اۋىل شارۋاشىلىعى ءمينيسترى ايداربەك ساپاروۆ جەتىسۋ وبلىسىنا جۇمىس ساپارىمەن كەلدى. مينيستر اۋىل شارۋاشىلىعى تاۋارىن وندىرۋشىلەرىمەن كەزدەسۋ وتكىزدى، – دەپ حابارلايدى Dalanews.kz
مينيستر جەتىسۋ – ەلىمىزدەگى اۋىل شارۋاشىلىعى دامىعان نەگىزگى وڭىرلەرىنىڭ ءبىرى ەكەنىن اتاپ ءوتتى. مۇندا اۋىل شارۋاشىلىعى جالپى وڭىرلىك ءونىمنىڭ شامامەن 13%-ىن قۇرايدى. كليماتتىق جاعدايدىڭ قولايلىلىعى جانە جۇڭگو حالىق رەسپۋبليكاسىنا گەوگرافيالىق جاقىندىعى ەكسپورتقا باعىتتالعان جوبالاردى جۇزەگە اسىرۋعا ۇلكەن مۇمكىندىك بەرەدى.
2025 جىلى وڭىردە قۇنى 29 ملرد تەڭگە بولاتىن اگروونەركاسىپتىك كەشەن بويىنشا 9 ينۆەستيسيالىق جوبانى ىسكە اسىرۋ جوسپارلانعان. ولاردىڭ قاتارىندا بورداقىلاۋ الاڭدارىن، قۇس فابريكاسىن، جىلىجايدى سالۋ جانە ەت كومبيناتىن كەڭەيتۋ بار. جالپى رەسپۋبليكا بويىنشا بيىل اوك سالاسىندا 1 ترلن تەڭگەدەن اساتىن 249 جوبانى جۇزەگە اسىرۋ كوزدەلگەن.
كەزدەسۋ بارىسىندا جۇگەرىنى تەرەڭ قايتا وڭدەۋ پەرسپەكتيۆالارىنا ەرەكشە كوڭىل ءبولىندى. 2024 جىلى وڭىردە 297 مىڭ توننا جۇگەرى جينالىپ، ونىڭ 135 مىڭ تونناسى قايتا وڭدەلدى، ال 76،8 مىڭ تونناسى ەكسپورتتالدى. وسىعان بايلانىستى مينيستر پانفيلوۆ اۋدانىندا جاڭا قايتا وڭدەۋ كاسىپورنىن سالۋ مۇمكىندىگىن قاراستىرۋدى ۇسىندى.
ءوڭىردىڭ ەكسپورتتىق الەۋەتى جوعارى، اسىرەسە جۇڭگو باعىتىنا. 2023 جىلى قحر-عا استىق جەتكىزۋ كولەمى 5،5 ەسە ارتىپ، 1،4 ملن تونناعا جەتتى. 2024 جىلدىڭ قىركۇيەگىنەن 2025 جىلدىڭ ساۋىرىنە دەيىنگى ارالىقتا جەتكىزۋ كولەمى 27%-عا ءوسىپ، 1،859 ملن توننانى قۇرادى.
جۇڭگو تاراپىمەن 29 ءتۇرلى ءونىم بويىنشا ەكىجاقتى حاتتامالارعا قول قويىلۋىنا بايلانىستى جەتكىزىلەتىن ءونىم تۇرلەرىن كەڭەيتۋ جۇمىستارى جالعاسۋدا. وسىعان وراي، جەتكىزىلەتىن ءونىم ساپاسىن ارتتىرۋ ماقساتىندا الاشانكوۋ ستانسياسىندا قازاقستان-قىتاي بىرلەسكەن اربيتراجدىق زەرتحاناسىن قۇرۋ جوباسى قاراستىرىلۋدا.
شارۋالار جۇگەرى ءوسىرۋدى دامىتۋ، بىلىكتى كادرلاردىڭ جەتىسپەۋشىلىگى، ارا شارۋاشىلىعىن دامىتۋ جانە ءونىمدى تەرەڭ وڭدەۋ ماسەلەلەرىن كوتەردى. بارلىق ۇسىنىستار نازارعا الىنىپ، جۇمىسقا قابىلداندى.
مينيستر سونداي-اق ءوڭىردىڭ نەگىزگى اۋىل شارۋاشىلىعى كاسىپورىندارىنىڭ قىزمەتىمەن تانىستى. ولاردىڭ قاتارىندا جۇگەرى وسىرۋمەن اينالىساتىن ءىرى شارۋاشىلىقتاردىڭ ءبىرى – «كوكتال اگرو» ج ش س بار. بۇل شارۋاشىلىق 2024 جىلدان باستاپ سقو-نىڭ تاجىريبەسىن تاراتۋ باعدارلاماسى اياسىندا 387 گەكتار جەرگە تامشىلاتىپ سۋارۋ جوباسىن ىسكە اسىرۋدا. سونىمەن قاتار تاۋلىگىنە 15 توننا ءسۇت وندىرەتىن ءسۇت فەرماسىنا دا باردى.
جۇمىس ساپارىنىڭ ماڭىزدى نىساندارىنىڭ ءبىرى – «جاركەنت كراحمال-سىرنە زاۋىتى» ج ش س بولدى. جۇگەرىنى تەرەڭ وڭدەۋ بويىنشا وڭىردەگى جەتەكشى كاسىپورىن جىلىنا 150 مىڭ تونناعا دەيىن شيكىزات وڭدەي الادى. 2024 جىلى 100 مىڭ توننا جۇگەرى قابىلدانىپ، كراحمال، سىرنە، جۇگەرى مايى جانە قۇراما جەم تۇرىندە 72 مىڭ توننا دايىن ءونىم شىعارىلدى. بيىلعى جىلدىڭ العاشقى ءتورت ايىندا 23 578 توننا ءونىم ءوندىرىلدى.
ونىمدەر ورتالىق ازيا ەلدەرىنە ەكسپورتتالادى.
اۋىل شارۋاشىلىعى مينيسترلىگى قوسىلعان قۇنى جوعارى وندىرىستەردى دامىتۋعا جانە ەكسپورتتىق الەۋەتتى كەڭەيتۋگە باعىتتالعان اگرارلىق سەكتوردى قولداۋ شارالارىن جۇزەگە اسىرۋدى جالعاستىرۋدا.
