قازاقستاننىڭ كٶلٸك مينيسترٸ نۇرلان ساۋرانباەۆ استانادا جاڭا ەۋەجايدىڭ قۇرىلىسى قاشان باستالاتىنىن مەلٸمدەدٸ, دەپ حابارلايدى dalanews.kz.
ٷكٸمەت وتىرىسىندا سٶيلەگەن مينيستردٸڭ ايتۋىنشا, الداعى ٷش جىل ٸشٸندە ەلدەگٸ ەۋەجاي ينفراقۇرىلىمىن جاڭعىرتۋ جۇمىستارى جٷرگٸزٸلەدٸ. ونىڭ ٸشٸندە استانا ەۋەجايىن جاڭعىرتۋ – باسىم باعىتتاردىڭ بٸرٸ.
«ەۋەجاي ينفراقۇرىلىمىنا قاتىستى ايتساق, الداعى ٷش جىل ٸشٸندە ونى جاڭعىرتۋ جۇمىستارى جٷزەگە اسىرىلادى. بۇعان دەيٸن دە ايتىلعانداي, استانا ەۋەجايىن جاڭعىرتۋ – بٸرٸنشٸ كەزەكتەگٸ مٸندەت. قازٸرگٸ ۋاقىتتا قالا ەكٸمدٸگٸ قاجەتتٸ دايىندىق جۇمىستارىن جٷرگٸزٸپ جاتىر. قۇرىلىستى كەلەسٸ جىلى باستاۋ جوسپارلانىپ وتىر», – دەدٸ نۇرلان ساۋرانباەۆ.
ەسكە سالايىق, كەشە ٶتكەن قازاقستان پارلامەنتٸ پالاتالارىنىڭ بٸرلەسكەن وتىرىسىندا مەملەكەت باسشىسى قاسىم-جومارت توقاەۆ استانادا جاڭا ەۋەجاي سالۋدى «كەيٸنگە قالدىرۋعا بولمايتىن مٸندەت» دەپ اتاعان بولاتىن.
