تەڭگەمەن قامتاماسىز ەتىلگەن العاشقى ستەيبلكوين ەرتەڭ، 2025 جىلى 23 قىركۇيەكتە استانادا اينالىمعا قوسىلادى. بۇل تۋرالى ۇلتتىق بانك حابارلادى. ول ۆەدومستۆونىڭ "رەتتەۋشى قۇمسالعىشى" شەڭبەرىندە ىسكە قوسىلاتىنى دا ناقتىلانادى، دەپ حابارلايدى Dalanews.kz.
جالپى، بۇعان دەيىن ۇلتتىق بانك باسشىسى تيمۋر سۇلەيمەنوۆ جىل سوڭىنا دەيىن ەلىمىزدە تەڭگەمەن قامتاماسىز ەتىلگەن ءۇش ستەيبلكويندى ىسكە قوسۋ جوسپارلاپ وتىرعانىن ايتقان بولاتىن.
"ءبىزدىڭ "سيفرلىق قۇمسالعىشتا" تەڭگەمەن قامتاماسىز ەتىلگەن ستەيبلكوين بويىنشا ءۇش جوبا بار. ءبىز شىلدە ايىندا ىسكە قوسىلدىق. ءقازىر ءبىز ارىپتەستەرىمىزبەن وتە تىعىز جۇمىس ىستەۋدەمىز جانە ولار قىركۇيەكتىڭ سوڭىنا دەيىن تەڭگەمەن قامتاماسىز ەتىلگەن ستەيبلكويندى ىسكە قوسۋعا ۋادە بەرىپ وتىر. سونىمەن قاتار، كەلەسى جوبا قاراشا ايىنا جوسپارلانعان، سودان كەيىنگىسىن تاعى كورە جاتارمىز. كومپانيا اتىن اتاي المايمىن، ولار وزدەرى بۇل تۋرالى اقپارات تاراتاتىن بولادى. ءبىراق ءبىز اتالعان جايتتى مىندەتتى تۇردە ناسيحاتتايتىن بولامىز. بۇل ۇلتتىق بانكتىڭ رەتتەۋشى قۇمسالعىشىندا بولادى"، - دەگەن ەدى Astana Finance Days فورۋمىنىڭ اياسىندا ۇلتتىق بانكتىڭ ءتوراعاسى تيمۋر سۇلەيمەنوۆ.
ۆەدومستۆو باسشىسى ستەيبلكوين تولەم قۇرالى بولاتىنىن جانە ناقتى الەمنىڭ سيفرلىق جۇيەمەن ءوزارا ارەكەتىن جەڭىلدەتەتىنىن دە جەتكىزگەن.
"ءبىز، ءبىر جاعىنان، ءداستۇرلى كلاسسيكالىق رەتتەۋشىمىز، ءبىراق ارتقا شەگىنۋگە جول جوق ەكەنىن جاقسى تۇسىنەمىز. ءبىز تەك العا، بولاشاققا قاراۋىمىز كەرەك جانە تەحنولوگيا سول ءۇشىن دە تۋىنداعان. ءبىز ۋاقىتپەن بىرگە ءجۇرۋىمىز كەرەك، كوپتەگەن شالىس كەتەتىن تۇستار بار، سوندىقتان بىزگە دەر كەزىندە دانەكتى قاۋىزىنان اجىراتىپ وتىرۋ كەرەك بولادى. سونىمەن قاتار، ەگەر ءبىز ءداستۇرلى IPO مەن باعالى قاعازداردى الىپ قاراستىراتىن بولساق، مۇنى دا جاساي الامىز، ءبىراق بۇل پروسەستى جەڭىلدەتۋ ءۇشىن جۇمىس ىستەۋ كەرەك. مىسالى، ەگەر سىزدە ج ش س بولسا، ونى جاريا جۇرگىزىڭىز نەمەسە توكەن جولىنا ءتۇسىڭىز. ارتىقشىلىقتارى مەن كەمشىلىكتەرى قانداي دەيسىزدەر مە؟ بۇل تۋرالى ويلانۋ كەرەك. مەنىڭ ويىمشا، ءبىز بۇل سۇراقتارعا الدا جاۋاپ بەرەتىن بولامىز"، - دەپ LS سۇلەيمەنوۆتىڭ ءسوزىن كەلتىرەدى.
بۇگىنگى تاڭدا مەملەكەت باسشىسى قاسىم-جومارت توقايەۆتىڭ نيۋ-يوركتە جۇمىس ساپارىمەن جۇرگەنى بەلگىلى. پرەزيدەنت بۇۇ باس اسسامبلەياسىنىڭ 80ء-شى سەسسياسىنا قاتىسىپ، ءبىرقاتار مەملەكەتتىڭ جانە حالىقارالىق ۇيىمداردىڭ باسشىلارىمەن كەلىسسوز جۇرگىزەدى. قاسىم-جومارت توقايەۆ نيۋ-يورككە جۇمىس ساپارى اياسىندا Goldman Sachs Global Institute كومپانياسىنىڭ جاھاندىق ماسەلەلەر بويىنشا پرەزيدەنتى دجارەد كوەنمەن كەزدەسىپ، قازاقستان جاساندى ينتەللەكت، قارجى ەكوجۇيەسىن سيفرلاندىرۋ سالالارىنداعى ىنتىماقتاستىققا قىزىعۋشىلىق تانىتاتىنىن ايتتى.
