بۇل – كەزدەيسوق ەمەس. ءوز جەرىندە ۇرپاق ءوربىتىپ، وسىپ-ونگىسى كەلەتىن ۇلت ۇلدارىن اجالعا ايداپ سالعان كرەملدىڭ ىرقىنان شىعۋعا تىرىسۋدا. ياكۋتتاردىڭ سانا-سەزىمىندە بۇرىن-سوڭدى بولماعان ترانسفورماسيا ءجۇرىپ جاتىر.
ال وسىناۋ قوزعالىستىڭ باستاۋىندا تۇرعان ياكۋت بەلسەندىسى، روك-انشى ايحال امموسوۆ جىل باسىندا رەسەيدەن قازاقستانعا باس ساۋعالاۋعا ءماجبۇر بولدى. ياكۋتياداعى ازاتتىق سيمۆولىنا اينالىپ ۇلگەرگەن امموسوۆ "ورىس الەمىمەن" اقىرىنا دەيىن ارپالىسۋعا بەل بۋىپ وتىر.
اتا-اناسىنىڭ ازان شاقىرىپ قويعان اتى – يگور ەكەن. ەسەيە كەلە ءتۇر-تۇلعاسىنىڭ يگورەكپەن مۇلدە ۇيلەسپەيتىنىن، مۇنىڭ زورلىقپەن تاڭعان ەسىم ەكەنىن تۇسىنگەن. ايحال ساحا تىلىندە ايدىك، ايگىلى دەگەن ماعىنا بەرەدى.
"حولود" جۋرنالىنا سۇحبات بەرگەن امموسوۆ ورىستاندىرۋ ساياساتىنىڭ زاردابى ياكۋت حالقىنىڭ سۇيەگىنە ءوتىپ كەتكەنىن ايتىپتى.
– سوعىستان قاشقان ياكۋتتاردىڭ كوپشىلىگى قازاقستاندى پانالادى. مۇندا كەلگەننەن كەيىن ءوزىمىزدىڭ ماڭگۇرت ەكەنىمىزدى تۇسىندىك.
رەسەي ءبىزدى قويداي ورگىزىپ، قوزىداي كوگەندەگەن ەكەن. ءسوز ساپتاۋىمىز، ءجۇرىس-تۇرىسىمىز، ىشەر اس، كيەر كيىمىمىزگە دەيىن ورىستىڭ ءيسى ءسىڭىپتى. ياكۋت كوشەلەرىندە مەن سەكىلدى "يگور" مەن "يۆاندار" ءورىپ ءجۇر. ولار بۇل ەسىمدەردى باسقىنشىلاردىڭ كۇشپەن تاڭعانىن بىلگىسى دە كەلمەيدى.
قازاقتار؟ ءبىز ولارعا قىزىعا قارايمىز. ءوز تىلىندە يمەنبەي، ەركىن سويلەسەدى. كوشە اتاۋلارىن ۇلتتىڭ ارعى-بەرگى تاريحىنداعى قايراتكەرلەرگە قايتارعان. بىزدە بۇنىڭ ءبىرى دە جوق. ياكۋتتەردىڭ بۇگىنگى بۋىنى ماڭگۇرتتىك دەيىن ايىقپاس دەرتكە شالدىققان. ەل بيلىگى كرەملدىڭ قازانىن اسىپ، وتىن جاعىپ وتىر... – دەپ قىنجىلادى ايحال.
ايتسە دە ياكۋتتاردان كۇدەر ۇزۋگە ءالى ەرتە. ەلدە ءپۋتيندى قامشىنىڭ استىنا الۋعا ءازىر اۋديتوريانىڭ شوعىرى ۇلعايىپ كەلەدى.
– پروپاگاندانىڭ ۋىتى ونە-بويىنا تاراي قويماعان اقىل-ەسى ءتۇزۋ ياكۋتتار ءپۋتيننىڭ شاپقىنشىلىعىن اقتامايدى. حالىقتىڭ سابىر سۋى سارقىلىپ، جانارتاۋداي اتقىلاۋعا شاق تۇر. ءبىراق باعدار بەرەر، جول باستار كوشباسشى جوق. ءپۋتيننىڭ تۇسىنداعى رەسەي ياكۋتتىڭ باس كوتەرەر بەلسەندىلەرىن قىناداي قىردى، – دەيدى امموسوۆ.
2009 جىلى ساحا رەسپۋبليكاسى (ياكۋتيا) تاۋەلسىزدىكتەن باس تارتتى. باس تارتۋعا ءماجبۇر بولدى. ءقازىر ول رەسەيدىڭ قۇرامىنداعى شاعىن فەدەرالدى ايماق، ەتنيكالىق توپ.
DALA ەكوجۇيەسىنە قاراستى Dalanews.kz سايتىندا وسىعان بايلانىستى: "ياكۋتيا تاۋەلسىزدىكتەن ايىرىلدى. قالاي؟ نەگە؟" دەگەن تاقىرىپتاعى ساراپتاما جارىق كورگەن.
Dalainside روك-انشىمەن كولەمدى سۇحبات قۇرۋعا تالپىنادى. بىزگە جەتكەن مالىمەت بويىنشا ايحال قازاقستاندا ۇزاق ايالداعىسى كەلمەيدى، سوندىقتان اسىعۋ قاجەت. فسب ياكۋتتىڭ روك-انشىسىن قولعا ءتۇسىرۋ ءۇشىن جانتالاسۋدا.
➡️ Dalainside ارناسى رەسەي ءدىنارالىق قاقتىعىستىڭ الدىندا تۇرعانىن تاپسىرلەپتى، تولىق اقپارات سىلتەمەدى:
https://t.me/dalainside/1239
https://dalanews.kz/news/88447-satqaliev-tagy-da-zhazyq-zherde-surindi
https://dalanews.kz/del-qazir/88386-kudebaevtyng-qashuyna-qyrgyzdyng-robi
https://dalanews.kz/news/88358-qazaqstandy-putinning-qupiia-odaqtasy
https://dalanews.kz/news/88339-turkistanga-berilgen-status-madeni-m
https://dalanews.kz/aimak/88328-turkistan-oblysynda-soltustik-ongirl
