جينالعان قاۋىمدى وبلىس اكىمى اماندىق باتالوۆ قۇتتىقتاپ، تاۋەلسىزدىكتىڭ ارقاسىندا قول جەتكىزگەن جەتىستىكتەرگە توقتالىپ ءوتتى.
– قىمباتتى جەتىسۋلىقتار! سىزدەردى ۇلىق مەرەكەمىز – تاۋەلسىزدىك كۇنىمەن شىن جۇرەكتەن قۇتتىقتايمىن! تاۋەلسىزدىك – بابالاردىڭ ارمانى مەن اماناتى، حالىقتىڭ ەڭ كيەلى قۇندىلىعى. 2021 جىلى رۋحى اسقاق، تۇعىرى بيىك ەل تاۋەلسىزدىگىنە 30 جىل تولادى. بۇل – ءبىزدىڭ جاس مەملەكەتىمىز ءۇشىن ۇلكەن تاريحي بەلەس. وسى جىلدار ىشىندە قازاقستان ءوزىن تاۋەلسىز مەملەكەت رەتىندە ورنىقتىردى. ءبىزدىڭ تاۋەلسىزدىك تاريحىنىڭ ءار پاراعىندا ەلباسىمىزدىڭ ۇشان-تەڭىز ەڭبەگى، جانكەشتى ەرلىگى، جاسامپاز ىستەرى جاتىر. پرەزيدەنتىمىز قاسىم-جومارت كەمەل ۇلى توقايەۆتىڭ بايسالدى ساياساتى ەلباسىنىڭ سىندارلى جولىمەن جالعاسىپ كەلەدى. وسى جىلداردا ەلىمىزدىڭ جەتكەن جەتىستىكتەرىنە جەتىسۋلىقتاردىڭ دا قوسقان ۇلەسى مول.
تاۋەلسىزدىكتىڭ العاشقى ون جىلدىعىندا وبلىس بيۋدجەتى 20 ملرد تەڭگەنىڭ اينالاسىندا بولسا، بيىلعى جىلى بۇل كورسەتكىش 770 ملرد تەڭگەگە جەتتى. ءبىز ەلباسىنىڭ تاپسىرماسىنا سايكەس، قانت قىزىلشاسىن ءوسىرۋدى قايتا جاڭعىرتىپ، توقتاپ تۇرعان اقسۋ، كوكسۋ قانت زاۋىتتارىن ىسكە قوستىق. يرريگاسيالىق جۇيەلەردى قالپىنا كەلتىرۋدى باستادىق.
ەت جانە ءسۇت وڭدەۋ جولعا قويىلدى. «ماريەۆەن فۋد»، «لۋكويل» سياقتى 9 ترانسۇلتتىق كومپانيانى تارتا وتىرىپ، ينۆەستيسيالىق ءىرى جوبالار جۇزەگە اسىرىلدى. حالىقتىڭ ءومىر ءسۇرۋ ساپاسىن جاقسارتۋ ماقساتىندا وڭىرگە تابيعي گاز تارتىلدى. رەسپۋبليكالىق «تالدىقورعان – وسكەمەن» اۆتوكولىك جولى جوندەلىپ جاتىر. جىل سوڭىنا قاراي ونەركاسىپ ءونىمىنىڭ كولەمى 1 ترلن. تەڭگەدەن اسادى، ال اۋىل شارۋاشىلىعىندا بۇل كورسەتكىش 900 ملرد. تەڭگەگە جەتپەك، – دەپ اتاپ ءوتتى ا. باتالوۆ.
