اماندىق باتالوۆ «BI-Group» حولدينگىنىڭ ديرەكتورلار كەڭەسىنىڭ ءتوراعاسى ايدىن راحىمبايەۆ باستاعان كومپانيا وكىلدەرىن قابىلدادى. كەزدەسۋ بارىسىندا ەكى جاقتى ارىپتەستىك بايلانىستار ماسەلەسى تالقىلاندى. سونىڭ ىشىندە، اسىرەسە، الەۋمەتتىك نىساندار مەن تۇرعىن ءۇي قۇرىلىسىنا قاتىستى كەڭىنەن ءسوز بولدى.
وبلىس اكىمى اتالمىش ىرگەلى كومپانيانىڭ جەتىسۋ ءوڭىرىنىڭ، سونىڭ ىشىندە تالدىقورعان قالاسىنىڭ ساۋلەتتىك دامۋىنا زور ۇلەس قوسقانىن اتاپ ءوتتى.
- «BI-Group» حولدينگى تالدىقورعاندا ينفەكسيالىق اۋرۋحانانى، دراما تەاترىن تۇرعىزدى. وبلىستا ءبىرقاتار مەكتەپتەردىڭ كۇردەلى جوندەۋىن، قۇرىلىسىن جۇرگىزدى. استانامىزدىڭ 20 جىلدىعىنا ارناپ سالعان «جەتىسۋ» ساياباعى - ءقازىر ەلوردالىقتاردىڭ ەڭ سۇيىكتى دەمالىس ورىندارىنىڭ ءبىرى. ءۇشارال اۋەجايىنىڭ ۇشىپ-قونۋ جولاعىن جوندەۋگە دە اتسالىسادى. «جۇمىسپەن قامتۋ جول كارتاسى» باعدارلاماسىنىڭ ىسكە اسىرىلۋىنا بەلسەنە قاتىستى. «BI-Group» كومپانياسى – ءبىز ءۇشىن ەڭ الدىمەن ساپا مەن سەنىمدىلىك. سوندىقتان ءبىز سىزدەرمەن ارى قاراي دا جۇمىس ىستەۋگە نيەتتىمىز. تالدىقورعان قالاسىنان تۇرعىن ءۇي كەشەنىن سالساڭىزدار، ەكى جاققا دا ءتيىمدى بولار ەدى. ءبىزدىڭ وبلىستا تۇرعىن ءۇي كەزەگىندە تۇرعان ازاماتتاردىڭ سانى 50 مىڭداي. تالدىقورعاننىڭ وزىندە 15 مىڭ شاماسىندا. سول سياقتى الەۋمەتتىك نىسانداردىڭ قۇرىلىسىنا قاتىستى جوبالارعا دا قاتىسساڭىزدار، قۋانامىز، - دەدى ا. باتالوۆ.
مۇنان سوڭ ءسوز العان «BI-Group» حولدينگىنىڭ ديرەكتورلار كەڭەسىنىڭ ءتوراعاسى ايدىن راحيمبايەۆ ءبىراز جىلدان بەرى الماتى وبلىسىندا كوپتەگەن جوبالاردى ىسكە اسىرعاندارىن ايتتى. سەنىمدى سەرىكتەس رەتىندە ىسكەرلىك بايلانىستاردى ودان ءارى دامىتۋعا پەيىلدى. ول ءوز سوزىندە مەكتەپتەردىڭ قۇرىلىستارىنا قاتىستى بىرنەشە ۇسىنىستارى بار ەكەنىن جەتكىزدى.
اتاپ ايتقاندا، «Nur Otan» پارتياسىنىڭ سايلاۋالدى باعدارلاماسىندا باسىمدىق بەرىلگەن مىندەتتەردىڭ ءبىرى - وقۋشى ورنىنىڭ جەتىسپەۋشىلىگىن جويىپ، 2025 جىلعا دەيىن 800 مەكتەپ سالۋ. «BI-Group» كومپانياسى وسى باعدارلاما شەڭبەرىندە بەس جىل ىشىندە جاڭا فورماتتاعى 101 مەكتەپ سالۋدى جوسپارلاپ وتىر. سونىڭ ىشىندە الماتى وبلىسىندا سالۋ قاراستىرىلعان 5 مەكتەپتىڭ ەكەۋىن تالعار اۋدانىنىڭ تالدىبۇلاق جانە بايبۇلاق اۋىلدارىندا تۇرعىزۋ بەلگىلەنگەن. ولارعا قاجەتتى جەر ۋچاسكەلەرى انىقتالعان. مەملەكەتتىك-جەكەمەنشىك ارىپتەستىك مەحانيزمى نەگىزىندە سالىناتىن مەكتەپتەردىڭ جوبالىق قۇنىنىڭ 30%ء-ىن اكىمدىك قارجىلاندىرسا، 20% - جەكە ينۆەستيسيا، 50% بانك ارقىلى سۋسيديالاۋ نەگىزىندە ىسكە اسىرىلماق. وسى جوبالاردى وبلىس اكىمى ماقۇلداسا، بيىلعى جىلى قۇرىلىس جۇمىستارىن باستايتىندىقتارىن ايتتى. بۇل ەكى مەكتەپ جاڭا فورماتتاعى مەكتەپتەر قانداي بولۋى كەرەك دەگەندە ۇلگى رەتىندە كورسەتەتىندەي بولماق. پاندىك ءبىلىم بەرۋمەن قاتار قارجىلىق، سيفرلىق ساۋاتتىلىققا باۋلۋ، بالالاردىڭ وقۋعا دەگەن ىنتاسىن ارتتىرۋ ماقساتىندا بوس كەڭىستىكتى، زاماناۋي ينتەرەرلىك شەشىمدەردى تارتىمدى پايدالانۋ جاعى دا قاراستىرىلادى. مەكتەپتەر قۇرىلىسىنىڭ ءمجا نەگىزىندە سالىنۋ كەزەڭدەرى مەن پروسەدۋرالارى تالقىلانعاننان كەيىن ايدىن راحىمبايەۆ كەلەسى ماسەلە – تالعار اۋدانى اۋماعىندا 450 ورىندىق دارىندى بالالارعا ارنالعان اباي اتىنداعى رەسپۋبليكالىق مەكتەپ-ينتەرناتىن سالۋ تاقىرىبىنا ويىستى. وبلىس اكىمى ءتيىستى لاۋازىمدى تۇلعالارعا اتالمىش ءبىلىم بەرۋ نىسانىنىڭ ورنالاساتىن جەرى بويىنشا ناقتى ۇسىنىس بەرىپ، ءبىر اي ىشىندە جەر ۋچاسكەسى ماسەلەسىن شەشۋدى تاپسىردى.
