وزدەرىڭىزگە بەلگىلى، 2024 جىلى 7 ناۋرىزدا ۇلتتىق بانك جىلدىق بازالىق مولشەرلەمەنى 15،25-تەن 16،5 پايىزعا دەيىن كوتەردى. Bank of America ساراپشىلارى ءوز تالداۋىندا بۇل ءوسىمدى "ءبىر رەت جانە جەتكىلىكتى"ستراتەگيا دەپ قاراستىراتىندارىن كورسەتكەن. بۇل نەنى بىلدىرەدى؟ بۇعان قاتىستى ەكونوميست ەلدار شامسۋتدينوۆ پىكىر ءبىلدىردى، دەپ حابارلايدى Dalanews.kz.
ورتالىق بانك مالىمدەمەسىنە سايكەس، قاتاڭ ساياسات قابىلداۋعا ينفلياسيانىڭ جەدەلدەۋى تۇرتكى، سونداي-اق ول بولاشاقتا ودان دا قاتاڭ شارالار قابىلداماس ءۇشىن جاسالعان.
تالداۋ توبىنىڭ جەتەكشىسى ەلدار شامسۋتدينوۆ Bank of America ساراپشىلارى بۇل ءوسىمدى "ءبىر رەت جانە جەتكىلىكتى" ستراتەگياسى اياسىندا قاراستىراپ وتىرعانىن اتاپ ءوتتى.
"ولاردىڭ بازالىق سەنارييى بويىنشا رەتتەۋشى ورگان ينفلياسيا ءوسىمىنىڭ تولىقتاي اسەرىن جانە جەكەلەي كورسەتكىشتەردىڭ ايقىندالۋىن كۇتۋ ءۇشىن 2025 جىلدىڭ III توقسانىنا دەيىن بازالىق مولشەرلەمەنى وزگەرىسسىز ساقتايتىنى ايتىلادى. جاڭا ينفلياسيالىق تولقۋ بولماسا، بازالىق مولشەرلەمە 2025 جىلدىڭ ەكىنشى جارتىجىلدىعىندا الدىڭعى 15،25% دەڭگەيىنە ورالىپ، تومەندەۋى دە مۇمكىن"، - دەيدى ەلدار شامسۋتدينوۆ.
ساراپشىنىڭ ايتۋىنشا، ەكونوميكاعا قوسىمشا سەرپىن بەرەتىن فاكتور سالىق رەفورماسى بولادى، ونىڭ ولشەمدەرى ءقازىر قوعاممەن تالقىلانۋدا.
الدىن الا دەرەكتەر بويىنشا، قازاقستان جەكەلەگەن سەكتورلار ءۇشىن 16% قۇرايتىن قوسىمشا قۇن سالىعىنىڭ سارالانعان مولشەرلەمەسىنە كوشەدى. سالىق مولشەرلەمەسىنىڭ ءوسىمى بيۋدجەتكە قوسىمشا 2،2 تريلليون تەڭگە اكەلەدى دەپ كۇتىلەدى. الايدا بيلىك بيزنەستى قولداۋ شارالارىن دا ازىرلەپ جاتقانىن باسا ايتا كەتەلىك.
بۇعان دەيىن ۇلتتىق بانك ينفلياسيا بويىنشا 2025-2027 جىلدارعا ارنالعان بولجامىن جاريالاعان. جۋىردا بازالىق مولشەرلەمە جايلى قارجىگەر-مامان عالىم قۇسايىنوۆ جەلىدە جازبا جاريالادى. "كوبىسى مەنى جوعارى ينفلياسيا جاعدايىندا بازالىق مولشەرلەمەنى تومەندەتۋ كەرەك دەگەن پىكىردە دەپ ويلاپ الىپتى. بۇل مۇلدەم ولاي ەمەس. مەنىڭ بار ويىم قازاقستاندا بازالىق مولشەرلەمەنىڭ اسەرى شەكتەۋلى، سوندىقتان ينفلياسيامەن كۇرەسۋ ءۇشىن كەشەندى شەشىمدەر قابىلداۋ قاجەت دەگەنگە باعىتتالعان"، دەپ باستالادى ونىڭ جازباسى.
