اقسۋ قالاسى دوستىق اۋىلدىق وكرۋگىنە قاراستى پوگرانيچنيك ەلدى مەكەنىندە سوڭعى قوڭىراۋ سوعىلىپ، اۋىل مەكتەبىنە «حالىق قاھارمانى»، كەڭەس وداعىنىڭ باتىرى باۋىرجان مومىش ۇلىنىڭ ەسىمى بەرىلدى. اۋىل تۇرعىندارىنىڭ قۋانىشىن بولىسكەن قالا اكىمى قايرات نۇكەنوۆ ءبىلىم ورداسىندا باتىر اتانىڭ قۇرمەتىنە ارنالعان مەموريالدى تاقتانىڭ اشىلۋ ءراسىمىن جاسادى. قايرات تەمىرشوت ۇلى مەرەكەلىك شارادان كەيىن دوڭگەلەك ۇستەل باسىندا مەكتەپ تۇلەكتەرىمەن جۇزدەستى.
شاھار باسشىسى مەكتەپ بىتىرۋشىلەردى ومىرلەرىندەگى ەڭ ماڭىزدى كۇنمەن قۇتتىقتاپ، ءبىلىم جولىنداعى بولاشاق جوسپارلارىنىڭ ورىندالۋىنا ساتتىلىك تىلەدى. سونىمەن قاتار، مەكتەپ باسشىسىنا ايتۋلى كۇننىڭ ايشىقتى نىشانى رەتىندە اقيىق باتىردىڭ ايبارلى بەينەسى سومدالعان پورترەتتى سىيعا تارتتى. ال وسى قۋانىشتى جاڭالىقتىڭ ىسكە اسۋىنا ۇيىتقى بولعان پوگرانيچنيك اۋىلىنىڭ تۇرعىنى سادىقبەك نۇسەيىتوۆكە قالا اكىمى قۇرمەت گراموتاسى مەن ەستەلىك سىيلىعىن تابىس ەتتى. سوڭىنان ءداستۇرلى تۇردە سوڭعى قوڭىراۋ سوعىلدى.
ەستەرىڭىزگە سالا كەتەيىك، وسىدان بەس جىل بۇرىن اۋىلدىڭ ءبىر توپ ادامدارى پوگرانيچنيك ورتا مەكتەبىنە باتىردىڭ ەسىمىن بەرۋ تۋرالى ۇسىنىس جاساعان بولاتىن. وسىعان وراي، وبلىستىق جانە قالالىق تىلدەردى دامىتۋ بولىمدەرى ءبىرقاتار زەرتتەۋ جۇمىستارىن جۇرگىزىپ، تەر توكتى. بيىل باۋىرجان مومىش ۇلىنىڭ 100 جىلدىق مەرەيتويى قارساڭىندا سول يگى باستاما ءوز مارەسىنە جەتتى.
گۇلنار قادىروۆا،
مەكتەپ ديرەكتورى:
– مەكتەبىمىز باۋىرجان مومىشۇلىنداي قازاقتىڭ قايسار ۇلىنىڭ ەسىمىن الدى. مەن مۇنى – تەڭدەسى جوق باقىت دەپ بىلەمىن. سوندىقتان، وقۋشىلارىمىزدى پاتريوتتىق رۋحتا تاربيەلەپ، باتىر اتالارىنداي وتانىنا ادال، ۇلتجاندى ازامات بولىپ وسۋىنە جاعداي جاسايتىن بولامىز. مەكتەبىمىزدە بارلىعى 181 وقۋشى، 39 ءمۇعالىم بار. بيىل قازاق-ورىس سىنىپتارىنان 6 وقۋشى مەكتەپ ءبىتىرىپ وتىر. ولاردىڭ ەكەۋى ۇبت تاپسىرادى. جالپى، بيىلعى وقۋ جىلىن 21 وقۋشى «ۇزدىك» ءتامامداسا، سولاردىڭ 18ء-ى باستاۋىش سىنىپ وقۋشىلارى. ال 9-شى سىنىپتىڭ ەكى وقۋشىسى «قىزىل اتتەستاتقا» ءۇمىت ارتۋدا.
ايگۇل مولداش