سالتاناتتى جيىندى وبلىس باسشىسى بۇدان ءارى ماراپاتتاۋ راسىمىمەن جالعاستىردى. تالعار اۋداندىق قوعامدىق كەڭەسىنىڭ ءتوراعاسى قاليمولدا بايبولوۆ، الماتى كوپسالالى اۋرۋحاناسىنىڭ ءبولىم مەڭگەرۋشىسى ءاليما كوپبايەۆا، جامبىل اۋدانىنداعى «Zhambyl Keramzit Company» ج ش س ديرەكتورى مارات مىرزاعالي ۇلى جانە باسقا دا ءبىر توپ ازامات «قۇرمەت» وردەنىن يەلەنسە، ءىىى دارەجەلى «ەڭبەك داڭقى» وردەنىن العاندار قاتارىندا سارقان اۋدانىنداعى «اق-بۇلاق پرودۋكت» ج ش س جۇمىسشىسى باۋىرجان قاليمولدانوۆ، تالعار اۋدانىنداعى «Zeta» وندىرىستىك كومپانياسىنىڭ قۇراستىرۋشىسى داۋلەت نامازبايەۆ، «تەكەلييسكيي ەنەرگوكومپلەكس» ج ش س ءماشينيسى اقان حايرۋللين بار. سول سياقتى «ەرەن ەڭبەگى ءۇشىن»، «شاپاعات» مەدالدارىمەن، قازاقستان رەسپۋبليكاسىنىڭ قۇرمەت گراموتاسىمەن، قازاقستان رەسپۋبليكاسى پرەزيدەنتىنىڭ قۇرمەت گراموتاسىمەن دەنساۋلىق ساقتاۋ، الەۋمەتتىك سالا، ءبىلىم بەرۋ، مەملەكەتتىك قىزمەت، تۇرعىن ۇي-كوممۋنالدىق شارۋاشىلىعى، قۇرىلىس، ونەركاسىپ جانە باسقا دا ەكونوميكانىڭ ماڭىزدى سالالارىندا ەڭبەك ەتىپ جۇرگەن ءبىرقاتار جەتىسۋلىقتار ماراپاتتالدى.
وسى كۇنى التى ازاماتقا «الماتى وبلىسىنىڭ قۇرمەتتى ازاماتى» اتاعى بەرىلدى. اتاپ ايتقاندا، پارلامەنت سەناتىنىڭ دەپۋتاتى ءلاززات سۇلەيمەنوۆا، ەڭبەك ارداگەرى ەلەۋسىز سۇلتانعازييەۆ، «اينالايىن» بالالار ءۇيىنىڭ ادىسكەرى نەسىپجامال بايمادييەۆا، «ايۋ تاس» ج ش س قۇرىلتايشىسى الپىسباي راحيموۆ، بەلگىلى كينورەجيسسەر تالعات تەمەنوۆ، «ZHERSU» ينۆەستيسيالىق-وندىرىستىك كورپوراسياسىنىڭ باقىلاۋ كەڭەسىنىڭ ءتوراعاسى باۋىرجان وسپانوۆ «الماتى وبلىسىنىڭ قۇرمەتتى ازاماتى» اتاندى.
وزىنە كورسەتىلگەن قۇرمەتكە ريزاشىلىعىن بىلدىرگەن سەنات دەپۋتاتى ءلاززات سۇلەيمەنوۆا:
– ەڭ الدىمەن وبلىس اكىمى اماندىق عابباسۇلىن ەلباسىمىزدىڭ قولىنان «قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازاربايەۆ» وردەنىن الۋىمەن شىن جۇرەكتەن قۇتتىقتايمىن. وسى قۋانىشپەن بارلىق جەرلەستەرىمدى دە قۇتتىقتايمىن. ويتكەنى بۇل – بارشا جەتىسۋلىقتارعا بەرىلگەن ۇلكەن ماراپات دەپ ەسەپتەيمىن. مەن ءۇشىن الماتى وبلىسىنىڭ ورنى بولەك. ازامات رەتىندە قالىپتاسۋىم، مەملەكەتتىك قىزمەتتەگى جولىم وسى ولكەدەن باستالعان. سوندىقتان بۇگىنگى «الماتى وبلىسىنىڭ قۇرمەتتى ازاماتى» اتاعىن الۋ – مەن ءۇشىن بيىك مارتەبە. وسى اتاققا ۇسىنىپ، قولداپ، قۇرمەت كورسەتكەن ءماسليحات دەپۋتاتتارىنا، بارشا قاۋىمعا ريزاشىلىعىمدى ايتامىن. وسى قۇرمەتتى ءارقاشان اقتاپ جۇرۋگە، لايىقتى بولۋعا ءسوز بەرەمىن، – دەدى ل. سۇلەيمەنوۆا.
شارا سوڭى مەرەكەلىك كونسەرتكە ۇلاستى.
ەستەرىڭىزگە سالا كەتەيىك، جاقىندا ەلباسىنىڭ قاتىسۋىمەن وتكەن سالتاناتتى شارادا قازاقستان پرەزيدەنتى قاسىم-جومارت توقايەۆ ەلىمىزدىڭ الەۋمەتتىك-ەكونوميكالىق جانە مادەني دامۋىنا، حالىقتار اراسىنداعى دوستىق پەن ىنتىماقتاستىقتى نىعايتۋعا قوسقان ۇلەسى، بەلسەندى قوعامدىق قىزمەتى ءۇشىن الماتى وبلىسىنىڭ اكىمى اماندىق باتالوۆقا مەملەكەتتىك ناگرادانى تابىس ەتتى.
