تينا كاندەلاكي Telegram-ارناسىندا "قازاقستاندا ورىس ءتىلى باياۋ تۇردە ىعىستىرىلىپ جاتقانىن" ايتىپ، جازبا جاريالادى. كولىك مينيسترلىگىنىڭ ءبىرقاتار بەكەت اتاۋىن وزگەرتۋ تۋرالى شەشىمىن رەسەيلىك تەلەجۇرگىزۋشى وسىلاي قابىلداپتى. ول مىسال رەتىندە "ۋرالسك" بەكەتىنىڭ اتاۋى "ورال"، ال "ۋزەن" بەكەتىنىڭ اتاۋى "جاڭاوزەن" بولىپ وزگەرگەنىن كەلتىرگەن ەدى.
"بلوگەرلەر مەن قاراپايىم جەلى قولدانۋشىلارى ورىس ءتىلىن ىعىستىرۋمەن اينالىسىپ جاتپاعانىمىزدى ايتىپ، جاۋاپ بەردى. ءبىز انا ءتىلىمىزدى، مەملەكەتتىك ءتىلىمىزدى لايىقتى ورنىنا قايتارۋعا تىرىسىپ جاتىرمىز. بۇل، بىرىنشىدەن. ەكىنشىدەن، بەكەتتەرگە، كوشەلەرگە، قالالارعا قانداي اتاۋ بەرۋ كەرەگىن ءار ەلدىڭ ءوزى شەشۋگە قۇقىعى بار. بۇعان جاۋاپ رەتىندە اقىل-ويىن جوعالتقان "ماڭگۇرت" تۋرالى ايتا باستادىڭىز. ...ءسىز كۇللى قازاقتى ماڭگۇرت دەپ مەڭزەدىڭىز بە؟ ەگەر بۇل ءسوزدىڭ ماعىناسىن بىلسەڭىز، وندا بۇكىل حالىققا قانشالىق قيانات جاساعانىڭىزدى ءبىلۋىڭىز كەرەك ەدى. مەدياسفەراداعى ادام رەتىندە ءسوزدىڭ باعاسىن ءبىلۋىڭىز كەرەك ەدى. سوندىقتان ءقازىر ىستەپ جاتقان ءىسىڭىز - سانالى تۇردە ارانداتۋ"، - دەيدى ول.
سونىمەن قاتار، بەكبولات تىلەۋحان قازاق حالقى قيىن شاقتا ءتۇرلى ۇلت وكىلدەرىن قابىلداعانىن، تاريحتى ەسكە سالدى.
"ءبىز ۇلتىنا قاراماستان ەدىلدەن كەلگەن نەمىستەردى، ينگۋشتار مەن شەشەندەردى، بالقارلار مەن قاراشايلاردى، پولياكتاردى، كۇردتەردى، وسەتيندىكتەردى جانە قازاقستانعا جەر اۋدارىلعان باسقا دا حالىقتاردى قابىلدادىق. كاۆكاز حالىقتارىنان قازاقتار سۋىقتا قالعان بالالاردى، ايەلدەر مەن قارتتاردى قالاي قۇتقارعانى تۋرالى اڭگىمەلەردى ەستۋىڭىز كەرەك ەدى. ءبىز، قازاقتار، ادامداردى قيىندىقتا تاستاي المايمىز، ولاردىڭ سەنىمى، ءتىلى مەن ۇلتى بىزگە ماڭىزدى ەمەس. ەگەر حالقىمىزدىڭ قارتتاردى ايازدا قۋىپ جىبەرۋگە قاۋقارى جەتەدى دەۋگە باتىلىڭىز بارسا، وندا ناعىز ماڭگۇرت ءبىز ەمەس، ءسىز. ءسىز ماڭگۇرتسىز. ءسىز تاريحتى ەستەن شىعاردىڭىز نەمەسە بىلمەيسىز"، - دەدى بەكبولات تىلەۋحان.
