بەرىك ءۋالي اباي وبلىسىنىڭ اكىمى بولىپ تاعايىندالدى، - دەپ حابارلايدى Dalanews.kz.
بەرىك ءۋالي بۇعان دەيىن پرەزيدەنتتىڭ كەڭەسشىسى-باسپاسوز حاتشىسى قىزمەتىن اتقاردى.
«مەملەكەت باسشىسىنىڭ جارلىعىمەن بەرىك ءۋالي اباي وبلىسىنىڭ اكىمى بولىپ تاعايىندالدى، ول بۇرىنعى اتقارعان لاۋازىمىنان بوساتىلدى»، - دەپ جازىلعان اقوردانىڭ حابارلاماسىندا.
بەرىك ءۋالي كىم، بۇعان دەيىن قانداي قىزمەت اتقاردى؟
بەرىك ءۋالي 1977 جىلى سەمەيدە دۇنيەگە كەلگەن. ت.جۇرگەنوۆ اتىنداعى قازاق مەملەكەتتىك تەاتر جانە كينو ينستيتۋتىن «كينوتانۋشى»، ءال-فارابي اتىنداعى قازاق ۇلتتىق ۋنيۆەرسيتەتىن «جۋرناليستيكا» (ماگيستراتۋرا)، سونداي-اق قازاق يننوۆاسيالىق گۋمانيتارلىق-زاڭ ۋنيۆەرسيتەتىن «قۇقىقتانۋ» ماماندىقتارى بويىنشا بىتىرگەن.ەڭبەك جولىن 1997 جىلى «تاڭ» تەلەكومپانياسىندا «الماتى جاڭالىقتارى» اقپاراتتىق باعدارلاماسىنىڭ ءتىلشىسى بولىپ باستاعان.
1998-1999 جىلدارى – «نتك» تەلەارناسىندا «جاڭالىقتار» اقپاراتتىق باعدارلاماسىنىڭ شىعارۋشى رەداكتورى.
2000-2007 جىلدارى – «31 كانال» تەلەراديوكومپانياسىندا» «ينفورمبيۋرو» اقپاراتتىق باعدارلاماسىنىڭ باس رەداكتورى، «ەركىن ءسوز» باعدارلاماسىنىڭ اۆتورى ءارى جۇرگىزۋشىسى، «دودا» ساياسي توك-شوۋىنىڭ باس رەداكتورى ءارى جۇرگىزۋشىسى.
2007-2012 جىلدارى – «حابار» اگەنتتىگى» اق اقپاراتتىق باعدارلامالار ديرەكسياسى جاڭالىقتار قىزمەتىنىڭ ءتىلشىسى، «بەتپە-بەت» اقپاراتتىق-ساراپتامالىق باعدارلاماسىنىڭ جۇرگىزۋشىسى.
2009-2012 جىلدارى – «نۇر وتان» پارتياسى «نۇر-مەديا» ج ش س جەمقورلىققا قارسى مەديا-ورتالىعىنىڭ باسشىسى.
2012-2015 جىلدارى – وڭتۇستىك قازاقستان وبلىسى اكىمى اپپارات باسشىسىنىڭ ورىنباسارى – باسپا ءسوز قىزمەتىنىڭ جەتەكشىسى، ىشكى ساياسات جانە ءدىن ىستەرى باسقارماسىنىڭ باسشىسى.
2015-2016 جىلدارى – «نۇر-وتان» پارتياسى ءتوراعاسى ءبىرىنشى ورىنباسارىنىڭ كەڭەسشىسى.
2016-2018 جىلدارى – قازاقستان رەسپۋبليكاسى ينۆەستيسيالار جانە دامۋ ءمينيسترىنىڭ كەڭەسشىسى، اقپاراتتىق قامتاماسىز ەتۋ دەپارتامەنتىنىڭ ديرەكتورى.
2017-2018 جىلدارى – «قازاقستان» ۇلتتىق تەلەارناسى «1-ستۋديا» قوعامدىق-ساياسي توك-شوۋىنىڭ جۇرگىزۋشىسى.
2018-2019 جىلدارى – جامبىل وبلىسى اكىمدىگى ىشكى ساياسات باسقارماسىنىڭ باسشىسى.
2019-2022 جىلدارى – قازاقستان رەسپۋبليكاسى پرەزيدەنتىنىڭ باسپا ءسوز حاتشىسى.
