Atyraýlyq ardager sportshy sporttaǵy jetistigi úshin ózine tiesili tólemderdi Týrizm jáne sport ministrligin sotqa berý arqyly óndirip aldy, dep habarlaidy Dalanews.kz.
Bul týraly Joǵarǵy sottyń baspasóz qyzmeti habarlady.
“Osyǵan bailanysty sport sheberiniń talaby qanaǵattandyrylyp, sot ministrlikti álem chempionatyndaǵy júldeli oryndary úshin qarjylai syiaqy tóleýge mindettedi”, – delingen habarlamada.
Atyraý qalasynyń turǵyny ári sport sheberi Týrizm jáne sport ministrligine 2021 jyly Lissabonda (Portýgaliia) ótken dziýdodan álem chempionatyndaǵy, 2023 jyly Astana qalasynda ótken Aziia jáne Muhit aimaǵy chempionatyndaǵy, Oral qalasynda ardagerler arasynda ótken sambodan álem chempionatyndaǵy jáne Ábý-Dabi (BAÁ) qalasynda ótken dziýdodan álem chempionatyndaǵy júldeli oryndary úshin tiesili tólem jasaýdy talap etken.
Al ministrlik sport ardagerlerine tólem qarastyrylmaǵanyn alǵa tartyp, tóleýden bas tartqan. Osylaisha aryzdanýshy máseleniń sheshimin tabý úshin sotqa júginedi.
“Erejege sáikes, árbir chempion men júldegerge, sonymen qatar jekelegen sport túrlerine, ulttyq qurama múshelerine halyqaralyq jarystarda ielengen júldeli oryndary úshin 100% kóleminde qarjylai syiaqy tólenedi. Al bul erejede sport ardagerlerine – halyqaralyq jarystardyń júldegerlerine syiaqy tóleýge tyiym salý týraly naqty ereje joq”, – delingen habarlamada.
Shaǵymdanýshy halyqaralyq jarystarǵa ózge elderdiń sportshylarymen qatar qatysyp, júldeli oryndarǵa ie bolǵany jáne bul nátijelerdiń jalpy medal esebinde esepke alynǵany atalyp ótti.
Máselen, sambodan Oral qalasynda ótken álem chempionatyna 20-dan astam elden 550-den astam sportshy qatysqan.
“Ministrlik tarapynan ákimshilik rásimge qatysýshy úshin zańsyz áreketterden týyndaityn saldarlardy boldyrmaý qajettigin kózdeitin (APPK-niń 13-baby) quqyqqa senim printsipi buzylǵan”, – dep tolyqtyrdy Joǵarǵy sot.
Sot sheshimi áli zańdy kúshine engen joq.
