2025 جىلعى 17 قازاندا اۋەزوۆ اۋدانىنىڭ جاستارعا ارنالعان كوميۋنيتي-ورتالىعىندا «تازا قازاقستان» رەسپۋبليكالىق اكسياسى اياسىندا «Plastic Hunt» اتتى ەكولوگيالىق شارا ءوتتى. بۇل ءىس-شارانىڭ ماقساتى بەلسەندى جاستاردى بىرىكتىرىپ، ەكولوگيالىق مادەنيەتتى قالىپتاستىرۋ مەن قورشاعان ورتانى قورعاۋعا دەگەن جاۋاپكەرشىلىكتى ارتتىرۋ بولعان، دەپ حابارلايدى Dalanews.kz.

شارا بارىسىندا قاتىسۋشىلار قولدانىلعان پلاستيكالىق بوتەلكەلەر مەن قاپتامالاردى جيناپ، ارنايى قۇرىلعىعا تاپسىرىپ، قايتا وڭدەۋگە جىبەردى.  اكسيا جاستاردىڭ ەكولوگيالىق ساناسىن دامىتۋعا جانە تۇرمىستىق قالدىقتاردى سۇرىپتاۋ مەن قايتا وڭدەۋگە دەگەن قىزىعۋشىلىعىن ارتتىرۋعا نەگىزدەلدى.

ءىس-شارا اياسىندا جۇزدەگەن پلاستيك قالدىقتار جينالدى،   قالانى تازا ءارى ءقاۋىپسىز ەتۋ جولىنداعى ماڭىزدى قادام بولدى. كوميۋنيتي-ورتالىقتىڭ رەزيدەنتتەرى بارلىق قاتىسۋشىلارعا ولاردىڭ بەلسەندى ازاماتتىق ۇستانىمى مەن تابيعاتتى قورعاۋعا قوسقان ۇلەسى ءۇشىن العىس ءبىلدىردى.

اكسياعا 30-عا جۋىق بەلسەندى جاس قاتىسىپ، 25 كەلىدەن استام پلاستيك قالدىقتاردى، بوتەلكەلەر مەن قاپتامالاردى جينادى. جينالعان پلاستيك ارنايى فاندوماتقا تاپسىرىلىپ، قايتا وڭدەۋگە جىبەرىلدى. بۇل شارا جاستاردىڭ ەكولوگيالىق ويلاۋىن قالىپتاستىرۋعا جانە تۇرمىستىق قالدىقتاردى دۇرىس سۇرىپتاۋعا دەگەن ىنتاسىن ارتتىرۋعا جول اشتى.

«Plastic Hunt» ەكولوگيالىق اكسياسى الداعى ۋاقىتتا تۇراقتى تۇردە وتكىزىلىپ تۇراتىن شاراعا اينالماق. ول جاستاردىڭ ەكولوگيالىق ساۋاتتىلىعىن ارتتىرۋعا جانە قالانىڭ تۇراقتى دامۋىنا جاستاردى بەلسەندى تارتۋعا باعىتتالعان. كەلەسى اكسيانى قاراشا ايىنىڭ سوڭىنا قاراي وتكىزۋ جوسپارلانىپ وتىر، ول كەڭەيتىلگەن فورماتتا بولماق.

سونىمەن قاتار، «تازا قازاقستان» رەسپۋبليكالىق كامپانياسى اياسىندا قالانىڭ 11 كوميۋنيتي-ورتالىعىندا جۇيەلى تۇردە ءتۇرلى ەكولوگيالىق شارالار وتكىزىلۋدە. «تازا بەيسەنبى» اكسياسى اياسىندا اپتا سايىن جاستار، ەرىكتىلەر جانە اۋدان تۇرعىندارى ورتالىقتار مەن قوعامدىق كەڭىستىكتەر ماڭىنداعى اۋماقتاردى تازالاۋعا شىعادى.

بۇل باستاما اياسىندا قالدىقتاردى سۇرىپتاۋ بويىنشا شەبەرلىك ساعاتتارى، تۇراقتى دامۋ جانە ەكولوگيالىق ادەتتەر جونىندە ءتۇسىندىرۋ جۇمىستارى جۇرگىزىلەدى. اكسيا جاستاردىڭ ەكولوگيالىق ساناسىن نىعايتىپ، تۇرعىنداردى قالانىڭ تازالىعىن ساقتاۋعا سەپتىگىن تيگىزۋدە.

قازىرگى تاڭدا بۇل باستاما مەگاپوليستىڭ بارلىق اۋداندارىن قامتىپ، جوعارى وقۋ ورىندارى، كوميۋنيتي-ورتالىقتارداعى جاستار ۇيىمدارى جانە باسقا دا سەرىكتەستەردىڭ كۇش-جىگەرىن بىرىكتىرۋدە.