2022-2023 جىلدارى – «حابار» اگەنتتىگى» اق باسقارما ءتوراعاسى قىزمەتتەرىن اتقاردى.
2023 جىلعى 12 قىركۇيەكتە مەملەكەت باسشىسىنىڭ وكىمىمەن قازاقستان رەسپۋبليكاسى پرەزيدەنتىنىڭ كەڭەسشىسى – پرەزيدەنتتىڭ باسپا ءسوز حاتشىسى لاۋازىمىنا تاعايىندالدى.
ول - «دارىن» مەملەكەتتىك جاستار سىيلىعىنىڭ (2011)، «پاراسات» (2024)، «قۇرمەت» (2019) وردەندەرىنىڭ، ق ر پرەزيدەنتى العىسىنىڭ (2021)، ق ر پرەزيدەنتى اكىمشىلىگىنىڭ «ءمىنسىز قىزمەتى ءۇشىن» توسبەلگىسىنىڭ (2022) جانە 5 مەرەكەلىك مەدال يەگەرى.
"پرەزيدەنتتىڭ كەز كەلگەن تاپسىرماسى ەلىمىز ءۇشىن اسا ماڭىزدى"
جۋىردا بەرىك ءۋالي «ايقىن» گازەتىنە كولەمدى سۇحبات بەرىپ، پرەزيدەنتتىڭ كەز كەلگەن تاپسىرماسى مەن باستاماسى ەلىمىزدىڭ دامۋى ءۇشىن اسا ماڭىزدى ەكەنىن ايتقان ەدى.
«پرەزيدەنتتىڭ كەز كەلگەن تاپسىرماسى مەن باستاماسى ەلىمىزدىڭ دامۋى ءۇشىن اسا ماڭىزدى. قاسىم-جومارت كەمەل ۇلى ساياساتتاعى ۇتقىرلىقتى الەۋمەتتىك-ەكونوميكالىق دامۋداعى ناقتى قادامدارمەن ۇيلەستىرۋدى ءجون سانايدى. ياعني، تۇبەگەيلى وزگەرىستەرگە جول اشقان رەفورمالاردىڭ ورىندالۋى ەلىمىزدىڭ ءال-اۋقاتىنان دا كورىنىس تابۋعا ءتيىس. وسى رەتتە ءبىر جىل بۇرىن جاڭادان جاساقتالعان ۇكىمەتكە وتە ۇلكەن جاۋاپكەرشىلىك جۇكتەلىپ وتىر. ويتكەنى پرەزيدەنءتىمىز ايتقانداي، قازىرگى كەزەڭ جاھان جۇرتشىلىعىنا جەڭىل ءتيىپ وتىرعان جوق. ءىرى دەرجاۆالار اراسىنداعى ءارءتۇرلى تەكەتىرەس، سونىڭ ىشىندە ەكونوميكالىق سانكسيالار ساياساتىن كۇشەيتۋ، ءار جەردە مازداعان كيكىلجىڭدەر مەن بەيبىت تۇرعىنداردىڭ مازاسىن قاشىرعان قارۋلى قاقتىعىستار بۇگىندە الەم ەلدەرىن قاتتى الاڭداتادى.
سونداي-اق سوڭعى جىلدارى كليماتتىق وزگەرىستەر دە انىق بايقالا باستادى. تەحنولوگيالىق جارىس ناتيجەلەرى بۇرىن-سوڭدى بولماعان باسەكەلەستىك تۋدىردى. مىنە، وسى ىسپەتتى سىن-قاتەرلەر ەلىمىزدى بارلىق سالادا بەتپە-بەت كەلەتىن كۇردەلى كۇرمەۋلەردى دەر كەزىندە، ءتىپءتى الدىن الا شەشىپ وتىرۋعا مىندەتتەيدى. شيىرىپ ايتقاندا، كورپەگە قاراي كوسىلەتىن ۋاقىت كەلءدى. مەملەكەت باسشىسى بيۋدجەت قاراجاتىن وڭتايلى جۇمساۋ، مەملەكەتتىك قۇرىلىمنىڭ ءتيىمدىلىگىن ارتتىرۋ، ارتىق شىعىندى بولدىرماۋعا باسا ءمان بەرۋ كەرەگىن قاداپ ايتتى. پرەزيدەنت بايانداماسىنىڭ نەگىزگى جۇلگەسى وسىعان سايادى»، — دەدى بەرىك ءۋالي بۇعان دەيىنگى سۇحباتىندا.
