyqqa jetekshilik etkender jaýapqa tartylmaitynyn aitqan-tyn. Soǵan qaramai Maks Boqaev pen Talǵat Aian qamaýǵa alynǵan. Halyqaralyq adam quqyǵyn qorǵaý uiymdary bul isti saiasi qýdalaý dep sanaidy.
Bilik Boqaevty kinásin moiyndaǵan jaǵdaida merziminen buryn bosatýǵa ázir ekenin birneshe ret málimdegen. Azamattyq belsendi ózin kináli sanamaitynyn jáne eshqashan mundai qadamǵa barmasyn aitqan.
