بەلگىلى بلوگەر، PR مامان الىشەر ەلىكبايەۆ ءانشى قايرات نۇرتاسقا قاتىستى ەل ەستىمەگەن اڭگىمەنى بايانداپ بەردى. وقيعا ءانشىنىڭ الماتىداعى كونسەرتىندەگى شۋلى جايتپەن بايلانىستى بولعان، - دەپ حابارلايدى Dalanews.kz. 

"2013 جىلى ايسۇلتان نازاربايەۆتىڭ تويى بولىپ جاتقاندا قايرات نۇرتاستىڭ پرايم-پلازاداعى شۋى باستالعان ەدى. دوستىق داڭعىلىنىڭ جوعارى جاعىندا ۇيلەنۋ تويى بولىپ جاتتى. قالانىڭ تومەنگى كوشەسىندە ءانشىنىڭ كونسەرتى جانجالعا ۇلاستى. سول كەزدە الماتىلىقتاردىڭ ءبىرىنشى سۇراعى: «قايرات نۇرتاس دەگەن كىم؟!» بولدى. كوبى تانىمايدى ەكەن. ول كەزدە مەن جۋرناليست بولىپ جۇمىس ىستەيمىن. قايراتتى رەداكسياعا شاقىرىپ، ورىسشا سۇحبات الايىق دەدىم. ءبىراق ول كەلىسپەي، قازاقشا بەرەمىن دەدى. اناسىمەن دە سويلەستىك. اقىرى قازاقشا سۇحبات بەرىپ، ونى ءبىز ورىسشاعا اۋداردىق. مىقتى ءانشى ەكەنىنە كوزىم جەتتى. ءورىستىلدى ورتا عانا قايرات نۇرتاستى ونشا تانىمايدى ەكەن. شىعارماشىلىق جولىنا كەدەرگى كوپ بولدى"، – دەدى ەلىكبايەۆ "ايقاپ" پودكاستىندا. 

بۇل ازداي، الماتى قالاسىنىڭ سول كەزدەگى اكىمى احمەتجان ەسىموۆ قايرات نۇرتاستىڭ كونسەرتتەرىن وتكىزۋگە تىيىم سالعانىن دا جايىپ سالدى.  

"سەن الماتىدا كونسەرت بەرمەيسىڭ، سەنىڭ كىم ەكەنىڭدى تانىمايمىز" دەپ احمەتجان ەسىموۆ قايرات نۇرتاسقا اشۋلاندى. ەندى كونسەرت بەرمەيدى دەپ ەموسيانالدى شەشىم شىعاردى. ويتكەنى جوعارى جاقتاعى توي قاتار ءوتىپ جاتقان ەدى. ءبىراق سۇحباتتىڭ ورىسشا نۇسقاسىن وقىعاننان كەيىن حالىقتىڭ قايراتتى قالاي جاقسى كورەتىنىنە كوزى جەتتى. جالپى، ەسىموۆ ءانشىنىڭ شىعارماشىلىعىنا توسقاۋىل بولعانى جاسىرىن ەمەس"، – دەپ جازدى sn.kz.

ايتا كەتەيىك، احمەتجان ەسىموۆ 2008 جىلى 4 ساۋىردە الماتىنىڭ اكىمى بولىپ تاعايىندالدى. وعان دەيىن قالانى يمانعالي تاسماعامبەتوۆ باسقارعان. ەسىموۆ 7 جىل - 2015 جىلعا دەيىن وڭتۇستىك استانانى باسقارعان.