ميتينگكە قاتىسۋشىلار پرەزيدەنتتىڭ ساياسي رەفورمالار باعدارلاماسىن قولدايتىندىقتارىن بىلدىرۋدە. ترانسپارانتتار ۇستاعان جاستاردىڭ قاراسى كوپ.
ميتينگ قازاقستاننىڭ مەملەكەتتىك ءانۇرانىن ورىنداۋمەن باستالدى.
– ءبىزدىڭ باعىتىمىز – ايقىن، ماقساتىمىز – ورتاق. ءبىز – كوزى اشىق، كوكىرەگى وياۋ ازاماتتاردى بىرلەسىپ جۇمىس ىستەۋگە شاقىرامىز! باسقا پارتيالار بيلىككە جەتۋدى كوزدەسە، ءبىز ەڭ اۋەلى تاۋەلسىز قازاقستاننىڭ مۇددەسى ءۇشىن جۇمىس ىستەيمىز! ارداقتى اعايىن، اباي اتامىزدان قالعان امانات ءسوز بار: «ءبىرىڭدى قازاق، ءبىرىڭ دوس، كورمەسەڭ ءىستىڭ ءبارى بوس». سوندىقتان، كۇشىمىزدىڭ بىرلىكتە ەكەنىن كورسەتىپ، جاڭا قازاقستاندى بىرگە قۇرايىق! ءبىز بىرگەمىز! – دەدى «AMANAT» پارتياسىنىڭ اتقارۋشى حاتشىسى اسحات ورالوۆ.
ميتينگتە ءسوز العان ق ر ۇلتتىق عىلىم اكادەمياسىنىڭ اكادەميگى حانكەلدى ءابجانوۆ ەلىمىزدىڭ ساياسي مودەرنيزاسيالاۋدىڭ جاڭا كەزەڭىنە اياق باسقانىن العا تارتتى.
– پرەزيدەنتىمىز قاسىم-جومارت توقايەۆ جۇزەگە اسىرىپ جاتقان باستامالار مەن رەفورمالار ق ر كونستيتۋسياسىندا پاش ەتىلگەن قۇقىقتىق مەملەكەت قۇرۋعا جول اشاتىنىنا سەنىم مول. ءبىز ساياسي مودەرنيزاسيالاۋدىڭ جاڭا كەزەڭىنە اياق باستىق. AMANAT پارتياسىنىڭ دۇنيەگە كەلگەنى وسىنىڭ كورىنىسى. تاۋەلسىزدىك – بابالارىمىزدىڭ ارمانى ءارى اماناتى. ال جاھاندانۋ تۇسىندا ارمان مەن امانات اقيقاتقا اينالۋ ءۇشىن ەلدەگى ىنتىماقتان، كەلىسىمنەن، كەمەل ءۇنقاتىسۋدان ارتىق دۇنيە جوق، – دەدى حانكەلدى ءابجانوۆ.
ال ق ر پارلامەنتى ءماجىلىسىنىڭ دەپۋتاتى ەرلان سايروۆ دەموكراتيانىڭ ماڭىزدىلىعىنا توقتالدى.
– قازاقستاندا ساياسي رەفورمالار وزەكتى ءارى ماڭىزدى. ءاربىر قازاقستاندىق داۋىس بەرۋ جانە سايلانۋ قۇقىعىن قولدانا الۋى ءتيىس. دەموكراتياعا، پىكىرلەر پليۋراليزمىنە بالاما جوق. اماناتتىقداردىڭ بۇگىنگى شەرۋى كوپ دۇنيەنى بايقاتتى. ساياساتتان حابارى بارلار انىق ءبىلىپ وتىر. جىكتەپ ايتار بولساق، بىرىنشىدەن تەرىس اينالعان حالىقتىڭ رايىن قايتارىپ، قاتارلارىنا قوعامدا پىكىر قالىپتاستىراتىن اۆانگارتتاردى تارتۋ. وتكەن قارالى قاڭتاردا شىنى بار، وتىرىگى بار (پوپۋليستەر) پارتيا قاتارىنان شىققانداردىڭ قاراسى بايقالدى. ەندى پارتيا قاتارىنان كەتكەن حالىققا شىناي بولىساتىنداردى قايتارۋدى ويلاستىرۋى كەرەك. سونداي-اق پارتيا ءوز قاتارىن ەكىجۇزدى ارامداردان كىشكەنە بولسا دا ءبىر تازارتىپ الدى، ءقايتىپ كىرگىزبەۋى كەرەك، – دەدى ەرلان سايروۆ. سونىمەن قاتار دەپۋاتات مەملەكەت باسشىسى قاسىم-جومارت توقايەۆ ءوز جولداۋىندا پرەزيدەنت پەن اكىم-قارالار پارتيانى باسقارمايتىنىن، پارتيا اشۋ جولدارىندا جەڭىلدەتكەنىن تىلگە تيەك ەتتى. ياعني ساياسي ارەنادا باسقا دا پارتيالاردىڭ پايدا بولاتىن كۇننىڭ اۋىلى الىس ەمەس ەكەنىن اڭعارتتى.
– پرەزيدەنت ءوز جولداۋىندا يدەولوگيالىق دۇنيەلەرگە باسىمدىق بەردى. اتاپ ايتقاندا وبلىستارعا وبلىس قوسىپ، قالا مەن جاڭا وبلىستارعا تاريحي ەسىمدەر مەن جەر اتاۋلارىن بەرۋىنىڭ تۇپكىرىندە حالىقتىڭ رۋحىن كوتەرۋ دەيتىن ۇلكەن يدەولوگيالار جاتىر. بۇل كەزەيسوق دۇنيە ەمەس. سوڭعى جىلدارى الەۋمەتتىك جەلىلەر مەن قوعام اراسىندا تاريحي ەسىمدەردى بەرۋ ءجيى ايتىلا باستاعان بولاتىن. وسىنى ەسكەرگەن توقايەۆ حالىقتىڭ داۋىسى مەن بيلىك ىس-ارەكەتىن ۇيلەستىرىپ، جاڭاشا ءىز قالدىرا باستادى، – دەدى ءماجىلىس دەپۋتاتى ءسوزىنىڭ سوڭىندا.
