تۇركىستان وبلىسى باسشىسى ازىق-تۇلىك تاۋارلارىنىڭ باعاسىن نەگىزسىز ءوسىرۋ فاكتىلەرىنىڭ جولىن كەسۋدى تاپسىردى. ساتىلىمداعى ءاربىر تاۋار بويىنشا جاعدايدى كۇندەلىكتى باقىلاۋدا ۇستاپ وتىرۋ كەرەك. باعانى تۇراقتاندىرۋ باعىتىندا جۇيەلى جۇمىستاردى جالعاستىرىپ، ازىق-تۇلىك قورىن ۇلعايتۋدى جۇكتەدى.
وبلىس اكىمىنىڭ توراعالىعىمەن وتكەن اپتالىق اپپارات وتىرىسىندا جاۋاپتى باسقارما باسشىلارى الەۋمەتتىك ماڭىزى بار ازىق-تۇلىك ونىمدەرى باعالارىنىڭ ءوسۋىن بولدىرماۋدا قولدانىلىپ جاتقان شارالار تۋرالى كەڭىنەن توقتالدى.
– باعا تۇراقتاندىرۋ احۋالىن بايىپتى تۇردە باقىلاۋدا ۇستاۋ، ونىڭ نەگىزسىز كوتەرىلىپ، بەيبەرەكەت كەتۋىنە توسقاۋىل قويۋ اسا ماڭىزدى. بۇل جۇمىستاردى ۇدايى نازاردا ۇستاپ، تۋىنداعان جاعدايلارعا قاتىستى جەدەل شارالار كورىلۋ كەرەك. ونى قايتالاپ ايتا بەرۋدىڭ ءوزى ارتىق. مونيتورينگ جۇرگىزۋمەن شەكتەلمەي، ناقتى ناتيجە كورسەتىڭىزدەر، – دەدى وبلىس اكىمى.
باعانى تۇراقتاندىرۋدىڭ باسقا تەتىكتەرىنىڭ ءبىرى – الەۋمەتتىك دۇكەندەردىڭ سانىن ارتتىرۋ. وڭىردە 13 الەۋمەتتىك دۇكەن قىزمەت ەتەدى. سونىمەن قاتار قوسىمشا زاماناۋي فورماتتاعى 37 دۇكەن ىسكە قوسىلۋدا. سونىمەن بىرگە 15 پايىزدىق ۇستەماقىدان اسىرماۋ جونىندە قالا اۋماعىنداعى 25 ءىرى ساۋدا ورىندارىمەن مەموراندۋمدار تۇزىلگەن.
مىندەتتەمەلەردىڭ ساقتالۋىنا اكىمدىك تاراپىنان تۇراقتى مونيتورينگتىك باقىلاۋلار جۇرگىزىلۋدە. ناتيجەسىندە ساۋدا ۇستەمەسىنىڭ شەكتى مولشەرىن اسىرۋ، باسەكەلەستىكتى قورعاۋ سالاسىنداعى زاڭنامانىڭ بۇزىلۋى بويىنشا نارىق سۋبەكتىلەرىنە قاتىستى شارالار قابىلدانىپ، ازىق-تۇلىك تاۋارلارىنىڭ باعالارى 7-10 پايىزعا تومەندەتىلگەن.
