الماتى وبلىسى ۇيعىر اۋدانى شونجى اۋىلىندا قازاقستاننىڭ ەڭبەك سىڭىرگەن قايراتكەرى، “قۇرمەت” وردەنىنىڭ يەگەرى، الماتى وبلىسىنىڭ قۇرمەتتى ازاماتى، تەاتر جانە كينو اكتەرى بەكجان تۇرىستىڭ 60 جاس مەرەيتويىنا ارنالعان “ونەر – تاۋەكەلى جەتكەننىڭ تۇعىرى” اتتى ادەبي-سازدى كەشى ءوتىپ جاتىر، دەپ حابارلايدى Dalanews.kz.
مەرەيتوي باعدارلاماسى المەرەك جانشىق ۇلىنىڭ ەسكەرتكىشىنە گۇل شوعىن قويۋ راسىمىنەن باستالدى. سونداي-اق اۋداندىق مادەنيەت ۇيىندە مەرەيتوي يەسىنىڭ شىعارماشىلىعىنا ارنالعان فوتوكورمە ۇيىمداستىرىلدى.
كەش بارىسىندا بەكجان تۇرىس ويناعان سپەكتاكلدەردەن ۇزىندىلەر ساحنالانىپ، قازاقستان ەستراداسىنىڭ جۇلدىزدارى ءان شىرقاماق. سونىمەن قاتار م. اۋەزوۆ اتىنداعى قازاق ۇلتتىق دراما تەاترىنىڭ اكتەرلەرى “بەس بويداققا ءبىر توي” سپەكتاكلىن قويادى.
سالتاناتتى شارادا م.اۋەزوۆ اتىنداعى قازاق ۇلتتىق دراما تەاترىنىڭ ارتىستەرى، مادەنيەت جانە قوعام قايراتكەرلەرى توبە كورسەتتى. ولاردىڭ قاتارىندا ءماجىلىس دەپۋتاتى جاناربەك ءاشىمجان، الماتى وبلىستىق مادەنيەت باسقارماسىنىڭ باسشىسى دانيار الدييەۆ، ۇيعىر اۋدانىنىڭ اكىمى بوتا ەلەۋسىزوۆا، م.اۋەزوۆ تەاترىنىڭ ديرەكتورى ەركىن جۋاسبەكوۆ، ق ر مەملەكەتتىك سىيلىعىنىڭ يەگەرى، اقىن نۇرلان ورازالين،ق ر ەڭبەك سىڭىرگەن قايراتكەرى، رەجيسسەر اۋباكىر راحيموۆ، الماتى وبلىسىنىڭ قۇرمەتتى ازاماتى ىزعاربەك بەكتۇرسىنوۆ،قوعام قايراتكەرى باۋىرجان قاپتاعايەۆ، سونداي-اق اكتەردىڭ ۇستازدارى مەن شاكىرتتەرى بار.
مەرەيتوي يەسىنە دەگەن ەل قۇرمەتى ەرەكشە بولدى. اۋدان حالقى ات مىنگىزسە، ارىپتەستەرى مەن باۋىرلارى، كاسىپكەرلەر جاڭا كولىك سىيلادى.
بەلگىلى تەاتر سىنشىسى ءاليا بوپەجانوۆا بەكجان تۇرىستىڭ شىعارماشىلىعىنا جوعارى باعا بەرىپ، ونىڭ ساحناداعى دارا قولتاڭباسى مەن اكتەرلىك شەبەرلىگىن ەرەكشە اتاپ ءوتتى.
“جالپى اكتەردىڭ كەيىپكەرلەرىنىڭ جان دۇنيەسىنە ەنۋ، بولمىسىن يگەرۋ تاجىريبەلەرى قىزعىلىقتى. اتاپ ايتارلىعى - ول دەتالدارعا ەرەكشە ءمان بەرەدى. سوندىقتان دا ونىڭ ەكىنشى پلانداعى، ءتىپتى ەپيزودتىق كەيىپكەرلەرىنىڭ ءوزى تولىققاندى، جاندى شىعىپ، كورەرمەن كوكەيىندە جاتتالىپ قالادى. مىسالى، «ابايدىڭ» كەيىنگى قويىلىمىندا (رەجيسسەر ە. وبايەۆ) جيرەنشەنىڭ ايدار مەن اجار اراسىنداعى سۇيىسپەنشىلىككە بايلانىستى داۋعا بيلىك ايتاتىن ساحناسىن ەسكە تۇسىرەلىك. قازاقتا بي بىتكەن شەشەن. دەگەنمەن دە بەكجان-جيرەنشەنىڭ دەستەلەتىپ سويلەۋى، ءسوز ساپتاۋى قانداي! ءوزى سىر بەرمەگەنسىگەنمەن، ابدەن قانسورپاسى شىققانىن ەتەكتەي قول ورامالىمەن بەت-موينىنىڭ تەرىن بيپازداپ سۇرتە بەرگەنىنەن، ەڭ سوڭىندا ورامالدى جەلكەسىنە سالىپ العانىنان سەزەسىز. بىتىسپەس جاۋلىققا بەت العان ورازبايلار توبىنىڭ بەلدى وكىلى جيرەنشە وسال جاۋ ەمەس، ءوز ۋاقىتىنىڭ، ورتاسىنىڭ مىقتىلارىنىڭ ءبىرى. اكتەر ويىنى وسىنى تانىتادى. ءالي اپايدىڭ بۇل ءسوزىن وزدەرىڭىزدەي قالىڭ كورەرمەننىڭ اتىنان بەرىلگەن باعا دەپ قابىلداڭىزدار. اكتەر دا تەاتر ونەرى دە جاساي بەرسىن!”، – دەپ باعالادى.
ونەردەگى ارىپتەسى تۇڭعىشباي جامانقۇلوۆ تا اكتەردىڭ كاسىبي بيىگى مەن ادامدىق بولمىسى تۋرالى ءسوز قوزعادى.
“ادالىن ايتۋ كەرەك، كەيدە رەجيسسۋرا دا بەكجاننىڭ سۋرەتكەرلىك تىنىس-تابيعاتىنا، ورە-قارىمىنا ساي كەلە بەرمەيدى. بەكجاننىڭ كەيدە قويۋشى-رەجيسسەردىڭ قيال-شەشىمىنەن وزا شاباتىنى بار. نەگىزىندە بەكجان تۇرىس - ۇلتجاندى، قازاقى جۇرەگى قانشىل، ءومىر مەن ونەرگە ءۇستىرت قارامايتىن ويلى ازامات. ءسوز ساپتاۋدا ارزان ءسوز ايتپايتىن شەشەن”، – دەدى ول.
جازۋشى زەينەپ احمەتوۆا ونەر يەسىنىڭ قويىلىمدارىنا توقتالدى.
“بەكجاننىڭ بىرنەشە قويىلىمىنا باردىم. ءشامشىسى ەرەكشە. ويتكەنى ول ءشامشى اندەرىن ءوزى ورىندايتىن مىقتى ءانشى عوي. بەكجاندا شىنايىلىق باسىم-دەپ اعىنان جارىلا ايتقان ەدى. سوندىقتان وسى ارادا قازاقستاننىڭ حالىق جازۋشىسى، دراماتۋرگ يسرايىل ساپاربايدىڭ “سىعان سەرەناداسى” قويىلىمىنداعى ءشامشى بەينەسىنە زەر سالايىقشى”، — دەدى ول.
