باقىتگۇل زارقۇمار: «ءداستۇرلى پوەزيانى بۇزىپ-جارۋ – قىلمىس!»

Dalanews 09 قار. 2015 02:36 119

جۋىردا الماتىدا «پوليفونيا» حالىقارالىق ادەبي بايقاۋى وتكەنىن وتكەن نومىردە جازعان بولاتىنبىز. شەتەلدەن جاڭاشىل اقىندار مەن جازۋشىلار شاقىرىلىپ، ەلىمىزدەگى ادەبي ورتامەن تانىستىرۋ مۇمكىندىگىن تۋعىزعان بايقاۋ دا ءوز مارەسىنە جەتتى. ءبىز وسى بايقاۋعا قاتىسقان اقىنداردىڭ بىرىنەن شاعىن سۇحبات العان ەدىك.

 باقىتگۇل زارقۇمار، اقىن:

 «ءداستۇرلى پوەزيانى بۇزىپ-جارۋ – قىلمىس!»

 – بۇل فەستيۆالدىڭ ەرەكشەلىگى نەدە؟ ەلىمىزدە وتەتىن وزگە ادەبي كونكۋرستار مەن جيىنداردان قانداي ايىرماشىلىعى بار؟
– «پوليفونيا» ادەبي فەستيۆالى قوعامداعى قالىپتاسقان كوزقاراستار مەن قاتىپ قالعان قاعيدالارعا باعىنبايتىن ەرەكشە اۋديتورياسىمەن ەرەكشەلەندى دەسەم بولادى.
پوەزيالىق وقۋلار، ماستەر-كلاستار، پىكىرتالاستار جاقسى ءوتتى.
– فەستيۆالگە كەلگەن قوناقتارمەن شىعارماشىلىق بايلانىس ورناتۋدىڭ ءساتى ءتۇستى مە؟ ءوزىڭىز قانداي اقىندارمەن تانىسا الدىڭىز؟ ولاردىڭ ولەڭدەرىنەن قانداي جاڭالىق بايقادىڭىز؟
– فەستيۆالگە كەلگەن قوناقتارمەن ارقا-جارقا ارالاسىپ كەتتىم دەپ ايتا المايمىن. ءبىراق، ءىشىنارا اۋراسى انىق بولماسا دا، ەنەرگياسىمەن تارتقاندارى بولدى.
مەنىڭ بايقاعانىم، ءداستۇرلى پوەزيادان گورى مودەرنيستىك باعىتتى ۇستانعان جاستار از ەمەس ەكەن.
– مۇنداي حالىقارالىق ادەبي بايقاۋلاردى ءقازاقتىلدى ادەبي ورتا نەگە وتكىزبەيدى؟ قازاقى ادەبي ورتا نەگە بۇيىعى؟ ءوز ىشىندە ءوزى قايناۋدان جالىعاتىن كەز جەتكەن جوق پا؟
ءبىزدىڭ ءقازاقتىلدى ورتادا ادەبيەتكە جاناشىرلىق جوقتىڭ قاسى. اندا-ساندا جىلت ەتكىزىپ، قازىنانىڭ قالتاسىنان جىرىمباقتاپ ءجۇرىپ قارجى شىعارتىپ وتكىزەتىن ءارتۇرلى ادەبي كونكۋرس، ءمۇشايرالارىنىڭ ءوزى ءادىل وتپەيدى.تالانتتى جاستاردى قولدايتىن نيەت جوق، پيعىل تار.
– ءوز ولەڭدەرىڭىزدى وزگە تىلگە اۋدارتۋ جوسپارىڭىزدا بار ما؟ ەگەر اۋدارسا، وزگەلەر قالاي قابىلدايدى دەپ ويلايسىز؟
– ماعان ولەڭدەرىمنىڭ باسقا تىلگە اۋدارىلۋى ماقسات ەمەس. ءبىراق، ەگەر اۋدارىلاتىن بولىپ جاتسا، موڭعول تىلىنە اۋدارىلادى دەپ ويلايمىن.
– ادەبي جاڭاشىلدىق دەگەنىمىز نە؟ بۇگىنگى قازاق پوەزياسىندا جاڭاشىلدىق بار ما؟
– مەنىڭ پايىمداۋىمشا، ادەبي جاڭاشىلدىقتىڭ بولعانى دۇرىس. الايدا، پوەزيانىڭ ءداستۇرلى زاڭىنا باعىنباسا دا، ولەڭنىڭ بولمىسىن جوعالتپاعان ابزال.
ءداستۇرلى قالىپتى بۇزىپ-جارىپ، باردى جوعالتىپ، جوقتان بار جاساۋعا تىرىسۋ – قىلمىس!
ال قازىرگى قازاق پوەزياسىندا جاڭاشىلدىق جوق دەۋگە بولمايدى. مودەرنيزمدى ىزدەگەندەر تىنىشتىقبەك ابدىكاكىمۇلىن، سۇراعان راحمەتۇلىن، جاننا ەلەۋسىزوۆانى، گۇلنار سالىقبايەۆانى وقىپ كورسىن!

 

 

ۇسىنىلعان
سوڭعى جاڭالىقتار
x