پرەزيدەنت قاسىم-جومارت توقايەۆتىڭ فرانسياعا ساپارىنان ءتۇرلى سۋرەت-ۆيدەو جاريالاندى. پاريجگە بارعان تانىمالدار اراسىندا ديماش قۇدايبەرگەن، ەلدوس سمەتوۆ، داۆيد دياگتەريەۆ، اقمارال ناۋاتبەك بار.
Ulysmedia.kz قاسىم-جومارت توقايەۆ پەن فرانسيا پرەزيدەنتى ەممانيۋەل ماكروننىڭ ورتاسىندا سۋرەتكە تۇسكەن پاريجدەگى قانداسىمىز كىم ەكەنىن انىقتاعان، - دەپ حابارلايدى Dalanews.kz.
باسىلىم دەرەگىنە سۇيەنسەك، سۋرەتتەگى بويجەتكەن – فرانسيانىڭ كرەي قالاسى مەرىنىڭ ورىنباسارى، قازاق قىزى يەشىم ماقمۇد قىزى ساۆاش. ەسىم 1993 جىلى پاريجدە دۇنيەگە كەلگەن. ونىڭ اكە-شەشەسى تۇركيادا تۇرىپ، كەيىن فرانسياعا كوشكەن.
ەسىم ساۆاشتىڭ اتالارى قىتايدىڭ التاي ايماعىندا ءومىر سۇرگەن. ءوزى - حح عاسىردىڭ باسىندا قىتايعا قارسى سوعىسقان ايگىلى زۋقا باتىردىڭ جيەنى.
ەسىمنىڭ ماماندىعى - ءمۇعالىم جانە ەكونوميست. 18 جاسىنان باستاپ ساياساتتا. بۇعان دەيىنگى سۇحباتتارىندا ماروككونىڭ داحلا قالاسىندا جاستاردىڭ ساپالى ءومىر ءسۇرۋى ءۇشىن كۇرەسكەن قوزعالىسقا اتسالىسقانىن ايتقان.
مەن – تاعدىر تالكەگىمەن اتاجۇرتىنان الاستالعان قازاقتىڭ ۇرپاعىمىن. اتالارىم حح عاسىردىڭ ورتاسىندا انادولى جەرىنە قونىستانعان. ءوزىم فرانسيادا دۇنيەگە كەلدىم، بالالىق شاعىم پاريج ايماعىندا ءوتتى. مەنىڭ 13 جاسىمدا كرەيگە كوشىپ كەلدىك. ليسەيدى بىتىرگەن سوڭ تەحنولوگيا ينستۋتىندا جەرگىلىكتى ءوزىن-وزى باسقارۋ ماماندىعى بويىنشا باكالاۆر دارەجەسىن، كەيىن ۇلتتىق جوعارى بىلىكتىلىك جانە ءبىلىم بەرۋ ينستيتۋتىندا (Institut National Supérieur du Professorat et de l’Éducation) ءبىلىم ماگيسترى دارەجەسىن ءتامامدادىم، – دەيدى سۇحباتتارىنىڭ بىرىندە ەسىم.
ەسىم 2021 جىلى پاريج ايماعىنىڭ كرەي قالاسىنىڭ ورىنباسارى بولىپ سايلانعان. ونىڭ الدىندا مەردىڭ مادەنيەت جونىندەگى ورىنباسارى بولعان.
“مەن ساياساتقا جاڭا تىنىس، سەرپىن بەرگىم كەلدى. مەن ءوز جوبالارىمنان جاستاردىڭ ءوزىن-وزى تاني بىلگەنىن، قاجەت دۇنيەلەردى بىلگەنىن قالايمىن” دەيدى ول.
ايتا كەتەيىك، قاسىم-جومارت توقايەۆ پرەزيدەنت ەممانيۋەل ماكروننىڭ شاقىرۋىمەن 4-5 قاراشا كۇندەرى فرانسيا رەسپۋبليكاسىنا مەملەكەتتىك ساپارمەن باردى.
