ايگىلى ريەۆوليۋسيونەر فيدەل كاسترو ومىردەن ءوتتى

Dalanews 26 قار. 2016 06:26 485

كۋبانىڭ مەملەكەتتىك اقپارات قۇرالدارى وسى ەلدىڭ بۇرىنعى باسشىسى فيدەل كاسترونىڭ قايتىس بولعانى تۋرالى حابارلاپ جاتىر، – دەپ حابارلايدى ۇلت.كز پورتالى.

1959 جىلى قارۋلى توڭكەرىس ناتيجەسىندە بيلىككە كەلگەن فيدەل كاسترو 2008 جىلعا دەيىن ەلدى باسقاردى. اۋىر ناۋقاستان كەيىن ول بيلىكتى ءىنىسى راۋل كاستروعا بەرىپ، سودان بەرى كوپشىلىكتىڭ كوزىنە تۇسە بەرمەيتىن. سوڭعى رەت فيدەل كاسترو بيىل تامىزدىڭ 13ء-ى كۇنى ءوزىنىڭ 90 جىلدىق مەرەيتويىنا ارنالعان سالتاناتتى شاراعا قاتىسقان كەزدە جۇرتقا كورىنگەن.

كۋبا ۇكىمەتى فيدەل كاسترونىڭ دەنساۋلىق جاعدايىنا بايلانىستى ساراڭ مالىمەتپەن شەكتەلەتىن.

فيدەل كاسترو بيلىككە كەلگەن سوڭ كۋبا مەن اقش اراسىندا ديپلوماتيالىق بايلانىس ءۇزىلىپ، تەك بىلتىر، 2016 جىلى عانا قايتا ورناعان. كاسترو كسرو-مەن تىعىز قارىم-قاتىناس ورناتتى.

1962 جىلى كۇزدە كسرو-نىڭ كۋباعا اتوم قارۋى بار زىمىرانداردى ورنالاستىرۋى تاريحتا «كاريب داعدارىسى» دەگەن اتاۋمەن بەلگىلى 13 كۇنگە سوزىلعان ساياسي داعدارىسقا الىپ كەلگەن ەدى. ساراپشىلار بۇل داعدارىس كەزىندە الەم دۇنيەجۇزىلىك يادرولىق سوعىسقا شاق قالعان دەپ سيپاتتايدى.

حالىقارالىق قۇقىققورعاۋشى ۇيىمدار مەن دەموكراتيالىق ەلدەر فيدەل كاسترونى كۋبادا ساياسي قارسىلاستارىن اياۋسىز جازالاپ، ادام قۇقىقتارىن اياققا تاپتايتىن ديكتاتورلىق بيلىك جۇيەسىن ورناتقانى ءۇشىن سىنعا العان.

ۇسىنىلعان
سوڭعى جاڭالىقتار