BI-Group Almaty oblysy úsh aýysymdy mektepterdi joiýǵa qatysady
Amandyq Batalov «BI-Group» holdinginiń direktorlar keńesiniń tóraǵasy Aidyn Rahymbaev bastaǵan kompaniia ókilderin qabyldady. Kezdesý barysynda eki jaqty áriptestik bailanystar máselesi talqylandy. Sonyń ishinde, ásirese, áleýmettik nysandar men turǵyn úi qurylysyna qatysty keńinen sóz boldy.
Oblys ákimi atalmysh irgeli kompaniianyń Jetisý óńiriniń, sonyń ishinde Taldyqorǵan qalasynyń sáýlettik damýyna zor úles qosqanyn atap ótti.
- «BI-Group» holdingi Taldyqorǵanda infektsiialyq aýrýhanany, drama teatryn turǵyzdy. Oblysta birqatar mektepterdiń kúrdeli jóndeýin, qurylysyn júrgizdi. Astanamyzdyń 20 jyldyǵyna arnap salǵan «Jetisý» saiabaǵy - qazir elordalyqtardyń eń súiikti demalys oryndarynyń biri. Úsharal áýejaiynyń ushyp-qoný jolaǵyn jóndeýge de atsalysady. «Jumyspen qamtý jol kartasy» baǵdarlamasynyń iske asyrylýyna belsene qatysty. «BI-Group» kompaniiasy – biz úshin eń aldymen sapa men senimdilik. Sondyqtan biz sizdermen ary qarai da jumys isteýge niettimiz. Taldyqorǵan qalasynan turǵyn úi keshenin salsańyzdar, eki jaqqa da tiimdi bolar edi. Bizdiń oblysta turǵyn úi kezeginde turǵan azamattardyń sany 50 myńdai. Taldyqorǵannyń ózinde 15 myń shamasynda. Sol siiaqty áleýmettik nysandardyń qurylysyna qatysty jobalarǵa da qatyssańyzdar, qýanamyz, - dedi A. Batalov.
Munan soń sóz alǵan «BI-Group» holdinginiń direktorlar keńesiniń tóraǵasy Aidyn Rahimbaev biraz jyldan beri Almaty oblysynda kóptegen jobalardy iske asyrǵandaryn aitty. Senimdi seriktes retinde iskerlik bailanystardy odan ári damytýǵa peiildi. Ol óz sózinde mektepterdiń qurylystaryna qatysty birneshe usynystary bar ekenin jetkizdi.
Atap aitqanda, «Nur Otan» partiiasynyń sailaýaldy baǵdarlamasynda basymdyq berilgen mindetterdiń biri - oqýshy ornynyń jetispeýshiligin joiyp, 2025 jylǵa deiin 800 mektep salý. «BI-Group» kompaniiasy osy baǵdarlama sheńberinde bes jyl ishinde jańa formattaǵy 101 mektep salýdy josparlap otyr. Sonyń ishinde Almaty oblysynda salý qarastyrylǵan 5 mekteptiń ekeýin Talǵar aýdanynyń Taldybulaq jáne Baibulaq aýyldarynda turǵyzý belgilengen. Olarǵa qajetti jer ýchaskeleri anyqtalǵan. Memlekettik-jekemenshik áriptestik mehanizmi negizinde salynatyn mektepterdiń jobalyq qunynyń 30%-in ákimdik qarjylandyrsa, 20% - jeke investitsiia, 50% bank arqyly sýsidiialaý negizinde iske asyrylmaq. Osy jobalardy oblys ákimi maquldasa, biylǵy jyly qurylys jumystaryn bastaityndyqtaryn aitty. Bul eki mektep jańa formattaǵy mektepter qandai bolýy kerek degende úlgi retinde kórsetetindei bolmaq. Pándik bilim berýmen qatar qarjylyq, tsifrlyq saýattylyqqa baýlý, balalardyń oqýǵa degen yntasyn arttyrý maqsatynda bos keńistikti, zamanaýi intererlik sheshimderdi tartymdy paidalaný jaǵy da qarastyrylady. Mektepter qurylysynyń MJÁ negizinde salyný kezeńderi men protsedýralary talqylanǵannan keiin Aidyn Rahymbaev kelesi másele – Talǵar aýdany aýmaǵynda 450 oryndyq daryndy balalarǵa arnalǵan Abai atyndaǵy respýblikalyq mektep-internatyn salý taqyrybyna oiysty. Oblys ákimi tiisti laýazymdy tulǵalarǵa atalmysh bilim berý nysanynyń ornalasatyn jeri boiynsha naqty usynys berip, bir ai ishinde jer ýchaskesi máselesin sheshýdi tapsyrdy.
Sonymen qatar qurylys kompaniiasy oblysta jalpy sany 836 oryndyq alty shaǵyn jinaqty mektep salýdy bastamaq. Almaty oblysynyń Bóribai bi, Sarytóbe, Jaidaqbulaq, Kazatkom, Sholaqqarǵaly, Kókdala aýyldarynda salynatyn mektepterdiń jobalyq-smetalyq qujattary daiyn. Tiisti saraptamadan ótkennen keiin qurylys jumystary bastalady. Kompaniia basshysynyń aitýynsha, mektepterdiń qurylysyn jyl sońyna deiin aiaqtaý josparlanyp otyr. Al turǵyn úi qurylysyna qatysty Aidyn Rahimbaev arnaiy daiyndalyp, jan-jaqty oilastyryp, daiyn jobamen kelsek degen oiyn aitty.
Kezdesý sońynda oblys ákimi Amandyq Batalov «BI-Group» holdingi basshysynyń usynystaryn qoldaitynyn jetkizdi.
- Usynystaryńyzdy qoldaimyn. Biz holdingpen birlesip, oblystaǵy 3 aýysymdy mektepterdi joiýdyń baǵdarlamasyn ázirlemiz. 2025 jylǵa deiin qai eldi mekenderde qansha mektep salamyz, bul sonyń bárin egjei-tegjeili naqtylaityn qujat bolady. Bizde qazir 49 úsh aýysymdy mektep bar. Ásirese, bul másele Almaty mańyndaǵy aýdandarda ózekti bolyp otyr. Biz mektepter salatyn jer ýchaskelerin daiyndaimyz, injenerlik infraqurylym tartyp beremiz, atqarýshy organ tarapynan berilýi tiisti qarjyny bólemiz, al sizder jańa mektep salyp beresizder. Bul bizge úsh aýysymdy mektepterdi joiýda úlken kómek bolady. Sol siiaqty Taldyqorǵan qalasynda tutas turǵyn úi keshenderin salýǵa injenerlik jeliler júrgizilgen daiyn alańdar bar. Jalpy oblys kóleminde júrgiziletin turǵyn úi qurylysyna belsendi qatysyńyzdar, - dedi A. Batalov. Oblys basshysynyń aitýynsha, bul rette "Jetisý" ÁKK" ÓDI" AQ men «BI-Group» holdingi ózara tyǵyz jumys isteitin bolady.
Sol siiaqty tiisti mekeme basshylaryna «BI-Group» kompaniiasy MJÁ mehanizmimen salatyn Talǵar aýdanyndaǵy eki mekteptiń jergilikti organ tarapynan qoldaýǵa tiis qandai qajettilikteri bar, sony anyqtap, ekinshi jartyjyldyqqa usynys berýdi tapsyrdy. Jáne «BI-Group» kompaniiasymen birlesip úsh aýysymdy mektepterdi joiýdyń 2025 jylǵa deiingi baǵdarlamasyn ázirleýdi de mindettedi.
