«كٶپ بالالى انالار ٷكٸمەتتەن بٸرنەشە ميلليون تەڭگە جەردەماقى الادى...» دەگەن ەڭبەك جەنە حالىقتى ەلەۋمەتتٸك قورعاۋ مينيسترٸ.
«بٸزدەن باسقا بٸردە-بٸر ەلدە مۇنداي ٷردٸس جوق...» – دەپ تۇزدىقتاعانى تاعى بار.
شىنىمەن سولاي ما ٶزٸ? بٸزدەن ٶزگە ەلدەردٸڭ بارلىعى انا مەن بالا تاعدىرىنا بەيجاي قارايدى دەگەندٸ بٸلدٸرە مە, بۇل?
مەسەلەن, باتىس ەلدەرٸندە انا مەن بالاعا تٶلەنەتٸن جەردەماقىنىڭ كٶلەمٸ قانشا? شايلىعىنا, جايلىعىنا جەتەرلٸك پە? بٸزبەن سالىستىرۋعا بولا ما, بۇلاردى?
ينتەرنەتتٸ اقتارىپ, مىناداي بٸر قىزىقتى دەرەك تاپتىق. مينيستر ەبٸلقاسىموۆا وقىسا ارتىق ەتپەس ەدٸ مۇنى.
ۇلىبريتانييادا
بٸر بالاعا بەرٸلەتٸن جەردەماقى اپتاسىنا 20,70 فۋنتتى قۇرايدى.
بۇدان كەيٸن دٷنيە ەسٸگٸن ەر بالاعا ەلگٸ اقشانىڭ ٷستٸنەن تاعى 13,70 فۋنت قوسادى ٷكٸمەت. بالا 16-عا تولعانشا جەردەماقى الادى, وقۋىن اياقتاماعان جاعدايدا جەردەماقى تٶلەنە بەرەدٸ.
يرلاندييادا
بالا 16-عا تولعانشا (ال كەيبٸر تالاپتاردى ساقتاعان جاعدايدا 18-گە دەيٸن) ايىنا 140 ەۆرو جەردەماقى تٶلەنەدٸ.
2 بالاسى بارعا – 280 ەۋرو, 3 بالاسى بارعا – 420, 4 بالاسى بارعا – 560, 5 بالاسى بارعا – 700, 6 بالاسى بارعا – 840, 7 بالاسى بارعا – 980, ال 8 بالاسى بارعا 1120 ەۋرو جەردەماقى بەرەدٸ ەكەن ٷكٸمەت.
اۆسترييادا
جەردەماقى بالانىڭ جاسىنا قاراي ٶزگەرٸپ وتىرادى. تۋعاننان ٷش جاسقا دەيٸن ايىنا 111,80 ەۋرو تٶلەيدٸ ٷكٸمەت.
ٷش جاستان ون جاسقا دەيٸنگٸ ارالىقتا – 119,60, ون جاستان ون توعىزعا دەيٸن – 138,80, وقۋىن جالعاستىرعان بولسا ون توعىزدان جيىرما تٶرتكە دەيٸن 162 ەۋرو جەردەماقى الادى. ٷيدەگٸ بالا سانى بٸرەۋدەن كٶپ بولسا, مۇنىڭ ٷستٸنەن ٷستەماقى قوسىلادى.
شۆەيتسارييادا
بالا 16-عا تولعانشا ورتا ەسەپپەن 200 فرانك (183 ەۋرو) جەردەماقى الادى بۇل ەلدە. وقۋىن ەرٸ قاراي دا جالعاستىرعان بولسا 16-دان 25-كە تولعانعا دەيٸن 250 فرانكتان كەم المايدى.
گەرمانييادا
العاشقى ەكٸ بالانىڭ ەرقايسىسىنا اي سايىن 190 ەۋرودان تٶلەيدٸ ٷكٸمەت. ٷشٸنشٸسٸنە – 196, تٶرتٸنشٸسٸنە 221 ەۋرو جەردەماقى بەرٸلەدٸ. بالا 18-گە تولعانشا جەردەماقى الادى. بەلگٸلٸ بٸر تالاپتارعا ساي 25 جاسقا دەيٸن دە جەردەماقى تٶلەنەدٸ بۇل ەلدە.
