بيىل قالادا قاردىڭ جىلداعىدان قالىڭ جاۋعانىنا بايلانىستى سۋ قويماسى تولىپ، سۋ الۋ ءقاۋىپى بولعان جاعدايدا شليۋزداردى رەتتەۋ ارقىلى «بادام» وزەنىنە جىبەرۋ جوسپارلانۋدا.
مۇرات دۇيسەنبەك ۇلى "توعىس" سۋ قويماسىنداعى سۋ تاسقىنىن الدىن الاتىن شارالارمەن دە تانىستى.
سىيىمدىلىعى 4،6 ملن تەكشە مەتردى قۇرايتىن قويماعا سۋدى جيناۋ بۇگىندە اۆتوماتتى تۇردە جۇرگىزىلەدى. 265 شاقىرىمدى قۇرايتىن توعان اۋماعىندا ءقازىر سۋ باسۋ ءقاۋپىن الدىن الۋعا باعىتتالعان شارالار جان-جاقتى اتقارىلۋدا.
«اقساي قاراباستاۋ» كانالى دا قالاداعى سۋ تاسقىنى ءقاۋپى جوعارى اۋماق سانالادى. ءقازىر ۇزىندىعى 10،5 شاقىرىمدى قۇرايتىن كانالدى قاردان-مۇزدان تازارتۋ جۇمىستارى قارقىندى جۇرگىزىلۋدە.
قالانىڭ ءقاۋىپتى ايماقتارىنداعى سۋ تاسقىنىنا قارسى جۇمىستاردى تەكسەرگەن قالا باسشىسى جاۋاپتىلارعا مەردىگەر مەكەمەلەردىڭ دايىندىعىن قاداعالاۋدى قاتاڭ تاپسىردى.
"سۋ تاسقىنىن الدىن الۋدا اۋدان اكىمدەرى مەن ءتيىستى باسقارما باسشىلارى بىرلەسە جۇيەلى جۇمىس جۇرگىزۋى قاجەت.
قالا تۇرعىندارىنىڭ قاۋىپسىزدىگى ءۇشىن ەڭ الدىمەن، يرريگاسيالىق جۇيەلەردى تازالاۋ جۇمىستارى قارقىندى جۇرگىزىلۋى ءتيىس. تەحنيكالاردىڭ دايىندىعىن قاداعالاۋ، ءتيىستى شارالاردى شۇعىل جۇزەگە اسىرۋ - باستى نازاردا" - دەدى قالا اكىمى.
بۇعان دەيىن...
بۇعان دەيىن پرەمەر سمايىلوۆتىڭ توراعالىعىمەن وتكەن ۇكىمەت وتىرىسىندا كوكتەمگى سۋ تاسقىنىنا دايىندىق شارالارى قارالعان.
ۇكىمەتباسى بيىل قىس قارلى بولعانىن جانە اۋا رايى كۇرت جىلىنىپ كەتسە، سۋ باسۋ ءقاۋپى كۇشەيەتىنىن اتاپ وتكەن.
"قاراۋسىز تۇرعان وبەكتىلەردىڭ يەلەرىن انىقتاپ، كوممۋنالدىق جانە جەكە گيدروتەحنيكالىق قۇرىلىستاردى جوندەۋ شارالارىن ازىرلەۋ قاجەت. سۋ قويمالارىنداعى سۋدىڭ دەڭگەيىن انىقتاپ، ولارعا تۇراقتى باقىلاۋ جۇرگىزىلۋى ءتيىس. قاجەت بولسا، قاۋىپسىزدىكتى ساقتاي وتىرىپ، ونداعى سۋدى الدىن- الا ازايتۋ شارالارىن قابىلداعان ءجون"، – دەگەن سمايىلوۆ.
بۇدان بولەك سۋ تاسقىنىنا قارسى بارلىق ءىس-شارالاردى قامتاماسىز ەتۋدى، ءتيىستى جەدەل شتابتار قۇرۋدى ايتا كەلە، ترانسشەكارالىق وزەندەردەگى ءقاۋىپتىڭ الدىن الۋدا تۇراقتى مالىمەت الماسۋدى ءوڭىر باسشىلارىنا شەگەلەپ تاپسىرعان-تۇعىن.
