پروكۋرورلار جۇرگىزگەن تەكسەرىس ناتيجەسىندە استانا، الماتى، شىمكەنت قالالارىندا، الماتى جانە تۇركىستان وبلىستارىندا بالا تاربيەسىنە جاۋاپتى ماماندار اراسىندا جۇكتەمە شامادان تىس كوپ ەكەنى انىقتالعان، دەپ حابارلايدى Dalanews.kz.
"تەكسەرۋ بۇگىندە ءبىر قىزمەتكەرگە تۇسەتىن جۇكتەمە 17 مىڭ بالاعا جەتەتىنىن، ال استانا، الماتى، شىمكەنت قالالارىندا، الماتى جانە تۇركىستان وبلىستارىندا 30-دان 100 مىڭعا دەيىن جەتەتىنىن كورسەتتى. الەمدىك ستاندارتتارعا سايكەس 1 قىزمەتكەرگە جۇكتەمە نورماسى 5 مىڭ بالادان، ال ەڭ پروگرەسسيۆتى ەلدەردە 1 مىڭنان اسپاۋى كەرەك"، — دەلىنگەن پروكۋراتۋرا تاراتقان حابارلامادا.
پروكۋراتۋرانىڭ مالىمەتىنشە، سالاداعى قىزمەتكەرلەردىڭ موينىنا شامادان تىس جۇكتەمە ىلىنگەندىكتەن، ولار كامەلەتكە تولماعانداردى تاربيەلەۋ جانە باعۋ جاعدايلارىن باقىلاپ ۇلگەرمەيدى. كەسىرىنەن، بالالارعا قاتىستى زورلىق-زومبىلىق جاعدايلارى كوبىنەسە كەش انىقتالادى.
"جىل باسىنان بەرى اسىراپ الىنعان بالالاردى ۇرىپ-سوعۋ جانە ازاپتاۋ فاكتىلەرى شىمكەنت قالاسىندا، ۇلىتاۋ جانە اقمولا وبلىستارىندا تىركەلگەن. ماسەلەن، اقمولا وبلىسىندا ءساۋىر ايىندا پاترونات تاربيەشىنىڭ 5 بالانى ۇرىپ-سوعۋ فاكتىلەرى انىقتالعان. تەرگەپ-تەكسەرۋ بارىسىندا ءۇش جىلدان استام ۋاقىت بۇرىن ءبىر بالانى ءولتىرۋ فاكتىسى انىقتالعان. ۇلىتاۋ وبلىسىندا بالالاردى فەرمادا جۇمىس ىستەۋگە ءماجبۇر ەتكەن اسىراپ العان انا 4 جىلعا باس بوستاندىعىنان ايىرىلدى"، — دەپ حابارلادى پروكۋراتۋرادان.
وسى تۇرعىدا باس پروكۋراتۋرا بالا قۇقىقتارى جونىندەگى ۋاكىلدىڭ قورعانشىلىق جانە قامقورشىلىق ورگاندارى قىزمەتكەرلەرىنىڭ سانىنىڭ نورماتيۆتىك زاڭنامالىق تۇرعىدان بەكىتۋگە قاتىستى باستاماسىن قولدايدى. سونىمەن قاتار مينيسترلىك پروكۋراتۋرانىڭ پەداگوگ-پسيحولوگتاردىڭ قىزمەتىن كۇشەيتۋ قاجەتتىلىگىنە قاتىستى ۇسىنىستارىن قولدادى.
اتاپ ايتقاندا، پەداگوگ-پسيحولوگتاردىڭ سانى بويىنشا نورماتيۆ زاڭنامالىق تۇرعىدان قايتا قارالۋدا، مۇندا 1 مامانعا جۇكتەمە 500 وقۋشىدان اسپاۋى ءتيىس. جالپى، جول كارتاسى مينيسترلىكتىڭ باسقا دا باعىتتارى بويىنشا جۇمىستارىنىڭ تيىمدىلىگىن ارتتىرادى دەپ كۇتىلىپ وتىر.
جىل سوڭىنا دەيىن ديەۆيانتتى مىنەز-قۇلقى بار بالالاردىڭ «جاعىمدى ورتاعا» بەيىمدەۋ بويىنشا جوبانى ىسكە اسىرۋ (بەدەلدى تالىمگەرلەردى بەكىتۋ، كادەت سىنىپتارىنا جانە «جاس سارباز» اسكەري-پاتريوتتىق قوزعالىس كلۋبتارىنا، ۇلتتىق ۇلاننىڭ «جاس بۇركىت» جانە ت. ب. ورنالاستىرۋ)، ىشكى ىستەر ورگاندارىنىڭ ەسەبىندە تۇرعان كامەلەتكە تولماعانداردى قوسىمشا بىلىممەن جانە ت. ب. قامتۋ ماقساتىندا ولارعا تەكسەرۋ جۇرگىزۋ جوسپارلانعان. تەكسەرۋ ناتيجەلەرى بويىنشا بۇزۋشىلىقتارعا جول بەرگەن كىنالى لاۋازىمدى تۇلعالار، ونىڭ ىشىندە مينيسترلىكتىڭ بولىمشە باسشىلارى تارتىپتىك جاۋاپكەرشىلىككە تارتىلدى.
