Astana tórindegi «Triatlon» saiabaǵynda 5 shaqyrymdy quraǵan maýsymnyń alǵashqy jarysy ótti, dep habarlaidy Dalanews.kz elorda ákimdiginiń resmi saityna silteme jasap.
Biyl dalada alǵash ret uiymdastyrylǵan týrnirde 500-den astam áýesqoi jelaiaq bas qosty.
«Astana run – 4 kezeńnen turatyn ári qalanyń túrli jerinde ótetin erekshe saiys. Keiingi jyldary Astana qalasyna kóship kelýshilerdiń sany boiynsha kóshbasshylardyń qataryna kiredi. Sondyqtan, dástúrli básekemizdiń ár kezeńinde shamamen 30% qatysýshy birinshi ret qatysady. Olar tek júgirip qana qoimai, hobbiine sáikes adamdarmen tanysyp, qalaǵa tez sińisip ketedi», - deidi jarys uiymdastyrýshy Janat Qojahmetov.
Júgirýdi jany súietin áýesqoi jelaiaqtar jyldyń 4 mezgilinde júgirip, ár kezeńde qalanyń sánine ainalǵan ǵimarattary, sáýletteri beinelengen medaldy ielenedi.
Jarys barysynda eresekter 18-29, 30-39, 40-49, 50-59, 60 jastan joǵary sanatta jeńimpazdardy anyqtasa, 3-9 jas aralyǵyndaǵy balalar 400 metr, 10-17 jastaǵy jasóspirimder 1 shaqyrymǵa júgirdi.
«2019 jyldan keiingi resmi alǵashqy jarysym. Salystyrmaly túrde júgirý sońǵy kezde trendke ainaldy. Alaida osyndai úrdis mono qalalarda da jalǵasyn tapsa eken deimin. Sebebi, kishi qalalarda júgirý, velosiped júrgizý áli salaýatty ómirdiń bir bólshegi retinde tolyqqandy sanalmaidy», - dedi Asyl esimdi qatysýshy.
