Shahar basshysy mektep bitirýshilerdi ómirlerindegi eń mańyzdy kúnmen quttyqtap, bilim jolyndaǵy bolashaq josparlarynyń oryndalýyna sáttilik tiledi. Sonymen qatar, mektep basshysyna aitýly kúnniń aishyqty nyshany retinde aqiyq batyrdyń aibarly beinesi somdalǵan portretti syiǵa tartty. Al osy qýanyshty jańalyqtyń iske asýyna uiytqy bolǵan Pogranichnik aýylynyń turǵyny Sadyqbek Nuseiitovke qala ákimi Qurmet gramotasy men estelik syilyǵyn tabys etti. Sońynan dástúrli túrde sońǵy qońyraý soǵyldy.
Esterińizge sala keteiik, osydan bes jyl buryn aýyldyń bir top adamdary Pogranichnik orta mektebine batyrdyń esimin berý týraly usynys jasaǵan bolatyn. Osyǵan orai, oblystyq jáne qalalyq tilderdi damytý bólimderi birqatar zertteý jumystaryn júrgizip, ter tókti. Biyl Baýyrjan Momyshulynyń 100 jyldyq mereitoiy qarsańynda sol igi bastama óz máresine jetti.
Gúlnar QADYROVA,
mektep direktory:
– Mektebimiz Baýyrjan Momyshulyndai qazaqtyń qaisar ulynyń esimin aldy. Men muny – teńdesi joq baqyt dep bilemin. Sondyqtan, oqýshylarymyzdy patriottyq rýhta tárbielep, batyr atalaryndai Otanyna adal, ultjandy azamat bolyp ósýine jaǵdai jasaityn bolamyz. Mektebimizde barlyǵy 181 oqýshy, 39 muǵalim bar. Biyl qazaq-orys synyptarynan 6 oqýshy mektep bitirip otyr. Olardyń ekeýi UBT tapsyrady. Jalpy, biylǵy oqý jylyn 21 oqýshy «úzdik» támamdasa, solardyń 18-i bastaýysh synyp oqýshylary. Al 9-shy synyptyń eki oqýshysy «qyzyl attestatqa» úmit artýda.
Aigúl MOLDASh
