اتىراۋلىق ارداگەر سپورتشى سپورتتاعى جەتىستىگى ءۇشىن وزىنە تيەسىلى تولەمدەردى تۋريزم جانە سپورت مينيسترلىگىن سوتقا بەرۋ ارقىلى ءوندىرىپ الدى، دەپ حابارلايدى Dalanews.kz.

بۇل تۋرالى جوعارعى سوتتىڭ باسپا ءسوز قىزمەتى حابارلادى.

“وسىعان بايلانىستى سپورت شەبەرىنىڭ تالابى قاناعاتتاندىرىلىپ، سوت مينيسترلىكتى الەم چەمپيوناتىنداعى جۇلدەلى ورىندارى ءۇشىن قارجىلاي سىياقى تولەۋگە مىندەتتەدى”، – دەلىنگەن حابارلامادا.

اتىراۋ قالاسىنىڭ تۇرعىنى ءارى سپورت شەبەرى تۋريزم جانە سپورت مينيسترلىگىنە 2021 جىلى ليسسابوندا (پورتۋگاليا) وتكەن دزيۋدودان الەم چەمپيوناتىنداعى، 2023 جىلى استانا قالاسىندا وتكەن ازيا جانە مۇحيت ايماعى چەمپيوناتىنداعى، ورال قالاسىندا ارداگەرلەر اراسىندا وتكەن سامبودان الەم چەمپيوناتىنداعى جانە ءابۋ-دابي (ءباا) قالاسىندا وتكەن دزيۋدودان الەم چەمپيوناتىنداعى جۇلدەلى ورىندارى ءۇشىن تيەسىلى تولەم جاساۋدى تالاپ ەتكەن.

ال مينيسترلىك سپورت ارداگەرلەرىنە تولەم قاراستىرىلماعانىن العا تارتىپ، تولەۋدەن باس تارتقان. وسىلايشا ارىزدانۋشى ماسەلەنىڭ شەشىمىن تابۋ ءۇشىن سوتقا جۇگىنەدى. 

“ەرەجەگە سايكەس، ءاربىر چەمپيون مەن جۇلدەگەرگە، سونىمەن قاتار جەكەلەگەن سپورت تۇرلەرىنە، ۇلتتىق قۇراما مۇشەلەرىنە حالىقارالىق جارىستاردا يەلەنگەن جۇلدەلى ورىندارى ءۇشىن 100% كولەمىندە قارجىلاي سىياقى تولەنەدى. ال بۇل ەرەجەدە سپورت ارداگەرلەرىنە – حالىقارالىق جارىستاردىڭ جۇلدەگەرلەرىنە سىياقى تولەۋگە تىيىم سالۋ تۋرالى ناقتى ەرەجە جوق”، – دەلىنگەن حابارلامادا.

شاعىمدانۋشى حالىقارالىق جارىستارعا وزگە ەلدەردىڭ سپورتشىلارىمەن قاتار قاتىسىپ، جۇلدەلى ورىندارعا يە بولعانى جانە بۇل ناتيجەلەردىڭ جالپى مەدال ەسەبىندە ەسەپكە الىنعانى اتالىپ ءوتتى.

ماسەلەن، سامبودان ورال قالاسىندا وتكەن الەم چەمپيوناتىنا 20-دان استام ەلدەن 550-دەن استام سپورتشى قاتىسقان.

“مينيسترلىك تاراپىنان اكىمشىلىك راسىمگە قاتىسۋشى ءۇشىن زاڭسىز ارەكەتتەردەن تۋىندايتىن سالدارلاردى بولدىرماۋ قاجەتتىگىن كوزدەيتىن (اپپك-نىڭ 13-بابى) قۇقىققا سەنىم ءپرينسيپى بۇزىلعان”، – دەپ تولىقتىردى جوعارعى سوت.

سوت شەشىمى ءالى زاڭدى كۇشىنە ەنگەن جوق.