استانا قالاسىنىڭ اكىمى جەڭىس قاسىمبەك Instagram-پاراقشاسىندا الەۋمەتتىك ينفراقۇرىلىم قۇرىلىسىنىڭ قارقىنى تۋرالى جازدى،- دەپ حابارلايدى Dalanews.kz

ونىڭ ايتۋىنشا، ەلوردادا بالاباقشا مەن مەكتەپ تاپشىلىعىن ازايتۋ ماقساتىندا اۋقىمدى جۇمىس اتقارىلىپ جاتىر.

«2017 جىلدان بەرى مەملەكەتتىك بالاباقشا قۇرىلىسى توقتاپ تۇرعان ەدى. ءبىز بۇل ءىستى قايتا جانداندىردىق. جەر تەلىمدەرىن ءبولىپ، ينفراقۇرىلىم دايىندادىق»، – دەدى اكىم.

بيىل قالادا جالپى 2899 ورىنعا ارنالعان 11 بالاباقشا پايدالانۋعا بەرىلمەك. ونىڭ 5-ەۋى – جەرگىلىكتى بيۋدجەت ەسەبىنەن، 4-ەۋى – جەكە ينۆەستيسيا ارقىلى، قالعان ەكەۋى – تۇرعىن ۇيلەردىڭ ءبىرىنشى قاباتىندا جانە جاڭعىرتىلعان عيماراتتا اشىلادى.

سونىمەن قاتار، جاڭا وقۋ جىلىندا ەلوردادا 15 جاڭا مەكتەپ ىسكە قوسىلادى. وتكەن جىلى 24 مەكتەپ پايدالانۋعا بەرىلگەن، ونىڭ 16-سى – «جايلى مەكتەپ» ۇلتتىق جوباسى اياسىندا سالىنعان.

جەڭىس قاسىمبەكتىڭ ايتۋىنشا، الەۋمەتتىك نىساندارمەن قاتار ينجەنەرلىك ينفراقۇرىلىم دا دامىپ جاتىر. قالادا گاز جىلىتۋ ستانسيالارى، اۋىز سۋ مەن ەلەكتر ەنەرگياسىن جەتكىزەتىن نىساندار سالىنىپ، تىرشىلىكتى قامتاماسىز ەتەتىن جۇيەلەر جاڭارتىلۋدا.