جاڭا وقۋ جىلى باستالارعا دەيىن دالاداعى اجەتحانالاردى جويىپ، بۇل ماسەلەنى تولىق شەشەمىز دەگەن ءبىلىم ءمينيسترىنىڭ ءسوزى ىسكە اسپاي قالدى. وقۋشىلارى دالاعا شىعىپ دارەت سىندىراتىن مەكتەپتەر جەتىپ ارتىلادى. سونىڭ ىشىندە الماتى، تۇركىستان جانە قىزىلوردا وبلىسىنىڭ ءبىرقاتار مەكتەبىندە دارەتحانا ماسەلەسى وتە-موتە اكتۋالدى. 

بۇل تۋرالى Dalanews.kz “ينفورمبيۋرو” جاڭالىقتار باعدارلاماسىنا سىلتەمە جاساپ حابارلايدى.

ەلدەگى 100-گە تارتا مەكتەپتە ءالى كۇنگە دەيىن جايلى، جىلى دارەتحانا جوق. ماسەلەنى ءبىرىنشى قىركۇيەككە دەيىن رەتتەيمىز دەگەن ايماعامبەتوۆتىڭ تاپسىرماسى ورىندالماي قالعان.

قىزىلوردا وبلىسى شيەلى اۋدانىنداعى №48 مەكتەپتىڭ وقۋشىلارى اقپاراتتىق-تەحنولوگيالىق عاسىردا دالاداعى دارەتحاناعا بارۋعا ءماجبۇر. الايدا ءبىلىم مەكەمەسىنىڭ باسشىسى مەكتەپتىڭ ىشىنە اجەتحانا ورناتىلعان جانە بالالارعا سوندا بارۋعا بولادى دەيدى.

ال تۇركىستان وبلىسىندا 38 مەكتەپتىڭ ىشكى اجەتحاناسى جوق. ايتالىق جاڭادان قۇرىلعان ساۋران اۋدانىنداعى 6 مەكتەپتى ايتپاعاندا، وسى پروبلەما وبلىس ورتالىعى تۇركىستان قالاسىنىڭ 7 مەكتەبىندە دە بار.

ماماندار وبلىستاعى قىرىققا جۋىق ءبىلىم وشاعىنىڭ جايى قىركۇيەكتىڭ اياعىندا شەشىلەدى دەپ سەندىردى. ال جەتىسايداعى مىنا مەكتەپتە دە وقۋشىلار سىرتتاعى اجەتحاناعا بارىپ ءجۇر. 

“كەلىسىمشارت بويىنشا وسى اپتانىڭ سوڭىنا، ون ەكىسىنە جوسپارلانعان. ەندى ساتىپ الۋ پورتالى ءار كەزدە جۇرگىزىلدى. ءبىراق كەلىسىمشارتتىڭ مەرزىمى ءارتۇرلى بولعاندىقتان وسى اپتانىڭ سوڭىنا دەيىن مەردىگەر مەكەمەلەر بىتىرەمىز دەپ ايتىپ جاتىر”، – دەيدى جەتىساي اۋداندىق ادامي الەۋەتتى دامىتۋ ءبولىمىنىڭ باس مامانى اسقار تاتەيەۆ.

ءبىلىم ءمينيسترىنىڭ ۋادەسى ازىرگە قاشان ورىندالارى بەلگىسىز. سوندىقتان اۋىل بالالارىنا قىستىڭ كوزى قىراۋدا سىرتتاعى اجەتحانانى پايدالانۋعا تۋرا كەلەتىن سىڭايلى.

 

https://www.youtube.com/watch؟v=KjLtUQAt-QQ&list=PLn2OyECVOtB_7pOm_4Nr87VWhUgPYy7gg&index=12