اۋعانستان بيلىگى شەتەلدىك كاپيتال تارتۋدىڭ جاڭا تەتىگىن بەكىتتى. ەندى ينۆەستورلار ەلدە 1 جىلدان 10 جىلعا دەيىن تۇرۋعا مۇمكىندىك بەرەتىن "التىن" ىقتيارحات الا الادى، دەپ حابارلايدى Dalanews.kz.
شەشىم ەكونوميكالىق كوميسسيا وتىرىسىندا قابىلداندى. جيىندى پرەمەر-مينيستردىڭ ورىنباسارى - مينيستر ابدۋل گاني بارادار باسقارعان. ەندى شەتەل ازاماتتارىنىڭ اۋعانستاندا تۇرۋ قۇقىعىن الۋى ءۇشىن قانشا كولەمدە ينۆەستيسيا سالۋى كەرەك ەكەنىن قۇزىرلى ورگاندار ايقىنداۋعا ءتيىس.
ساراپشىلاردىڭ پىكىرىنشە، بۇل قادام حالىقارالىق وقشاۋلانۋ جاعدايىندا ەكونوميكانى جانداندىرۋعا باعىتتالعان. دۇنيەجۇزىلىك بانك دەرەكتەرىنە سۇيەنسەك، كەيىنگى جىلدارى ەل ەكونوميكاسى بەلگىلى ءبىر دەڭگەيدە وسكەنىمەن، سىرتقى قارجىلاي كومەك ايتارلىقتاي قىسقارعان. ياعني بيۋدجەتكە تۇسەتىن قاراجات ازايىپ، بيلىك ەندى جەكە ينۆەستيسيا ارقىلى قارجى تارتۋعا مۇددەلى.
شەتەلدىك بيزنەستى قىزىقتىرۋ ءۇشىن كابۋل ءبىرقاتار جەڭىلدىك ۇسىنباق. قۇرىلىسقا جەر تەلىمىن بەرۋ، جابدىقتار مەن كولىك اكەلۋگە كەدەندىك باج سالىعىنان بوساتۋ، سونداي-اق، بەس جىلعا دەيىن سالىقتان بوساتۋ قاراستىرىلعان.
دەگەنمەن قازىرگى جاعدايدا بۇل ەلدە تۇرىپ، بيزنەس جۇرگىزۋ ءۇشىن قوماقتى قاراجات سالۋعا نيەتتى ينۆەستورلار سانى قانشالىق بولاتىنى ازىرگە بەلگىسىز.