سونىمەن قاتار قۇرىلىس كومپانياسى وبلىستا جالپى سانى 836 ورىندىق التى شاعىن جيناقتى مەكتەپ سالۋدى باستاماق. الماتى وبلىسىنىڭ ءبورىباي بي، سارىتوبە، جايداقبۇلاق، كازاتكوم، شولاققارعالى، كوكدالا اۋىلدارىندا سالىناتىن مەكتەپتەردىڭ جوبالىق-سمەتالىق قۇجاتتارى دايىن. ءتيىستى ساراپتامادان وتكەننەن كەيىن قۇرىلىس جۇمىستارى باستالادى. كومپانيا باسشىسىنىڭ ايتۋىنشا، مەكتەپتەردىڭ قۇرىلىسىن جىل سوڭىنا دەيىن اياقتاۋ جوسپارلانىپ وتىر. ال تۇرعىن ءۇي قۇرىلىسىنا قاتىستى ايدىن راحيمبايەۆ ارنايى دايىندالىپ، جان-جاقتى ويلاستىرىپ، دايىن جوبامەن كەلسەك دەگەن ويىن ايتتى.
كەزدەسۋ سوڭىندا وبلىس اكىمى اماندىق باتالوۆ «BI-Group» حولدينگى باسشىسىنىڭ ۇسىنىستارىن قولدايتىنىن جەتكىزدى.
- ۇسىنىستارىڭىزدى قولدايمىن. ءبىز حولدينگپەن بىرلەسىپ، وبلىستاعى 3 اۋىسىمدى مەكتەپتەردى جويۋدىڭ باعدارلاماسىن ازىرلەمىز. 2025 جىلعا دەيىن قاي ەلدى مەكەندەردە قانشا مەكتەپ سالامىز، بۇل سونىڭ ءبارىن ەگجەي-تەگجەيلى ناقتىلايتىن قۇجات بولادى. بىزدە ءقازىر 49 ءۇش اۋىسىمدى مەكتەپ بار. اسىرەسە، بۇل ماسەلە الماتى ماڭىنداعى اۋدانداردا وزەكتى بولىپ وتىر. ءبىز مەكتەپتەر سالاتىن جەر ۋچاسكەلەرىن دايىندايمىز، ينجەنەرلىك ينفراقۇرىلىم تارتىپ بەرەمىز، اتقارۋشى ورگان تاراپىنان بەرىلۋى ءتيىستى قارجىنى بولەمىز، ال سىزدەر جاڭا مەكتەپ سالىپ بەرەسىزدەر. بۇل بىزگە ءۇش اۋىسىمدى مەكتەپتەردى جويۋدا ۇلكەن كومەك بولادى. سول سياقتى تالدىقورعان قالاسىندا تۇتاس تۇرعىن ءۇي كەشەندەرىن سالۋعا ينجەنەرلىك جەلىلەر جۇرگىزىلگەن دايىن الاڭدار بار. جالپى وبلىس كولەمىندە جۇرگىزىلەتىن تۇرعىن ءۇي قۇرىلىسىنا بەلسەندى قاتىسىڭىزدار، - دەدى ا. باتالوۆ. وبلىس باسشىسىنىڭ ايتۋىنشا، بۇل رەتتە "جەتىسۋ" اكك" ءودي" اق مەن «BI-Group» حولدينگى ءوزارا تىعىز جۇمىس ىستەيتىن بولادى.
سول سياقتى ءتيىستى مەكەمە باسشىلارىنا «BI-Group» كومپانياسى ءمجا مەحانيزمىمەن سالاتىن تالعار اۋدانىنداعى ەكى مەكتەپتىڭ جەرگىلىكتى ورگان تاراپىنان قولداۋعا ءتيىس قانداي قاجەتتىلىكتەرى بار، سونى انىقتاپ، ەكىنشى جارتىجىلدىققا ۇسىنىس بەرۋدى تاپسىردى. جانە «BI-Group» كومپانياسىمەن بىرلەسىپ ءۇش اۋىسىمدى مەكتەپتەردى جويۋدىڭ 2025 جىلعا دەيىنگى باعدارلاماسىن ازىرلەۋدى دە مىندەتتەدى.
