اباي وبلىسىنىڭ اكىمى بەرىك ءۋالي حورۆاتيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى رەفيك شابانوۆيچپەن كەزدەستى، دەپ حابارلايدى Dalanews.kz
بۇگىندە قازاقستان مەن حورۆاتيا اراسىنداعى ديپلوماتيالىق قارىم-قاتىناستىڭ ورناعانىنا 30 جىلدان استى. سوڭعى جىلدارى تۋريزم، ءبىلىم بەرۋ جانە لوگيستيكا سالالارىندا ارىپتەستىك كەڭەيىپ كەلەدى.
كەزدەسۋ بارىسىندا ەلشى جاقىندا استانادا ۇلكەن بيزنەس فورۋم وتەتىنىن ايتىپ، اباي وبلىسىنىڭ كاسىپكەرلەرىن سول شاراعا قاتىسۋعا شاقىردى. فورۋمعا ەكى ەلدىڭ سالالىق مينيسترلىكتەرى مەن بيزنەس قاۋىمداستىقتارى قاتىسادى دەپ جوسپارلانىپ وتىر.
قۇرمەتتى قوناق حورۆاتيانىڭ كولىك، فارماسيەۆتيكا، ءىت سالاسىندا الەۋەتى زور ەكەنىن اتاپ ءوتىپ، وڭىردە بىرلەسكەن جوبالاردى جۇزەگە اسىرۋ بويىنشا ۇسىنىستارىن جەتكىزدى.
«قازاق ەلىمەن بارلىق سالادا ىنتىماقتاستىعىمىزدى كەڭەيتكىمىز كەلەدى. الماتى قالاسىندا ءبىزدىڭ مەملەكەتتىڭ بىرنەشە فارماسيەۆتيكالىق كومپانياسى بار. سىزدەردىڭ تاراپتان قولداۋ بولسا وسىنداي ءبىر كومپانيانى اباي وبلىسىندا اشقىمىز كەلەدى. باسقا دا سالالاردا بىرلەسە جۇمىس ىستەۋگە دايىنبىز»، - دەدى رەفيك شابانوۆيچ.
ايماق باسشىسى ەلشىگە وڭىرگە ارنايى كەلگەنى ءۇشىن العىس ءبىلدىرىپ، وبلىس اكىمدىگى بارلىق سالادا بىرلەسە جۇمىس ىستەۋگە دايىن ەكەنىن ايتتى.
«قۇرمەتتى ەلشى مىرزا، اباي ەلىنە قوش كەلدىڭىز. ءسىزدىڭ ءبىزدىڭ ەلىمىزدە ۇزاق جىلدار جۇمىس ىستەگەن، ەڭ تاجىريبەلى ەلشى ەكەنىڭىزدى جاقسى بىلەمىن. ەكى ەلدىڭ ساياسي، الەۋمەتتىك، ەكونوميكالىق قارىم-قاتىناسىن نىعايتۋعا قوسىپ جاتقان ۇلەسىڭىز زور. كەزدەسۋدە ايتقان ۇسىنىستارىڭىزدى قۋانا قابىل الامىز. سالالىق باسقارماعا ءتيىستى تاپسىرما بەرەمىن. ءبىزدىڭ وڭىرگە جاڭا جوبالار وتە قاجەت. بىرلەسىپ جۇمىس ىستەۋگە دايىنبىز»، – دەدى وبلىس اكىمى.
