بۇل – كٶپتٸڭ كٶكەيٸندەگٸ سۇراق. الماتى قالاسىنىڭ مەملەكەتتٸك باس سانيتار دەرٸگەرٸ جانداربەك بەكشين وسى ساۋالدارعا جاۋاپ بەردٸ, دەپ حابارلايدى Almaty.tv تٸلشٸسٸ.
ەلەمدەگٸ احۋالعا قاراساق, شەكتەۋ شارالارىن العان مەملەكەتتەردە ەپيدەميولوگييالىق جاعداي قايتا ناشارلاپ جاتىر. ٸندەت ٶرشٸپ كەتتٸ. وسى تۇستا بالالارعا جۇعۋ قاۋپٸ جوعارى دەيدٸ اق حالاتتىلار. "ارنايى سۇحبات" باعدارلاماسىندا الماتى قالاسىنىڭ مەملەكەتتٸك باس سانيتار دەرٸگەرٸ جانداربەك بەكشين "بالاباقشالاردى دەل قازٸر اشۋ ەرتە" دەدٸ.
"بالاباقشالاردى اشۋ مەسەلەسٸنە كەلسەك, قازٸرگٸ ۋاقىتتا كەزەكشٸ توپتار اشۋ جاعى قاراستىرىلۋدا. سوندىقتان بۇل مەسەلە ەلٸ شەشٸلگەن جوق. باس سانيتارلىق دەرٸگەردٸڭ قاۋلىسىنا ەنگٸزٸلگەن جوق", - دەدٸ الماتى قالاسىنىڭ مەملەكەتتٸك باس سانيتار دەرٸگەرٸ جانداربەك بەكشين.
قاۋلىعا ەنگٸزٸلٸمەگەنٸ تٷسٸنٸكتٸ. ٶيتكەنٸ, مەكتەپكە دەيٸنگٸ مەكەمە – اۋرۋ تەز تارالاتىن جەر. وندا بالالاردىڭ بولۋى جاعدايدى تٸپتەن ۋشىقتىرادى. سوندىقتان قالانىڭ باس سانيتارى شەشٸم قابىلداۋعا اسىقپاعان ابزال ەكەنٸن ەسكەرتتٸ. بٸراز اتا-انا بۇعان تٷسٸنٸستٸكپەن قارايتىندارىن جەتكٸزدٸ. تەۋەكەلگە بارماي, بٶبەكتەردٸ ٶزدەرٸ نەمەسە اتا-ەجەلەرٸنە اپارىپ, جۇمىسقا شىعۋىنا بولاتىنىن ايتادى.
"بالالار اۋىرسا, بٸزگە اۋىر تيەدٸ. سوندىقتان بالالاردىڭ ٷيدە وتىرعانى دۇرىس دەپ ەسەپتەيمٸن. قازٸر اتا-انالاردىڭ كٶبٸ جۇمىسسىز وتىرعاندىقتان, بالالارىن ٶزدەرٸ باعا الادى. نەمەسە اتا-ەجەلەرٸنٸڭ قولىنا اپارىپ بەرسە بولادى. قازٸر بالالاردىڭ ٷلكەندەرٸ دە ساباقتى مەكتەپتە وقىمايدى عوي, ٷيدە وقىپ جاتقاندىقتان ولار كٸشكەنتايلارىنا قارايلايدى دەگەن ٷمٸتتەمٸز", - دەدٸ اقمارال توقاباەۆا.
"بالا-شاعامىز ٷيدە. قازٸر ٷلكەن بالام 14-تە, قالعان ٷشەۋٸنە سول قاراپ وتىر. بٸز كەلٸنشەگٸم ەكەۋمٸز جۇمىستامىز", - دەيدٸ تۇرعىن جالعاس دەۋلەتباەۆ.
قالانىڭ باس سانيتار دەرٸگەرٸ قالا تۇرعىندارىنا تٶتەنشە جاعداي اياقتالعانىمەن, كارانتين كٷشٸن جويماعانىن تاعى دا ەسكەرتتٸ. سوندىقتان ادام كٶپ جينالاتىن جەرلەرگە بارماۋعا كەڭەس بەردٸ. جۇمىستارىن قايتا باستاعان كەسٸپورىندار مەن سەن سالوندارى دا سانيتارلىق تالاپتاردى قاتاڭ ساقتاۋى كەرەك. جانداربەك بەكشين بوساڭسۋعا بولمايتىنىن ايتتى. جۇدىرىقتاي جۇمىلساق قانا قاۋٸپتٸ ٸندەتتەن تەز قۇتىلاتىنىمىزدى قاپەردە ۇستايىق.
