"Qazmunaigaz" basshysy Ashat Hasenov Atyraý MÓZ Resei kompaniiasyna satylýy týraly qaýesetke jaýap berdi, dep habarlaidy Dalanews.kz.
Bul suraqqa Hasenov Astanada ótip jatqan forýmnyń kýlýarynda jaýap berdi.
"Qazirgi tańda Atyraý munai óńdeý zaýyty 100 paiyz “Qazmunaigazdyń” ieliginde. Kez kelgen usynysty qarastyramyz. Qazirgi tańda shtattyq rejimde jumys istep jatyr. Eshqandai kelissóz júrgizip jatqan joqpyz. Aldaǵy jospar týraly aita almaimyn. Ol árqashan ózgerip otyrady. Qazirgi tańda AMÓZ-ge biz ǵana ielik etemiz, biz ǵana jumys istep jatyrmyz", - deidi Ashat Hasenov.
Al jýyrda Energetika ministrligi Atyraý munai óńdeý zaýytynyń úlesin reseilik «Tatneft» kompaniiasyna satý máselesi qarastyrylyp otyrǵan joq dep málimdedi.
Aita keteiik, Básekelestikti qorǵaý jáne damytý agenttigi tóraǵasynyń birinshi orynbasary Rýstam Ahmetov 2025 jylǵy 17 naýryzda Májilis dálizinde jýrnalistergen suqbatynda AMÓZ men PMÓZ-di jekeshelendirý týraly usynysqa qatysty túsinikteme berdi.
Al keiinirek Qazmunaigaz Atyraý munai óńdeý zaýytynyń úlesin jekeshelendirý máselesine qatysty túsinikteme berdi.
QMG málimetinshe, Pavlodar jáne Atyraý munai óńdeý zaýyttarynyń úlesin jekeshelendirý Básekelestikti qorǵaý jáne damytý agenttiginiń usynysy bolǵan.
"QMG elimizde munai-gaz himiiasy salasyn jan-jaqty damytyp, barlyq óndiris tizbegin birlesip qurý úshin seriktestermen yntymaqtastyq ornatýǵa ashyq kompaniia ekeni belgili. Osyǵan bailanysty alys jáne jaqyn shet elderdiń túrli kompaniialary, sonyń ishinde «Tatneft» JAQ qarastyrylyp otyr", - dep jazylǵan buǵan deiingi habarlamada.
