استانادا قورشاعان ورتانى قورعاۋ مەن اۋىل شارۋاشىلىعىن ءتيىمدى دامىتۋ – قوعامداعى ماڭىزدى ماسەلەنىڭ ءبىرى. بۇل باعىتى دامىتۋدا ۇلكەندەرمەن قاتار، جاس بۋىننىڭ دا بەلسەندى ارەكەتى قۋانتادى. اتاپ ايتقاندا، ءالىمحان ەرمەكوۆ اتىنداعى № 38 مەكتەپ-ليسەيىنىڭ جاس ونەرتاپقىشتارى فاريزا ابديرەي مەن سايان ءسادۋاقاس ۇسىنعان «تاڭعاجايىپ كۇن ەنەرگياسىنىڭ سۋارۋ جۇيەسى» اتتى جوبا ەكولوگيا مەن اگروسالادا ءبىرقاتار وزەكتى ماسەلەنى شەشۋگە باعىتتالعان،- دەپ حابارلايدى Dalanews.kz
جوبانىڭ باستى ماقساتى – سۋدى ۇنەمدەپ قولدانۋ، توپىراقتىڭ ىلعالدىلىعىن ساقتاۋ جانە جاڭارتىلاتىن كۇن ەنەرگياسىن ءتيىمدى پايدالانۋ. ەڭ باستىسى، بۇل جوبانىڭ تەك قاعاز جۇزىندەگى يدەيا ەمەس، ناقتى تاجىريبەدەن ءوتىپ، ىسكە قوسىلعان جۇيە ەكەنىن اتاپ وتكەن ءجون.
جاسوسپىرىمدەر بۇل جوبانى جۇزەگە اسىرۋ ءۇشىن ءبىراز ۋاقىت ىزدەنگەن. جەتەكشىسى انار جازىقباي قىزىنىڭ قولداۋىمەن جوبانىڭ سىزباسىن جاساپ، قۇرىلعىنىڭ ماكەتىن قۇراستىرعان. كۇن پانەلدەرى ارقىلى قۋات الاتىن بۇل جۇيە توپىراققا ءدال مولشەرمەن سۋ جەتكىزىپ، سۋدىڭ ىسىراپ بولماۋىن قامتاماسىز ەتەدى.
«تاڭعاجايىپ كۇن ەنەرگياسىنىڭ سۋارۋ جۇيەسى – ءبىزدىڭ ارمانىمىزدان تۋعان جوبا. ءبىز تابيعاتتى قورعاۋ جانە اۋىل شارۋاشىلىعىن دامىتۋ جولىنا ءوز ۇلەسىمىزدى قوسۋدى ارماندادىق. ناتيجەسىندە جوبامىز دۇنيەگە كەلدى. بۇل جوبا ارقىلى ءبىز ەگىن شارۋاشىلىعىندا سۋدى ۇنەمدەۋدى، توپىراقتىڭ ىلعالىن ءاردايىم ساقتاۋدى، كۇن ەنەرگياسىن ءتيىمدى پايدالانۋدى ماقسات ەتتىك. جەتەكشىمىزبەن بىرلەسە تاجىريبە جاساپ، ۇنەمى قۇرىلعىنىڭ جۇمىسىن جەتىلدىرۋگە تىرىستىق. وسىنىڭ ارقاسىندا «تازا قازاقستان» اكسياسىنا قاتىستىق، «پروەكو» بايقاۋىندا 3-ورىن يەلەنسەك، «عىلىمداعى دەبيۋت» كونكۋرسىندا 2-ورىن الدىق. بۇل ماراپاتتار – ءبىزدىڭ ەڭبەگىمىزدىڭ جەمىسى جانە بولاشاققا دەگەن سەنىمىمىزدىڭ كۇشەيۋى»، - دەيدى ونەرتاپقىشتار.
جوبا اۆتورلارى بولاشاقتا بۇل جۇيەنى تەك شاعىن جەر ۋچاسكەلەرىندە عانا ەمەس، ءىرى ەگىستىك القاپتارىندا، اگروكەشەندەردە دە قولدانۋدى جوسپارلاپ وتىر.
