بەلسەندى مارعۇلان بورانباي بوستاندىققا شىقتى، – دەپ حابارلايدى Dalanews.kz.
بۇل تۋرالى ءماجىلىس دەپۋتاتى ەرمۇرات باپي مالىمدەدى.
"ەلدىڭ ەگەمەندىگىنە، قازاقتىڭ نامىسىنا اراشا تۇسەمىن دەپ، سوتتى بولعان مارعۇلان باۋىر بورانباي ءتورت جىلدان سوڭ تۇرمەدەن شىعىپ، اعاسىنا امانداسۋعا كەلىپتى. وتكەن كۇزدە سەرىكجان ەكەۋىمىز كولونياعا، مارعۇلان مارقاسقاعا بارعانىمىزدا: "ۋدو"-عا شىعۋعا كومەكتەسەيىك..." دەپ ەدىك. "ەشكىمنەن كەشىرىم سۇرايتىنداي كىنام جوق، وتسيجۋ وت زۆونكا دو زۆونكا" دەگەن-دى سوندا قازاقتىڭ نامىسىن شوۆەنيست-ۆاتنيكتەردەن قورعايمىن دەپ، ناقاق جالامەن اباقتىعا قامالعان مىنەزدى مارعۇلان. "قازاقتىڭ ناعىز ۇلتشىل پاتريوتى كىم؟" دەپ الدەكىم سۇراي قالسا، ويلانباستان وسى وعىلاندى اتاڭىزدار! ەشقاشان قاتەلەسپەيسىز، مارعۇلان ءسىزدى قاتەلەستىرمەيدى! كامىل سەنەمىن! امان بول، التىن باۋىرىم!" - دەپ جازدى ول.
ايتا كەتەيىك، مارعۇلان بورانباي بەس جىل بۇرىن قاماۋعا الىنىپ، 2022 جىلى الماتى قالاسىنىڭ المالى اۋداندىق سوتىنىڭ ۇكىمىمەن 5 جىل 2 ايعا باس بوستاندىعىنان ايىرىلدى.
ول قازاقستان رەسپۋبليكاسىنىڭ قىلمىستىق كودەكسىنىڭ 174-بابىنىڭ 2-بولىگى ("ۇلتارالىق ارازدىقتى قوزدىرۋ") جانە 179-بابىنىڭ 2-بولىگى ("بيلىكتى كۇشپەن باسىپ الۋعا شاقىرۋ") بويىنشا كىنالى دەپ تانىلعان بولاتىن.
مارعۇلان بورانبايدىڭ ايىپتالۋىنا الەۋمەتتىك جەلىلەردەگى جازبالارى سەبەپ بولعان. ول رەسەيلىك ساياساتكەرلەردىڭ قازاقستانعا قاتىستى مالىمدەمەلەرىنە قارسى پىكىر ءبىلدىرىپ، رەسەيدىڭ ۋكرايناعا باسىپ كىرۋىن سىنعا العان.
