جالپى، وبلىس بويىنشا 32،6 مىڭ جۇمىسسىز رەتىندە تىركەلگەن. ايماقتاعى جۇمىسسىزدىق دەڭگەيى سوڭعى التى ايدا 4،8% قۇرادى.
وڭىردە ءوزىن-وزى جۇمىسپەن قامتىعانداردا بارشىلىق. ولاردىڭ سانى 188،6 مىڭ ادامدى قۇرايدى، جۇمىسپەن قامتىلعان حالىقتىڭ ىشىندەگى ۇلەسى – 28،6%.
ايتا كەتەيىك، ايماق حالقى كاسىپكەرلىكتى دامىتۋدىڭ ۇلتتىق جوباسىنىڭ شاراپاتىن كورۋدە. اتالمىش جوبا اياسىندا 6،5 ملرد تەڭگە ءبولىنىپ، 12،9 مىڭ ءوزىن-وزى ناتيجەسىز جۇمىسپەن قامتىعان جانە جۇمىسسىز ازاماتتار مەملەكەتتىك قولداۋ شارالارىنىڭ ارقاسىندا جۇمىسپەن قامتىلدى.
ماسەلەن، قىسقا مەرزىمدى كاسىپتىك وقۋعا 1280 ادام جىبەرىلەتىن بولادى، ونىڭ ىشىندە اعىمداعى جىلدىڭ 1 شىلدەسىنە 559 ادام جىبەرىلدى.
– ءبىرىنشى جارتىجىلدىقتا 10761 ادام جۇمىسقا ورنالاستىرىلدى، ونىڭ ىشىندە 5246-سى نەمەسە 48،7%-ى تۇراقتى جۇمىس ورىندارىنا ورنالاستى، – دەدى باقىتكۇل تولەبەكوۆا.
الماتى وبلىسىندا ەكى ايماعىندا تۇراقتى جۇمىسقا ورنالاسۋ دەڭگەيى تومەن. ولار – قونايەۆ قالاسى مەن بالقاش اۋداندارى. مۇنداعى كورسەتكىش 25%-دان اسپاي تۇر.
ال جاستار تاجىريبەسى اياقتالعاننان كەيىن جۇمىسقا ورنالاسۋدىڭ تومەن پايىزى قاراساي اۋدانىندا تىركەلگەن. بۇل جەردە كورسەتكىش 27،3% قۇرايدى. جامبىل اۋدانىندا احۋال ءتىپتى ناشار. اتالعان اۋداندا بىردە-بىر ادام جۇمىسقا ورنالاسپاعان.
– قوعامدىق جۇمىستار اياقتالعاننان كەيىن تۇراقتى جۇمىسقا ورنالاسۋ تومەن دەڭگەيى جامبىل – 3%، ىلە – 6،8%، تالعار – 19،2%، بالقاش – 25% اۋداندارىندا تىركەلدى. ءتىپتى، ەڭبەكشىقازاق اۋدانىندا بىردە-بىر ادام جۇمىسقا تۇرماعان، – دەپ قورىتىندىلادى باقىتكۇل تولەبەكوۆا.
