وڭىردە ەگىس ناۋقانىنا دايىندىق جوسپارلى تۇردە جۇرگىزىلىپ جاتىر. اۋىل شارۋاشىلىعى داقىلدارىن 612،7 مىڭ گەكتار القاپقا ەگۋ كوزدەلگەن، دەپ حابارلايدى Dalanews.kz

ەگىس القاپتارىنىڭ نەگىزگى بولىگىن ءداندى داقىلدار الادى — 290،6 مىڭ گەكتار. مايلى داقىلدار 118،9 مىڭ گەكتارعا، كارتوپ، كوكونىس جانە باقشا داقىلدارى 4،2 مىڭ گەكتارعا ەگىلەدى. جەم-شوپ داقىلدارى 199 مىڭ گەكتاردى قۇرايدى.

2024 جىلدىڭ كۇزىنە قاراي ەگىس جۇمىستارىنا دايىندىق اياسىندا 91،5 مىڭ گەكتار القاپقا كۇزدىك ءداندى داقىلدار ەگىلگەن. ونىڭ ىشىندە 83،9 مىڭ گەكتارعا كۇزدىك بيداي، 6،7 مىڭ گەكتارعا قارا بيداي جانە 0،9 مىڭ گەكتارعا تريتيكالە سەبىلگەن.

كوكتەمگى دالا جۇمىستارىن جۇرگىزۋ ءۇشىن 29،4 مىڭ توننا تۇقىم قاجەت. وبلىس قاجەتتى تۇقىممەن تولىق قامتاماسىز ەتىلگەن، ولار زەرتحانالىق تەكسەرىستەن ءوتىپ، ەگۋگە جارامدى جاعدايعا كەلتىرىلگەن.

ەگىس ناۋقانىن ءساتتى جۇرگىزۋ ءۇشىن 8،4 مىڭ توننا ديزەل وتىنى ءبولىندى. اۋىل شارۋاشىلىعى جۇمىستارىنا 3 136 تراكتور، 2 097 تۇقىم سەپكىش، 646 كۋلتيۆاتور جانە باسقا دا ارنايى تەحنيكا تارتىلاتىن بولادى.

مەملەكەت باسشىسىنىڭ اۋىل شارۋاشىلىعى ونىمدەرىن 2 ەسە ارتتىرۋ تاپسىرماسىن ورىنداۋ اياسىندا وڭىردە عىلىمي نەگىزدەلگەن نورمالارعا سايكەس مينەرالدى تىڭايتقىشتاردى ەنگىزۋ كولەمىن ارتتىرۋ جوسپارلانعان. 2025 جىلى وبلىس اگرارشىلارى جوعارى ءونىم الۋ ءۇشىن 8 500 توننا تىڭايتقىش ساتىپ الادى.

كوكتەمگى ەگىس جۇمىستارىنا دايىندىق پەن ولاردىڭ وتكىزىلۋى بارلىق جوسپارعا ساي قاتاڭ تۇردە جۇرگىزىلۋدە. بۇل اگرارلىق ماۋسىمنىڭ ءساتتى باستالۋىنا جانە اۋىل شارۋاشىلىعى ءوندىرىسىن ارتتىرۋعا قاجەتتى جاعدايلاردى جاساۋعا مۇمكىندىك بەرەدى.