"قازمۇنايگاز" باسشىسى اسحات حاسەنوۆ اتىراۋ ءموز رەسەي كومپانياسىنا ساتىلۋى تۋرالى قاۋەسەتكە جاۋاپ بەردى، دەپ حابارلايدى Dalanews.kz.
بۇل سۇراققا حاسەنوۆ استانادا ءوتىپ جاتقان فورۋمنىڭ كۋلۋارىندا جاۋاپ بەردى.
"قازىرگى تاڭدا اتىراۋ مۇناي وڭدەۋ زاۋىتى 100 پايىز “قازمۇنايگازدىڭ” يەلىگىندە. كەز كەلگەن ۇسىنىستى قاراستىرامىز. قازىرگى تاڭدا شتاتتىق رەجيمدە جۇمىس ىستەپ جاتىر. ەشقانداي كەلىسسوز جۇرگىزىپ جاتقان جوقپىز. الداعى جوسپار تۋرالى ايتا المايمىن. ول ءارقاشان وزگەرىپ وتىرادى. قازىرگى تاڭدا اموز-گە ءبىز عانا يەلىك ەتەمىز، ءبىز عانا جۇمىس ىستەپ جاتىرمىز"، - دەيدى اسحات حاسەنوۆ.
ال جۋىردا ەنەرگەتيكا مينيسترلىگى اتىراۋ مۇناي وڭدەۋ زاۋىتىنىڭ ۇلەسىن رەسەيلىك «تاتنەفت» كومپانياسىنا ساتۋ ماسەلەسى قاراستىرىلىپ وتىرعان جوق دەپ مالىمدەدى.
ايتا كەتەيىك، باسەكەلەستىكتى قورعاۋ جانە دامىتۋ اگەنتتىگى ءتوراعاسىنىڭ ءبىرىنشى ورىنباسارى رۋستام احمەتوۆ 2025 جىلعى 17 ناۋرىزدا ءماجىلىس دالىزىندە جۋرناليستەرگەن سۇقباتىندا ءاموز مەن ءپموز-دى جەكەشەلەندىرۋ تۋرالى ۇسىنىسقا قاتىستى تۇسىنىكتەمە بەردى.
ال كەيىنىرەك قازمۇنايگاز اتىراۋ مۇناي وڭدەۋ زاۋىتىنىڭ ۇلەسىن جەكەشەلەندىرۋ ماسەلەسىنە قاتىستى تۇسىنىكتەمە بەردى.
قمگ مالىمەتىنشە، پاۆلودار جانە اتىراۋ مۇناي وڭدەۋ زاۋىتتارىنىڭ ۇلەسىن جەكەشەلەندىرۋ باسەكەلەستىكتى قورعاۋ جانە دامىتۋ اگەنتتىگىنىڭ ۇسىنىسى بولعان.
"قمگ ەلىمىزدە مۇناي-گاز حيمياسى سالاسىن جان-جاقتى دامىتىپ، بارلىق ءوندىرىس تىزبەگىن بىرلەسىپ قۇرۋ ءۇشىن سەرىكتەستەرمەن ىنتىماقتاستىق ورناتۋعا اشىق كومپانيا ەكەنى بەلگىلى. وسىعان بايلانىستى الىس جانە جاقىن شەت ەلدەردىڭ ءتۇرلى كومپانيالارى، سونىڭ ىشىندە «تاتنەفت» جاق قاراستىرىلىپ وتىر"، - دەپ جازىلعان بۇعان دەيىنگى حابارلامادا.
