استانادا ەسىرتكىگە قارسى كۇرەس ايلىعىنىڭ اشىلۋى ءوتتى. شارا ەسىل وزەنىنىڭ جاعالاۋىندا ۇيىمداستىرىلىپ، حالىقارالىق ناشاقورلىقپەن كۇرەس كۇنىنە ارنالدى، – دەپ حابارلايدى ەلوردا اكىمدىگىنىڭ رەسمي سايتى.
ايلىق «استانا – ەسىرتكىسىز قالا» اتتى اۋقىمدى اكسيا اياسىندا وتكىزىلىپ وتىر.
ماقسات – جاستاردىڭ ەسىرتكىگە دەگەن تەرىس كوزقاراسىن قالىپتاستىرۋ، سالاۋاتتى ءومىر سالتىن ناسيحاتتاۋ جانە قوعامدى ناشاقورلىقپەن كۇرەسكە تارتۋ.
ءىس-شارانى استانا قالاسى پوليسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسى ۇيىمداستىردى.
اكسياعا تانىمال بلوگەرلەر، سپورتشىلار، ولاردىڭ اراسىندا ۆاسيليي تاحتاي، مەرەي اقشالوۆ جانە ايدوس قوجاحمەتوۆ قاتىستى. ولار جاستارعا موتيۆاسيالىق ۇندەۋ جاساپ، فوتو جانە اۆتوگراف-سەسسيالار وتكىزدى. سونىمەن قاتار ۇيىمداستىرۋشىلار مەن سەرىكتەستەر تاراپىنان مەرەكەلىك كوفە مەن سىيلىقتار تاراتىلدى.
– مەن وقۋشى رەتىندە مۇنداي اكسيالاردىڭ جاستارعا، اسىرەسە پروبلەمانىڭ وزەكتىلىگىن ءالى تولىق تۇسىنبەگەندەرگە، قاتتى اسەر ەتەتىنىن جاقسى بىلەمىن. سىيلىقتار مەن جۇلدەلەر ءىس-شاراعا قاتىسۋعا قوسىمشا موتيۆاسيا بەرەدى، – دەدى «جەر ەلشىلەرى» جاستار قوزعالىسىنىڭ كوشباسشىسى تەمىرلان ۇكىبايەۆ.
سپورتتىق بلوگەر جانە جاتتىقتىرۋشى ۆاسيليي تاحتاي مۇنداي شارالاردىڭ جازعى دەمالىس قارساڭىندا اسا ماڭىزدى ەكەنىن اتاپ ءوتتى:
– بۇگىن – مەكتەپ ءبىتىرۋ كەشى، جاستار سەرۋەندەپ، دەمالىپ ءجۇر. ءدال وسىنداي كۇنى ءبىز سپورت – ءومىر ءسۇرۋدىڭ ەڭ جاقسى ءستيلى ەكەنىن كورسەتكىمىز كەلەدى. سول ءۇشىن ءتۇرلى چەللەندجدەر، ويىندار وتكىزىپ، جاستاردى سالاۋاتتى ءومىر سالتىنا تارتپاقپىز، – دەدى ول.
پوليسيا قىزمەتكەرلەرى بۇل جولى شاراعا ەرەكشە فورماتتا قاتىستى.
– وقۋ جىلى بويى ءبىز مەكتەپتەردە دارىستەر مەن ساباقتار وتكىزەمىز، ال بۇگىن جاستارمەن قاراپايىم تىلدە – سپورت پەن ەركىن اڭگىمە ارقىلى سويلەسكىمىز كەلەدى. مۇمكىن بىرەۋ ءوز قيىندىعىن ايتقىسى كەلەر، ال ءبىز مىندەتتى تۇردە كومەكتەسەمىز، – دەدى استانا قالاسى پد ەسىرتكى قىلمىسىنا قارسى ءىس-قيمىل باسقارماسىنىڭ اسا ماڭىزدى ىستەر جونىندەگى اعا جەدەل ۋاكىلى ءاليا قىبات قىزى.