بۇل ەل – باقۋاتتى ەل. اتا-انالارى بالاعا تيەسٸلٸ اقشاعا تيمەي, بانكتە ساقتاپ, 18-گە تولعاندا قولىنا بەرەدٸ ەكەن.
شۆەتسييادا
اتا-اناسى بالا 16-عا تولعانشا ٷكٸمەت اي سايىن 109 ەۋرو الىپ وتىرادى.
بۇل ەل دە – باي. ەكە-شەشەسٸ جىلدار بويى جيناعان جەردەماقىنى شەتٸن كەرتپەگەن كٷيٸ بالاسى كەمەلەتكە تولعاندا قولىنا ۇستاتاتىن كٶرٸنەدٸ.
نورۆەگييادا
بالا 18-گە تولعانشا ٷكٸمەت اي سايىن 105 ەۋرو جەردەماقى بەرەدٸ وعان. بەلگٸلٸ بٸر تالاپتاردى ساقتاعان جاعدايدا جەردەماقى تٶلەۋ ۋاقىتىن تاعى 3 جىلعا سوزدىرۋعا بولادى.
فينلياندييا
بالا 17-گە تولعانشا اي سايىن 94,88 ەۋرو الادى ٷكٸمەتتەن. كەيٸنگٸ تۋعان ەر بالاعا تٶلەنەتٸن جەردەماقىنىڭ كٶلەمٸ ٶسكەن ٷستٸنە ٶسە تٷسەدٸ. بەسٸنشٸ بالاعا بەرٸلەتٸن جەردەماقى – 172,69 ەۋرونى قۇرايدى بۇل ەلدە.
بٸزدە...
سەبي 1 جاسقا تولىق تولعانعا دەيiن ونىڭ كٷتiمiنە بايلانىستى تاعايىندالاتىن اي سايىنعى مەملەكەتتٸك جەردەماقى (جۇمىس ٸستەمەيتٸن ەيەلدەرگە):
بٸرٸنشٸ بالاعا – 5,76 اەك نەمەسە 13 853 تەڭگە;
ەكٸنشٸ بالاعا – 6,81 اەك نەمەسە 16 379 تەڭگە;
ٷشٸنشٸ بالاعا – 7,85 اەك نەمەسە 18 880 تەڭگە;
تٶرتٸنشٸ جەنە ودان كەيٸنگٸ بالالارعا – 8,90 اەك نەمەسە 21 405 تەڭگە.
«التىن القا», «كٷمٸس القا» بەلگٸلەرٸمەن ماراپاتتالعان نەمەسە بۇرىن «باتىر انا» اتاعىن العان, I جەنە II دەرەجەلٸ «انا داڭقى» وردەندەرٸمەن ماراپاتتالعان كٶپ بالالى انالارعا 2018 جىلى اي سايىن 15 392 تەڭگە جەردەماقى بەرٸلدٸ, بيىل بۇل كٶرسەتكٸش – 16 160 تەڭگەگە ٶستٸ.
كەمەلەتكە تولماعان تٶرت جەنە ودان كٶپ بالالارى بار وتباسىلارعا بەرٸلەتٸن جەردەماقى بىلتىرعى جىلى 4,16 اەك نەمەسە 10 005 تەڭگەنٸ قۇرادى...
ەبٸلقاسىموۆا:
«بۇل تۋرالى تولىق اقپارات بەرٸلمەگەن»
«كٶپ بالالى انالار مەملەكەتتەن بٸرنەشە ميلليون تەڭگە جەردەماقى الادى. بٸزدەن باسقا بٸردە-بٸر ەلدە مۇنداي ٷردٸس جوق» دەگەن مەدينا ەبٸلقاسىموۆا كەيٸن بىلايشا اقتالدى:
«نەگٸزٸ, بۇل تۋرالى تولىققاندى اقپارات بەرٸلگەن جوق. ەلٸمٸزدە انا مەن بالانى قولداۋ جٷيەلٸ تٷردە ٸسكە اسىرىلىپ كەلەدٸ. ەرتٷرلٸ مەملەكەتتٸك جەردەماقىلار, ەلەۋمەتتٸك تٶلەمدەر تٶلەنۋدە.
