Búgingi úkimet otyrysynda densaýlyq saqtaý salasyndaǵy ózekti máseleler qaraldy. Densaýlyq saqtaý ministri Aqmaral Álnazarova óńirlerdegi dáriger tapshylyǵy men áleýmettik qoldaý jaiyna erekshe toqtaldy, dep habarlaidy Dalanews.kz.
Onyń aitýynsha, aýyldyq eldimekenderge jumysqa baratyn meditsina qyzmetkerlerine «Diplommen aýylǵa» baǵdarlamasy aiasynda birqatar áleýmettik kómek kórsetiledi.
Meditsina qyzmetkerleriniń mártebesin kóterý úshin olarǵa usynylatyn kepildikter men yntalandyrý tólemderiniń kólemi de ulǵaiǵan. Máselen, 2024 jyldan bastap aýyldyq jerlerge baryp jumys isteitin tapshy mamandyq ielerine 100 eń tómengi jalaqy mólsherinde, iaǵni shamamen 8,5 mln teńge kóleminde birjolǵy tólem qarastyrylǵan. Alaida ministr keibir óńirler bul tólemderdi berý boiynsha áli naqty sheshim qabyldamaǵanyn atap ótti.
Sonymen qatar, ministr el boiynsha salynyp jatqan meditsina nysandaryna da toqtaldy. Biyl jyldyń sońyna deiin 188 nysannyń qurylysy aiaqtalady dep josparlanǵan. Etalondyq jobalardy qaita qoldaný nátijesinde joba kezeńinde 2 mlrd teńge, al qurylys kezinde 14,5 mlrd teńge biýdjet qarajaty únemdelgen. Qurylysta qoldanylǵan materialdardyń 71 paiyzy otandyq ónimderden quralǵan.
Atalǵan nysandar iske qosylǵan soń, olarda 143 meditsina qyzmetkeri – 22 dáriger men 121 orta býyn mamany – jumysqa ornalasady dep kútilýde. Osyǵan bailanysty óńir ákimdikterine aýylǵa jańadan keletin dárigerlerdi tartý jáne ustap qalý úshin aldyn ala tiisti sharalardy qolǵa alý tapsyryldy.
Jalpy alǵanda, barlyq 655 nysan paidalanýǵa berilgen kezde, shamamen 1 million aýyl turǵyny alǵashqy meditsinalyq-sanitarlyq kómekpen qamtylatyn bolady.
