بۇگىن ءماجىلىستىڭ جالپى وتىرىسىندا دەپۋتات بەكبولات تىلەۋحان ءسوز الىپ، مەملەكەتتىك تىلدە سويلەمەيتىن قازاق ارىپتەستەرىنە ءوتىنىش ايتتى.
"سىزدەر دۇرىس تۇسىنىڭىزدەرشى. دەپۋتاتتىق ەتيكاعا قايشى كەلەتىن ءسوز ايتىپ جاتقان جوقپىن. سىزدەردى تۇزەپ تە جاتقانىم جوق. تەك ءبىر ءوتىنىشىم بار. بۇل قازاق ءتىلىنىڭ ماسەلەسى. مەملەكەتتىك ءتىل دەپۋتاتتىق ساۋال بەرۋ رولىنەن ايىرىلعان سياقتى كۇي كەلتىرەدى. وتكەندە التى-جەتى دەپۋتاتتىق ساۋال بولدى، بىرەۋى دە قازاقشا ايتىلعان جوق. بۇگىنگى التى ساۋالدىڭ بەسەۋى دە مەملەكەتتىك ءتىلدى قاجەتسىنگەن جوق. بۇل جەردە ەلباسىنىڭ "قازاق قازاقپەن قازاقشا سويلەسسىن" دەيتىن ءسوزى ويعا ورالادى. مىنا، قازاق دەپۋتاتتار، سىزدەر قازاقشا ايتۋعا بولاتىن ەدى عوي"، - دەپ اشىندى تىلەۋحان.
ماجىلىسمەن دەپۋتاتتىق ساۋال تابان استىندا ايتىلا سالاتىن دۇنيە ەمەس ەكەنىن، وعان ۇلكەن دايىندىق پەن تەرەڭ زەرتتەۋ جاسالاتىنىن اتاپ ءوتتى. كومەكشىلەر مەن اۋدارما بولىمىنە جۇگىنۋگە بولاتىنىن ەسكە سالدى.
"تۇرلەرىڭىز قازاق، ال اۋىزدارىڭىزدان بىردە ءبىر ءسوز مەملەكەتتىك تىلدە شىعىپ جاتقان جوق. جالپى، قازاق ءتىلىنىڭ قازاقستان رەسپۋبليكاسىنان باسقا بارار جەرى، باسار تاۋى جوق. ول ەگەر پارلامەنت قابىرعاسىندا وگەيدىڭ كۇيىن كەشسە، باسقا جەردە كۇيى نە بولماق. سىزدەر ايىپ ەتپەڭىزدەر، قۇرمەتتى ارىپتەستەر. قالاي بولادى سوندا؟ قازاق ەمەس، قازاقشا سويلەي المايتىن ادامداردى ەشكىم قينامايدى. ال سىزدەردىڭ مۇمكىندىكتەرىڭىز بار عوي"، - دەپ قاپالاندى دەپۋتات.
بەكبولات تىلەۋحان ارىپتەستەرىنەن مۇنى دۇرىس ءتۇسىنۋدى ءوتىندى.
"مەن سىزدەردى قورلايىن دەپ جاتقان جوقپىن. باياعىدا بىرەۋ "قارنىمنىڭ اشقانىنان ەمەس، ءقادىرىمنىڭ قاشقانىنان جىلايمىن دەپتى عوي". مەنىكى دە سول"، دەپ تۇيىندەدى ءسوزىن ماجىلىسمەن.
