استانا تورىندەگى «ترياتلون» ساياباعىندا 5 شاقىرىمدى قۇراعان ماۋسىمنىڭ العاشقى جارىسى ءوتتى، دەپ حابارلايدى Dalanews.kz ەلوردا اكىمدىگىنىڭ رەسمي سايتىنا سىلتەمە جاساپ.

بيىل دالادا العاش رەت ۇيىمداستىرىلعان تۋرنيردە 500-دەن استام اۋەسقوي جەلاياق باس قوستى.

«Astana run – 4 كەزەڭنەن تۇراتىن ءارى قالانىڭ ءتۇرلى جەرىندە وتەتىن ەرەكشە سايىس. كەيىنگى جىلدارى استانا قالاسىنا كوشىپ كەلۋشىلەردىڭ سانى بويىنشا كوشباسشىلاردىڭ قاتارىنا كىرەدى. سوندىقتان، ءداستۇرلى باسەكەمىزدىڭ ءار كەزەڭىندە شامامەن 30% قاتىسۋشى ءبىرىنشى رەت قاتىسادى. ولار تەك جۇگىرىپ قانا قويماي، حوببيىنە سايكەس ادامدارمەن تانىسىپ، قالاعا تەز ءسىڭىسىپ كەتەدى»، - دەيدى جارىس ۇيىمداستىرۋشى جانات قوجاحمەتوۆ.

جۇگىرۋدى جانى سۇيەتىن اۋەسقوي جەلاياقتار جىلدىڭ 4 مەزگىلىندە جۇگىرىپ، ءار كەزەڭدە قالانىڭ سانىنە اينالعان عيماراتتارى، ساۋلەتتەرى بەينەلەنگەن مەدالدى يەلەنەدى.

جارىس بارىسىندا ەرەسەكتەر 18-29، 30-39، 40-49، 50-59، 60 جاستان جوعارى ساناتتا جەڭىمپازداردى انىقتاسا، 3-9 جاس ارالىعىنداعى بالالار 400 مەتر، 10-17 جاستاعى جاسوسپىرىمدەر 1 شاقىرىمعا جۇگىردى.

«2019 جىلدان كەيىنگى رەسمي العاشقى جارىسىم. سالىستىرمالى تۇردە جۇگىرۋ سوڭعى كەزدە ترەندكە اينالدى. الايدا وسىنداي ءۇردىس مونو قالالاردا دا جالعاسىن تاپسا ەكەن دەيمىن. سەبەبى، كىشى قالالاردا جۇگىرۋ، ۆەلوسيپەد جۇرگىزۋ ءالى سالاۋاتتى ءومىردىڭ ءبىر بولشەگى رەتىندە تولىققاندى سانالمايدى»، - دەدى اسىل ەسىمدى  قاتىسۋشى.