تۇركىستان وبلىسىنىڭ اكىمى دارحان ساتىبالدى بارلىق قۇزىرلى ورگان باسشالىرىنىڭ باسىن قوسىپ، ءوڭىردىڭ سەيسميكالىق قاۋىپسىزدىك ماسەلەلەرىنە بايلانىستى جيىن وتكىزدى. اكىم جاۋاپتى سالا باسشىلارىنا بۇل باعىتتاعى جۇمىستاردى كۇشەيتۋ تۋرالى ناقتى تاپسىرمالار بەردى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
تجد باستىعى اسقار تولەشيەۆتىڭ بايانداۋىنشا، قازىرگى تاڭدا توتەنشە جاعدايلار مينيسترلىگى تاراپىنان جەر سىلكىنىسى بولعان جاعدايدا ىس-ارەكەت الگوريتمىنە الماتىداعى ورىن العان جاعدايدى ەسكەرە وتىرىپ، وزگەرىس ەنگىزۋدە.
اتالعان الگوريتمگە سايكەس وبلىستىڭ جەر سىلكىنىسى بولعان جاعدايدا ىس-ارەكەت الگوريتمى ازىرلەنىپ، بەكىتىلەدى. تۇركىستان وبلىسى سەيسميكالىق ءقاۋىپتى وڭىرلەر قاتارىندا. بۇل ەسەپ رەسپۋبليكا دەڭگەيىندە ازىرلەنىپ سەيسميكالىق اۋدانداستىرۋ كارتاسىنا سايكەس نەگىزدەلگەن.
جيىندا ءزىلزالا ءقاۋپى جوعارى تاۋلى ايماقتاردا اپاتتان قورعانۋ بويىنشا جۇمىستاردى مۇقيات قايتا قاراۋ جايلى ايتىلدى.
– ايتىپ كەلمەيتىن اپاتقا اركەز دايىن بولۋىمىز كەرەك. جەر سىلكىنىسىنە ارنالعان وقۋ-جاتتىعۋدىڭ ماڭىزى زور. سوندىقتان ءدال وسى ماسەلەگە اسا ءمان بەرىپ، جاتتىعۋلاردى ءجيى وتكىزىپ تۇرۋ قاجەت. قۇلاقتاندىرۋ جۇيەلەرىن قايتا قاراپ، ناقتى قاجەتتىلىككە بەيىمدەۋ شارت. ناقتى اقپاراتتىڭ ءار ادامعا دەر كەزىندە جەتۋىن قامتاماسىز ەتۋ ماسەلەسىن كۇشەيتۋ كەرەك، – دەدى تۇركىستان وبلىسىنىڭ اكىمى دارحان ساتىبالدى.
جەر سىلكىنىسى كەزىندە ىس-ارەكەت الگوريتمى بولۋى كەرەك. جيىندا حالىققا جەر سىلكىنىسى بولعان جاعدايدا قالاي قيمىلداۋ كەرەك ەكەنىن ۇيرەتۋ بويىنشا جۇمىستاردى كۇشەيتۋ جولدارى ايتىلدى.
بۇگىنگە وبلىستا جەر سىلكىنىسىن انىقتايتىن 4 سەيسموستانسيا جۇمىس ىستەيدى. ولار بايدىبەك، تۇلكىباس، جەتىساي جانە تولەبي اۋداندارىندا ورنالاسقان. دەپارتامەنتپەن وبلىستاعى كوپقاباتتى عيماراتتاردىڭ جاعدايىنا تۇراقتى مونيتورينگ جۇرگىزىلۋدە.
2023 جىلى تۇركىستان وبلىسىنىڭ اكىمى دارحان ساتىبالدىنىڭ تاپسىرماسىمەن توتەنشە جاعدايلار دەپارتامەنتىنىڭ ماتەريالدىق-تەحنيكالىق بازاسى نىعايتىلدى.
– قازىرگى تاڭدا، ءار ءبىر وبلىستىڭ اۋماعىندا جەر سىلكىنىسىنىڭ ناقتى قاۋىپتىلىگىن انىقتاۋ ءۇشىن سەيسميكالىق اۋدانداستىرۋ كارتاسىن ازىرلەۋ قاجەتتىلىگى تۋىنداۋدا. وبلىس حالقىن دەر كەزىندە قۇلاقتاندىرۋ جۇيەسى قالىپتى تۇردە جۇمىس اتقارادى.
ءوزىڭىزدىڭ وتكەن جىلداعى تاپسىرماڭىزعا سايكەس سيرەنالىق سويلەۋ قۇرىلىسىن الۋعا ۇسىنىس بەرىلدى. سونداي-اق تەلەارنالار مەن راديو تولقىندارىن ۇستاپ قالۋ ارقىلى حالىقتى قۇلاقتاندىرۋ مەن جيىنتىق باسقارۋ جۇيەلەرى جاڭارتىلادى. سۋ قويمالارىنا جاقىن ماڭدا ورنالاسقان اۋىلدارداعى قۇلاقتاندىرۋ جۇيەلەرى دە جاڭارتىلادى. وبلىستىڭ جەر سىلكىنىسىنىڭ سالدارىن جويۋ جوسپارى ازىرلەنىپ، مينيسترلىككە كەلىسىمگە جولدانعان، – دەدى تجد باستىعى.
تۇركىستان وبلىسىنىڭ 2023 جىلعا ارنالعان حالىقتى جانە مامانداردى ازاماتتىق قورعاۋ سالاسىندا وقىتۋ جوسپارىنا سايكەس وقۋ كۋرستارى، 4،5 مىڭعا جۋىق سەيسميكالىق وقۋ-جاتتىعۋلاردى وتكىزىلگەن. جۇمىستار ءارى قاراي جالعاسادى. توتەنشە جاعدايلار دەپارتامەنتى تاراپىنان مەكتەپ وقۋشىلارىن توتەنشە جاعدايلار كەزىندەگى ىس-ارەكەتتەرگە ۇيرەتۋ ماقساتىندا 53 مىڭنان استام قاتىسۋشىنى قامتي وتىرىپ، 402 ينتەراكتيۆتى ساباقتار جۇرگىزىلدى.
قاۋىپسىزدىك مادەنيەتىن ەرتە جاستان باستاپ قالىپتاستىرۋ اسا ماڭىزدى. ويتكەنى تۇرعىنداردىڭ ەرەسەك توبىنا جەتكىزۋ ءبىراز قيىندىق تۋدىرادى. مۇنداي شارانى الداعى ۋاقىتتا ءجيى وتكىزۋ جوسپارلانۋدا. ءار مەكتەپتە توتەنشە جاعدايلار جونىندەگى مينيسترلەر جۇمىس ىستەيدى. ولارمەن بەينە جانە وفلاين تۇرىندە ءتۇرلى كەزدەسۋلەر وتكىزىلەدى. وتكەن جىلدىڭ ىشىندە وبلىس ورتالىعىنداعى مەملەكەتتىك مەكەمەلەردە جەر سىلكىنىسى كەزىندەگى ىس-ارەكەتتەر تۋرالى تۇسىندىرمە جۇمىستار جۇرگىزىلدى.
1 ناۋرىز ازاماتتىق قورعانىس كۇنىنە وراي رەسپۋبليكالىق جەر سىلكىنىسى بويىنشا وقۋ-جاتتىعۋ وتكىزىلۋ جوسپارلانۋدا.
