قۇقىق قورعاۋشى ايتبەك امانگەلدى تالعارداعى توبەلەستە قازا تاپقان ءجاسوسپىرىمنىڭ وتباسىنا تەگىن ادۆوكاتتار بەرۋدى ۇيىمداستىرىپ بەردى، - دەپ حابارلايدى Dalanews.kz Alash.kz ۇلتتىق پورتالىنا سىلتەپ.
“ءبىز وتباسىعا تەگىن قىزمەت كورسەتۋگە كەلىسكەن ءۇش ادۆوكاتتى ۇسىندىق. قازىرگى ۋاقىتتا تەرگەۋ جۇرگىزىلۋدە، ادۆوكاتتار قۇقىق قورعاۋ ورگاندارىمەن بىرگە زارداپ شەككەندەردەن سۇراق-جاۋاپ الۋدا. ءىس بويىنشا ءبىرقاتار ساراپتامالار تاعايىندالدى. جانجال كەزىندە جىگىتتىڭ اكەسى مەن اعاسى دا زارداپ شەككەن”، – دەدى امانگەلدى.
وتباسىنا اسقار قايماقوۆ، كارينا كوشەربايەۆا جانە مارال جايلاۋبايەۆا ەسىمدى ادۆوكاتتار كومەك كورسەتۋدە. ىسكە قۇقىق قورعاۋشى سايدا تاۋەكەلوۆا دا قوسىلدى. ول وقيعانىڭ كۋاگەرلەرىن قۇقىق قورعاۋ ورگاندارىمەن ىنتىماقتاستىققا شاقىردى.
ەسكە سالايىق، بۇعان دەيىن ىشكى ىستەر ءمينيسترى ەرجان سادەنوۆ وقيعاعا قاتىستى پىكىر بىلدىرگەن ەدى.
“الماتى وبلىسىنىڭ تالعار اۋدانىندا ورىن العان كامەلەتكە تولماعان بالانىڭ ولىمىنە قاتىستى ءمان-جايلار مەنىڭ جەكە باقىلاۋىمدا. وقيعا ورنىندا ءبىرىنشى ورىنباسارىمنىڭ باسشىلىعىمەن ءىىم قىزمەتكەرلەرىنەن قۇرالعان توپ جۇمىس ىستەۋدە. كىنالىلەر ءتيىستى جازاسىن الادى”، - دەدى ول.
الماتى وبلىسىنىڭ پوليسيا دەپارتامەنتى كامەلەتكە تولماعان بالانى ءولتىرۋ فاكتىسى بويىنشا قىلمىستىق ءىس قوزعادى.
رەسمي اقپاراتقا سۇيەنسەك، بارلىق كىنالى ادام ۇستالىپ، ۋاقىتشا ۇستاۋ يزولياتورىنا قاماۋعا الىنعان.
“قىلمىستىق ءىستى تەرگەۋ ىشكى ىستەر مينيسترلىگىنىڭ ەرەكشە باقىلاۋىنا الىنىپ، ونىڭ نۇسقاۋى بويىنشا ارنايى جەدەل-تەرگەۋ توپ جۇمىس اتقارۋدا. بارلىق جينالعان دالەلدەر، سونىڭ ىشىندە بەينەباقىلاۋ كامەرالارىنان الىنعان جازبالار زەرتتەلۋدە. قازىرگى ۋاقىتتا جەتى ادامنىڭ قىلمىس جاساۋعا قاتىسى بار ەكەنى انىقتالدى”، - دەيدى الماتى وبلىسىنىڭ پوليسيا دەپارتامەنتى.
مالىمەتكە سايكەس، جابىرلەنۋشى تاراپتىڭ دالەلدەرى بويىنشا باسقا تۇلعالاردىڭ قاتىسىن انىقتاۋ ءۇشىن تەرگەۋ شەڭبەرىندە تەكسەرۋ جۇرگىزىلۋدە.
“ءارقايسىنا جەكە قۇقىقتىق باعا بەرىلەتىن بولادى. قايتىس بولعان ءجاسوسپىرىمنىڭ زاڭدى وكىلدەرى تەرگەۋ بارىسى تۋرالى حابارلانىپ جاتىر. تەرگەۋ مۇددەسى ءۇشىن وزگە دە اقپارات جاريا ەتۋگە جاتپايدى”، - دەپ مالىمدەدى پوليسيا وكىلدەرى.