ٶتكەن جىلى 391 مىڭ بالا دٷنيەگە كەلدٸ. بالا تۋعان انالارعا بٸر رەتتٸك جەردەماقى بەرٸلەدٸ. ال ٷشٸنشٸ بالاسىن امان-ەسەن دٷنيەگە ەكەلگەن اناعا بەرٸلەتٸن جەردەماقى 95 900 تەڭگەنٸ قۇرايدى.
ودان دا كٶپ بالا تۋعان اناعا 159 مىڭ تەڭگە جەردەماقى بەرٸلەدٸ. بالا 1 جاسقا تولعانعا دەيٸن كٷتٸمٸنە دەپ اي سايىن 14 مىڭ مەن 22 مىڭ تەڭگەنٸڭ اراسىندا تاعى دا جەردەماقى تٶلەنەدٸ.
جٷكتٸلٸككە بايلانىستى جەردەماقى بار. ول بارلىق اناعا ەلەۋمەتتٸك ساقتاندىرۋ قورىنان تٶلەنەدٸ.
ەلٸمٸزدە 237 مىڭ انا «التىن القا» جەنە «كٷمٸس القامەن» ماراپاتتالعان. بۇل انالارعا ٶمٸر بويى اي سايىن 16 100 تەڭگە تٶلەنەدٸ. بۇل جەردەماقى تابىسقا بايلانىستى ەمەس. جەنە زەينەتكەرلٸككە شىقسا دا جەردەماقى تٶلەنە بەرەدٸ. زەينەتاقىسىن دا الىپ وتىرادى.
كٶپ بالالى وتباسىلارعا مەملەكەتتٸڭ ارنايى جەردەماقىسى بار. بىلتىر بۇل جەردەماقىنى 271 مىڭ وتباسى الدى. اي سايىن شامامەن 10 مىڭ تەڭگەدەن. ەگەر وسى جەردەماقىنىڭ بەرٸن العان وتباسىنىڭ تابىسى مٶلشەردەن تٶمەن بولسا, وندا اتاۋلى ەلەۋمەتتٸك كٶمەك دەگەن تاعى بار. بۇل كٶمەك قازٸر جاڭا فورماتقا ەنگٸزٸلگەن…».
سولاي دەيدٸ مينيستر. تولىق اقپارات بەرٸلمەگەن دەيدٸ ول. مينيستر «ميلليونەر» انالارمەن جٷزدەسسە تولىق اقپارات الار ما ەدٸ, بەلكٸم.
كٶپ بالالى انا:
«التىن القامدى» كٶرسەتۋگە ۇيالامىن»
گٷلشارا دەۋلەتوۆانىڭ 12 بالاسى بار. پەنسيياعا شىققانى كەشە عانا. كەنجەسٸ 11-دە.
«مينيستر ايتقان ميلليوندى ٶڭٸم تٷگٸل, تٷسٸمدە كٶرگەم جوق. ميلليونداپ تاپسام, جانىمدى باعىپ ٷيدە وتىرمايمىن با? 17 جىل بويى قۇرىلىستا الماتى وبلىسىنان قالاعا قاتىناپ جۇمىس ٸستەدٸم.
كٶپ بالالى رەتٸندە وسى ايدا العان جەردەماقىم 13 280 تەڭگەنٸ قۇرادى. بٸرەۋٸنە ەمەس, بارلىعىنا بەرٸلگەن جەردەماقى بۇل! ٶزگە كٶمەك جوق. «التىن القانىڭ» اتى عانا بار. كٶرسەتۋگە ۇيالامىن كەيدە. «التىن القانىڭ» «ايلىعىن» – 16 100 تەڭگەگە ٶسٸرٸپتٸ. قاي جىرتىعىمدى جامايمىن مۇنىمەن?» –دەيدٸ ول.
دايىنداعان دۋمان بىقاي
