تالدىقورعاندا «اتاجۇرت» قوزعالىسىنا قاتىسى بار 19 بەلسەندىگە قاتىستى سوت ۇكىمى شىقتى، دەپ حابارلايدى Dala News.
مالىمەتتەرگە سايكەس، سوت بارلىق ايىپتالۋشىلاردى كىنالى دەپ تانىپ، ولاردىڭ ءبىر بولىگىنە 5 جىلعا باس بوستاندىعىنان ايىرۋ جازاسىن تاعايىنداعان. قالعاندارى شارتتى جازا العانى ايتىلدى.
سوت پروسەسى جابىق رەجيمدە وتكەن. بۇعان دەيىن مەملەكەتتىك ايىپتاۋشى 19 ايىپتالۋشىنىڭ بارلىعىنا ناقتى جانە شارتتى مەرزىمدەر سۇراعان.
ءىس جەتىسۋ وبلىسى تالدىقورعان قالالىق سوتىندا قارالعان.
بەلسەندىلەرگە قاتىستى قىلمىستىق ءىس 2025 جىلدىڭ قاراشا ايىندا الماتى وبلىسىندا وتكەن اكسيادان كەيىن قوزعالعان. وندا قاتىسۋشىلار جۇڭگو تۋىن جانە جۇڭگو ءتوراعاسى سي ءسزينپيننىڭ پورترەتىن ورتەگەن.
اكسيا قىتايدا ۇستالعان قازاقستان ازاماتى، ەتنيكالىق قازاق اليمنۇر تۇرعانبايدى بوساتۋدى تالاپ ەتۋ ماقساتىندا ۇيىمداستىرىلعانى ايتىلعان. ول 2025 جىلدىڭ شىلدەسىنەن بەرى قىتايدا قاماۋدا وتىر.
قۇقىق قورعاۋ ۇيىمدارىنىڭ مالىمەتىنشە، اكسياعا قاتىسۋشىلار قىتايدىڭ مۇسىلماندارعا قاتىستى ساياساتىنا قارسىلىق بىلدىرگەن.
العاشىندا بەلسەندىلەر «ۇساق بۇزاقىلىق» بابى بويىنشا اكىمشىلىك جاۋاپكەرشىلىككە تارتىلىپ، ايىپپۇل نەمەسە 15 تاۋلىككە دەيىن قاماۋعا الىنعان. كەيىننەن ولاردىڭ ۇستىنەن «الاۋىزدىق قوزدىرۋ» بابى بويىنشا قىلمىستىق ءىس قوزعالعان.
سونىمەن قاتار قىتايدىڭ الماتىداعى باس كونسۋلدىعى قازاقستاننىڭ سىرتقى ىستەر مينيسترلىگىنە ديپلوماتيالىق نوتا جولداپ، اتالعان وقيعاعا قاتىستى الاڭداۋشىلىق بىلدىرگەنى حابارلانعان.
