«تۇنگى 11-لەردە اۋقاتتانعىمىز كەلىپ ءقوناقۇيدىڭ ءدامحاناسىنا باس سۇقتىق. جابىلىپ قالىپتى. تەك 22.00-گە دەيىن ىستەيمىز دەيدى. تالاپ سونداي.
شاعىن جانە ورتا بيزنەستىڭ جۇمىسىن باقانداي ءبىر ساعاتقا قىسقارتقاننىڭ كەسىرىنەن (23:00-دەن 22:00-گە دەيىن) الماتى بيۋدجەتى اي سايىن 7-8 ملرد سالىقتان قاعىلىپ وتىر.
– دەيدى كاسىپكەر.
بوقايەۆتىڭ اتاپ وتكەنىندەي الماتى بيۋدجەتىنىڭ 64 پايىزى شاعىن-ورتا بيزنەستىڭ سالىعىنان قۇرالادى. بۇل، نەگىزىنەن، ساۋدا-ساتتىق، ويىن-ساۋىق جانە قىزمەت كورسەتۋ سالاسى. ءبىر جىلدا شاعىن-ورتا بيزنەس قالا بيۋدجەتىنە 1،8 ترلن تەڭگەدەن باستاپ سالىق تولەيدى ەكەن.
"مۇنى الدىمەن 365 كۇنگە، ارتىنشا 12 ساعاتتىق جۇمىس كۇنىنە ءبولىڭىز. شامالاپ العاندا، الماتى بيۋدجەتىنە كەشكى ۋاقىتتىڭ ءبىر ساعاتىندا 250 ملن تەڭگە سالىق ءتۇسۋى ءتيىس. بۇل سوما ايىنا 7-8 ملرد تەڭگەنى قۇرايدى.
مۇنىڭ ەسەپ-قيسابىن ءبىز ەمەس، ۇلتتىق ەكونوميكا ءمينيسترى مەن الماتى اكىمى جاساۋعا ءتيىستى ەدى.
مەمكىرىس دەپارتامەنتى مەن كاسىپكەرلىك باسقارماسى شاعىن جانە ورتا بيزنەسكە شىن جانى اشىسا قالانىڭ باس سانيتارى بەكشين الدارىنا شاقىرىپ، كوممەرسيالىق نىسانداردىڭ جۇمىس ۋاقىتى نەلىكتەن شەكتەلىپ وتىرعانىن نەگىزدەپ بەرۋدى تالاپ ەتۋى قاجەت.
ەگەر وتكەن جولعىداي "ناكونەس-تو" دەپ ءدويدالاعا لاعىپ كەتسە، ساعىنتايەۆ ءسوزبۇيداعا سالماي بەكشيندى ورنىنان الۋى ءتيىس! بەكشين بۇل قالادان قاراسىن باتىرسىن"، – دەيدى بوقايەۆ.
كاسىپكەردىڭ پىكىرىنشە بيزنەستىڭ تىنىسىن تارىلتىپ، قالاداعى كوممەرسيالىق بەلسەندىلىكتى جاساندى جولمەن بۋىندىرۋعا بولمايدى. ءدال ءقازىر بۇعان اسا ءبىر قاجەتتىلىك جوق.
بەكشيننىڭ كەسىرىنەن شوب بانكروت بولادى. بوقايەۆتىڭ ايتۋىنشا بەكشيننىڭ كارانتيندى شەكتەۋگە قاتىستى شەشىمدەرى ساۋاتسىز.
"الماتىداعى اۋزى-مۇرنىنان شىققان اۆتوبۋستاردى قاراڭىز. حالىقتىڭ ءنوپىرىن كورسەڭىز، شوشيسىز. قيسىنسىز ەمەس پە؟ قوعامدىق كولىككە حالىقتى لىق تولتىرىپ الاسىزدار دا، قاۋىپسىزدىكتى قامتاماسىز ەتە الاتىن كوممەرسيالىق نىسانداردى جاۋىپ تاستايسىزدار. وسى اقىلعا سيا ما؟
كوروناۆيرۋسقا قاتىستى مالىمەت تاراتاتىن سايتتى ءسۇزىپ شىقتىم. "ىندەت تۇنگى ساعات 22:00-دەن كوشە كەزەدى" دەگەن تۇجىرىمدى كەزدەستىرمەدىم.
سايىپ كەلگەندە، مۇنىڭ ءبارىن ساعىنتايەۆ پەن بەكشين بىلىقتىرىپ وتىر. ولار قابىلداعان شەشىمنىڭ نەگىزى جوق، ايتەۋىر "تيسە تەرەككە، تيمەسە بۇتاققا" دەگەننىڭ كەرى"، – دەيدى.
بوقايەۆتىڭ ايتۋىنشا جۇمىستان قايتقان جۇرت اعايىن-تۋىس، جورا-جولداسىمەن كەزدەسۋدى كەشكى جەتى مەن تۇنگى وننىڭ ارالىعىندا جوسپارلاۋعا ءماجبۇر. سودان بولار الگى ۋاقىتتا ءدامحانالاردا ادام اينالار ورىن جوق. ەلدىڭ ءبارى وسى ۋاقىتقا ۇلگەرۋگە تىرىسادى. ال مۇنداي جاعدايدا ىندەت اۋا جايىلىپ، ادامنان ادامعا جۇعۋى مۇمكىن.
"الماتى اكىمى مەن قالانىڭ باس سانيتارى وسىنى ەسكەردى ما؟ بيلىك بارلىق بيزنەس نىسانداردىڭ جۇمىس ۋاقىتىن ۇزارتۋى قاجەت. بۇلار عانا ەمەس، قوعامدىق كولىك قوزعالىسى، حالىققا قىزمەت كورسەتۋ ورتالىقتارى، الەۋمەتتىك ماڭىزى بار نىساندارعا تۇنگى ۋاقىتتا جۇمىس ىستەۋگە مۇمكىندىك بەرۋ كەرەك. ءسويتىپ جۇمىس-شارۋاسىن شەشكىسى كەلەتىن حالىقتىڭ ءنوپىرىن ازايتۋعا بولادى. ءبىراق بۇعان قۇلاق تۇرەر بيلىك بار ما؟
كەرىسىنشە، سايلاۋدىڭ قارساڭىندا كارانتيندى كۇشەيتە ءتۇسۋى عاجاپ ەمەس، ءسويتىپ جەكە كاسىپكەرلەردىڭ تۇبىنە جەتىپ تىنباق"، – دەيدى بوقايەۆ.
ازىرلەگەن، دۋمان بىقاي
