بۇگىنگى ۇكىمەت وتىرىسىندا دەنساۋلىق ساقتاۋ سالاسىنداعى وزەكتى ماسەلەلەر قارالدى. دەنساۋلىق ساقتاۋ ءمينيسترى اقمارال ءالنازاروۆا وڭىرلەردەگى دارىگەر تاپشىلىعى مەن الەۋمەتتىك قولداۋ جايىنا ەرەكشە توقتالدى، دەپ حابارلايدى Dalanews.kz.

ونىڭ ايتۋىنشا، اۋىلدىق ەلدىمەكەندەرگە جۇمىسقا باراتىن مەديسينا قىزمەتكەرلەرىنە «ديپلوممەن اۋىلعا» باعدارلاماسى اياسىندا ءبىرقاتار الەۋمەتتىك كومەك كورسەتىلەدى.

مەديسينا قىزمەتكەرلەرىنىڭ مارتەبەسىن كوتەرۋ ءۇشىن ولارعا ۇسىنىلاتىن كەپىلدىكتەر مەن ىنتالاندىرۋ تولەمدەرىنىڭ كولەمى دە ۇلعايعان. ماسەلەن، 2024 جىلدان باستاپ اۋىلدىق جەرلەرگە بارىپ جۇمىس ىستەيتىن تاپشى ماماندىق يەلەرىنە 100 ەڭ تومەنگى جالاقى مولشەرىندە، ياعني شامامەن 8،5 ملن تەڭگە كولەمىندە ءبىرجولعى تولەم قاراستىرىلعان. الايدا مينيستر كەيبىر وڭىرلەر بۇل تولەمدەردى بەرۋ بويىنشا ءالى ناقتى شەشىم قابىلداماعانىن اتاپ ءوتتى.

سونىمەن قاتار، مينيستر ەل بويىنشا سالىنىپ جاتقان مەديسينا نىساندارىنا دا توقتالدى. بيىل جىلدىڭ سوڭىنا دەيىن 188 نىساننىڭ قۇرىلىسى اياقتالادى دەپ جوسپارلانعان. ەتالوندىق جوبالاردى قايتا قولدانۋ ناتيجەسىندە جوبا كەزەڭىندە 2 ملرد تەڭگە، ال قۇرىلىس كەزىندە 14،5 ملرد تەڭگە بيۋدجەت قاراجاتى ۇنەمدەلگەن. قۇرىلىستا قولدانىلعان ماتەريالداردىڭ 71 پايىزى وتاندىق ونىمدەردەن قۇرالعان.

اتالعان نىساندار ىسكە قوسىلعان سوڭ، ولاردا 143 مەديسينا قىزمەتكەرى – 22 دارىگەر مەن 121 ورتا بۋىن مامانى – جۇمىسقا ورنالاسادى دەپ كۇتىلۋدە. وسىعان بايلانىستى ءوڭىر اكىمدىكتەرىنە اۋىلعا جاڭادان كەلەتىن دارىگەرلەردى تارتۋ جانە ۇستاپ قالۋ ءۇشىن الدىن الا ءتيىستى شارالاردى قولعا الۋ تاپسىرىلدى.

جالپى العاندا، بارلىق 655 نىسان پايدالانۋعا بەرىلگەن كەزدە، شامامەن 1 ميلليون اۋىل تۇرعىنى العاشقى مەديسينالىق-سانيتارلىق كومەكپەن قامتىلاتىن بولادى.